ދިވެހި ކުންފުނިތަކާ ހަވާލުކޮށްގެން ހުޅުމާލެ ދެވަނަ ފިޔަވަހީގައި ތަރައްގީކުރުމަށް ހަމަޖެހިފައިވާ 1،000 ހައުސިންގ ޔުނިޓުގެ މަސައްކަތް މި ފެށޭ ހަފުތާގެ ތެރޭގައި ހަވާލުކުރުމުގެ މަސައްކަތް ކުރަމުންދާ ކަމަށް ހައުސިންގ މިނިސްޓްރީން ބުނެފިއެވެ.
ދައުލަތުގެ މީޑިއާ (ޕީއެސްއެމް) އިން ގެނެސްދޭ ”ރާއްޖެ މިއަދު“ ޕްރޮގްރާމުގައި ހައުސިންގ މިނިސްޓްރީގެ މަސައްކަތްތައް ކުރިއަށްދާ ގޮތުގެ އެންމެފަހުގެ މައުލޫމާތު ހިއްސާކުރައްވަމުން އެ މިނިސްޓްރީގެ ސްޓޭޓް މިނިސްޓަރ އަޙްމަދު ނާޒިމް މުޙައްމަދު ވިދާޅުވީ، މި ފެށޭ ހަފުތާގެ ތެރޭގައި 1،000 ހައުސިންގ ޔުނިޓުގެ މަސައްކަތް ކުންފުނިތަކާއި ހަވާލުކުރުމަށް ނިންމާފައިވާ ކަމަށެވެ.
މި މަސައްކަތް ހަވާލުކުރުމަށް ހަމަޖެހިފައިވަނީ 100 އިންސައްތަ ދިވެހި ކުންފުނިތަކަކަށް ކަމަށާއި އެގޮތުން ފަސް ކުންފުންޏަކަށް ހައުސިންގ ޔުނިޓް ތަރައްގީކުރުމުގެ މަސައްކަތް ހަވާލުކުރެވިގެންދާނެ ކަމަށް ނާޒިމް ވިދާޅުވިއެވެ. މިއިން ކޮންމެ ކުންފުންޏަކުން ކުރުމަށް ހަމަޖެހިފައިވަނީ 200 ހައުސިންގ ޔުނިޓްގެ މަސައްކަތެވެ.
މި މަޝްރޫއުގެ ދަށުން ދެ ކޮޓަރިއާއި ތިން ކޮޓަރީގެ ހައުސިންގ ޔުނިޓް ތަރައްގީކުރުމަށް ހަމަޖެހިފައިވާއިރު، މި ޔުނިޓްތަކަކީ މިހާތަނަށް ރާއްޖޭގައި ސޯޝަލް ހައުސިންގއަށް ތަރައްގީކޮށްފައިވާ ޔުނިޓުތަކަށްވުރެ ދެގުނަ ޖާގަ ތަނަވަސް ޔުނިޓްތަކަކަށްވާނެ ކަމަށް ހައުސިންގ މިނިސްޓްރީން މައުލޫމާތުދެއެވެ.
އެގޮތުން ދެ ކޮޓަރީގެ ހައުސިންގ ޔުނިޓްތަކުގައި 700 އަކަފޫޓު އަދި ތިން ކޮޓަރީގެ ޔުނިޓްތަކުގައި 950 އަކަފޫޓު ހުންނާނެ ކަމަށާއި މި އިމާރާތްތަކުގެ ފިނިޝިންގއާއި އިމާރާތުގެ ކުރިމަތީގައި އޮންނަ ޖާގަ ފަދަ ކަންކަން ކުރީގެ މަޝްރޫއުތަކަށްވުރެ ބޮޑުތަނުން ތަފާތުވާނެ ކަމަށް ވެސް އެ މިނިސްޓްރީން ވަނީ މައުލޫމާތުދީފައެވެ.
ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯދައިދިނުމަށް ސަރުކާރުން ދަނީ، ގިނަ މަޝްރޫއުތަކެއް ކުރިއަށް ގެންދަމުންނެވެ. އެގޮތުން މާލެ ސަރަހައްދާއި އަތޮޅުތެރޭގެ ރަށްރަށުގައި ވެސް ބޯހިޔާވަހިކަމުގެ މަޝްރޫއުތައް ސަރުކާރުން އަންނަނީ ކުރިއަށް ގެންދަމުންނެވެ.
