މާލެ ވެޓް މާރކެޓް ކޮމްޕްލެކްސް ތަރައްގީކުރުމަށް ސިޓީ ކައުންސިލުން އަމިއްލަ ކުންފުންޏަކާއެކު ވެފައިވާ އެއްބަސްވުން ބާތިލްކޮށްދިނުމަށް އެ ކުންފުނިން އެދުނު ނަމަވެސް، މިއަދާއި ހަމައަށް ވެސް އެކަން އޮތީ ނުކޮށް ކަމަށް ހައުސިންގ މިނިސްޓްރީން ބުނެފިއެވެ.
މި މައްސަލައާއި ގުޅިގެން ހައުސިންގ މިނިސްޓްރީން ނެރެފައިވާ ނޫސްބަޔާނެއްގައި ބުނެފައިވަނީ، ލޯކަލް މާރުކޭޓު ހުރި ސަރަހައްދުގައި ތަރައްގީކުރުމަށް ސަރުކާރުން އިއުލާނުކޮށްފައިވާ ”ވެޓް މަރކެޓް“ މަޝްރޫއަށް ބޭނުންވާ ބިން ހަވާލުކޮށްދޭން މާލެ ސިޓީ ކައުންސިލުގައި ތަކުރާރުކޮށް އެދިފައިވާ ކަމަށެވެ.
ނަމަވެސް ބިން ހަވާލުކުރެވެން ނެތްކަން ބުނެ މިދިޔަ މަހުގެ 20 ވަނަ ދުވަހު ސިޓީ ކައުންސިލުން ސިޓީއެއް ފޮނުވާފައިވާ ކަމަށް ހައުސިންގ މިނިސްޓްރީން ވަނީ ބުނެފައެވެ.
މާލެ ވެޓް މަރކެޓް ތަރައްގީކުރުމަށް ބޭނުންވާ ބިން ހަވާލުކުރެވެން ނެތް ސަބަބެއް ކަމަށް ސިޓީ ކައުންސިލުން ބުނެފައިވަނީ، 2023 ވަނަ އަހަރުގެ މާރިޗު މަހު އެ ކައުންސިލާއި އިންޖިނިއަރިންގ ކޮންސަލްޓަންސީ ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމެއްގެ ދަށުން، މަސް މާރުކޭޓު ސަރަހައްދު ތަރައްގީކުރަން ހަވާލުކޮށްފައިވާތީ ކަމަށާއި، ބިން ހަވާލުކުރެވޭނީ އެ އެއްބަސްވުން ބާތިލް ކުރުމަށްފަހުގައި ކަމަށެވެ.
މިކަމަށް އިޝާރަތްކޮށް ހައުސިންގ މިނިސްޓްރީން ބުނެފައިވަނީ، މި މަޝްރޫއު ކުރިއަށް ގެންދިއުމަށް ކައުންސިލުން ހަވާލުކޮށްފައިވާ ކުންފުނިން ވަގުތީ ގޮޅިއެއް ހެދުން ފިޔަވައި އެއްވެސް މަސައްކަތެއް ކޮށްފައިނުވާތީ އެ މަޝްރޫއުގެ އެއްބަސްވުން ބާތިލްކުރުމަކީ އެއްވެސް ހުރަހެއް އޮތް ކަމެއް ކަމަށް ނުދެކޭ ކަމަށެވެ.
ހައުސިންގ މިނިސްޓްރީން ބުނެފައިވާ ގޮތުގައި، މި މަޝްރޫއުގެ އިދާރީ ކަންކަމާއި ފައިނޭންސް ހަމަޖެހި، ކޮންޓްރެކްޓަރު ވެސް އަމަލީ މަސައްކަތް ފެށުމަށް ވަނީ ތައްޔާރުވެފައެވެ. ނަމަވެސް އެ މަސައްކަތް ނުފެށި ލަސްވާ ސަބަބަކީ، މަޝްރޫއު ކުރިއަށް ގެންދިއުމަށް ކަނޑައަޅާފައިވާ ބިން ހުސްކޮށް ހަވާލުކޮށްފައިނުވުން ކަމަށް މިނިސްޓްރީން ވަނީ ބުނެފައެވެ.
މާލެ ވެޓް މަރކެޓް ކޮމްޕްލެކްސް މަޝްރޫއަކީ 126 މިލިއަނަށް ރުފިޔާ ހަރަދުކޮށްގެން ކުރިއަށް ގެންދާ މަޝްރޫއެކެވެ. މި މަޝްރޫއުގެ ދަށުން ފަސް ފަންގިފިލާގެ އިމާރާތެއް ތަރައްގީކުރުމަށް ވަނީ ހަމަޖެހިފައެވެ. ޖުމުލަ 600 ދުވަހުގެ ތެރޭގައި ނިންމުމަށް ކަނޑައަޅާފައިވާ މި މަޝްރޫއަކީ މާލޭގެ ރައްޔިތުންނަށް ނުހަނު ބޭނުންތެރި މަޝްރޫއެއްގެ ގޮތުގައި ސަރުކާރުން ގަބޫލުކުރެއެވެ.
