މާލޭގައި ހުންނަ މަސްޖިދުލް ފުރުޤާންގެ ދޮރުގެ ބިއްލޫރިގަނޑު ބަޔަކު ތަޅާލައިފިއެވެ.
ފުލުހުން ހާމަކޮށްފައިވާ ގޮތުގައި، ފުރުޤާން މިސްކިތުގެ ދޮރުގެ ބިއްލޫރިގަނޑު ތަޅާލާފައިވާ މައްސަލަ ފުލުހުންނަށް ރިޕޯޓުކޮށްފައިވަނީ ރޭ ފަތިހު 4:10 އެހައިކަންހާއިރުއެވެ. މި ހާދިސާ ހިނގި ސަރަޙައްދަށް ފުލުހުން ގޮސް، ބަލަންޖެހޭ ކަންކަން ވަނީ ބަލާފައެވެ.
މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށް ފުލުހުން މަޢުލޫމާތު ދެއެވެ. ނަމަވެސް، މިސްކިތުގެ މުދަލަށް ގެއްލުން ދިން ފަރާތްތައް ހޯދުމަށްޓަކައި ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
މިސްކިތްތަކަކީ މުސްލިމުންގެ މުޤައްދަސް ބިނާތަކަށްވެފައި، މިފަދަ ތަންތަނަށް ގެއްލުން ދިނުމަކީ ދިވެހި މުޖުތަމަޢު ނުހަނު ކަންބޮޑުވުމާއެކު ބަލައިގަންނަ ކަމެކެވެ. މިސްކިތްތަކުގެ ރައްކާތެރިކަން ކަށަވަރުކުރުމަށް ކަމާބެހޭ ފަރާތްތަކުން އަބަދުވެސް އިލްތިމާސްކުރެއެވެ.
