ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޑެޕިއުޓީ ޑިރެކްޓަރު އިސްމާއީލް ޢަބްދުއްރަޙީމް (އިސޫ) އަށް ބަޔަކު ހަމަލާދީ ޒަހަމްކޮށްލައިފިއެވެ.
”އެކި އެމްވީ“ އަށް މައުލޫމާތު ލިބިފައިވާ ގޮތުގައި މި ހާދިސާ ހިނގުމަށް މެދުވެރިވީ، ހުޅުމާލެ ދެވަނަ ފިޔަވައްސާ ގުޅިފައި އޮންނަ ފަރުކޮޅުފުއްޓަށް ވަދެ އުޅުނު އަންހެނަކާއި ފިރިހެނެއްގެ ގާތު އެއީ މަނާ ކަމެއް ކަމަށް އިސޫ ބުނުމުން އެތާގައި ހުރި ފިރިހެން މީހާ ރުޅިގަދަވެ އިސޫއަށް ހަމަލާދިނުމުންނެވެ. ހަމަލާ ދިނުމުގެ ތެރޭގައި އިސޫގެ މައިބަދައަށް ލިބުނު ގެއްލުމުގެ ސަބަބުން އޭނާ ހޭނެތިފައިވާ ކަމަށް މައުލޫމާތު ދިން ފަރާތުން ވަނީ ބުނެފައެވެ. އެހެންނަމަވެސް އިސޫގެ ހާލު ފަހުން ރަނގަޅުކަމަށް މައުލޫމާތު ދިންފަރާތުން ބުނެއެވެ.
މި މައްސަލައާ ގުޅިގެން ފުލުހުން ބުނެފައިވަނީ، ހުޅުމާލެ ދެވަނަ ފިޔަވަހި ފަރުކޮޅުފުށި ހިއްކި ބިމުގައި މާރާމާރީއެއް ހިނގާފައިވާ ކަމަށް މިރޭ 18:37 އެހައިކަންހާއިރު ރިޕޯޓުކޮށްފައިވާ ކަމަށެވެ. އަދި މި މާރާމާރީގައި ދެ މީހަކަށް އަނިޔާވެގެން ހުޅުމާލެ ހޮސްޕިޓަލުގައި ފަރުވާދެމުން އަންނަ ކަމަށާއި އެއީ 21 އަހަރުގެ ފިރިހެނަކާއި 34 އަހަރުގެ ފިރިހެނެއް ކަމަށް ފުލުހުން ބުނެފައިވެއެވެ.
ހުޅުމާލެ ހޮސްޕިޓަލާއި ހަވާލާދީ ފުލުހުން ބުނެފައިވަނީ މި މާރާމާރީގައި އަނިޔާވި ދެ މީހުންނަށް މާ ބޮޑު ސީރިއަސް އަނިޔާތަކެއް ނުވާ ކަމަށެވެ. މި މައްސަލާގައި ހިމެނޭ 21 އަހަރުގެ ފިރިހެން މީހާ ފުލުހުން މިހާރު ވަނީ ހައްޔަރުކޮށްފައެވެ. މައުލޫމާތު ލިބިފައިވާ ގޮތުގައި އޭނާ އަމިއްލައަށް ފުލުހަށް ހާޒިރުވީއެވެ.
ފުލުހުން އިތުރަށް ބުނީ ފަރުވާއަށްފަހު އިސޫ މިހާރު ދޫކޮށްލާފައިވާކަމަށެވެ.
މި މައްސަލައާ ގުޅިގެން ބަލަންޖެހޭ އިތުރު ކަންކަން ބަލައި މައްސަލަ ތަހުގީގު ކުރަމުން އަންނަ ކަމަށް ފުލުހުން ވަނީ ބުނެފައެވެ.
