ސިވިލް ކޯޓަށް ތިން ފަނޑިޔާރުން ހޯދުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން އިއުލާނުކޮށްފިއެވެ.
ޖޭއެސްސީން ކޮށްފައިވާ އިއުލާނުގައި ބުނެފައިވާ ގޮތުގައި، ސިވިލް ކޯޓުގެ ފަނޑިޔާރުކަމުގެ މަގާމަށް ކުރިމަތިލާ ފަރާތްތަކަކީ އުމުރުން 25 އަހަރު ފުރިފައިވާ ފަރާތްތަކަކަށް ވާންޖެހެއެވެ. އަދި އިސްލާމީ ޝަރީއާ ނުވަތަ ގާނޫނު ނުވަތަ މި ދެ ދާއިރާއިން ޑިގްރީއެއް ހާސިލްކޮށްފައިވުމާއެކު، ގާނޫނީ ވަކީލުކަން ނުވަތަ ފަނޑިޔާރުކަމުގެ މަދުވެގެން ދެ އަހަރުގެ ތަޖުރިބާ ލިބިފައި ހުންނަންޖެހެއެވެ.
އަދިހަމައެހެންމެ، މި މަގާމަށް ކުރިމަތިލާ ފަރާތަކީ ސުންނީ ޖަމާއަތުގެ މުސްލިމަކު ކަމުގައިވުމާއި، ބުއްދި ސަލާމަތުން ހުރި މީހަކު ކަމުގައިވާންޖެހޭނެ ކަމަށް ޖޭއެސްސީން ވަނީ ބުނެފައެވެ. އަދި ސިޔާސީ މަގާމެއްގައި ހުރި މީހަކަށް ނުވުމާއި، ސިޔާސީ ޕާޓީއެއްގެ މެންބަރަކަށް ނުވުމުގެ އިތުރުން އިސްލާމްދީނުގައި ހައްދެއް ކަނޑައެޅިފައިވާ ކުށެއް، ހިޔާނާތުގެ ކުށެއް ނުވަތަ ރިޝްވަތުގެ ކުށެއް ސާބިތުވެފައިވާ މީހަކަށް ނުވުން ވެސް ހިމެނެއެވެ.
މި މަގާމަށް ކުރިމަތިލާ ފަރާތަކީ ގާނޫނުލްއުގޫބާތުގެ ދަށުން ކުށެއް ކުރިކަމަށް ނުވަތަ ބަދުއަހުލާގީ އަމަލެއް ނުވަތަ ޓެރަރިޒަމްގެ ކުށެއް ކުރި ކަމަށް ހުކުމްކުރެވި، އެ ހުކުމް ތަންފީޒުކޮށް ނިމުނުތާ ހަތް އަހަރު ފުރިފައިވާ ފަރާތަކަށްވުމުގެ އިތުރުން، ސާބިތު ދަރަންޏެއް އޮތް ނަމަ، ހުކުމާ އެއްގޮތަށް އެ ދަރަނި އަދާކުރަމުންދާ މީހަކަށް ވާންޖެހޭނެއެވެ.
ސިވިލް ކޯޓުގެ ފަނޑިޔާރެއްގެ މުސާރައިގެ ގޮތުގައި މަހެއްގެ މައްޗަށް 37،700 ރުފިޔާ ކަނޑައަޅާފައިވާއިރު، ލިވިންގ އެލަވަންސްގެ ގޮތުގައި 18,000 ރުފިޔާ އަދި ރިސްކު އެލަވެންސްގެ ގޮތުގައި 3,300 ރުފިޔާ ވަނީ ކަނޑައަޅައިފައެވެ. މީގެ އިތުރުން މެޑިކަލް އިންޝުއަރެންސާއި ފޯނު އެލަވެންސް ވެސް ވަނީ ކަނޑައަޅައިފައެވެ.
މި މަގާމަށް ޝައުގުވެރިވާ ފަރާތްތަކުން އަންނަ ޖުލައި މަހުގެ އެއްވަނަ ދުވަހުގެ މެންދުރު 12:00 ގެ ކުރިން ޖޭއެސްސީއަށް އީމެއިލް މެދުވެރިކޮށް ބޭނުންވާ މުހިއްމު ލިޔެކިޔުންތައް ހުށަހެޅުމަށް އެ ކޮމިޝަނުން ވަނީ އެދިފައެވެ.
