މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޑެޕިއުޓީ ސީއީއޯގެ މަގާމުގައި ހުންނެވި އިބްރާހިމް ޒިޔަތު އެ މަގާމުން އިސްތިއުފާ ދެއްވައިފިއެވެ.
ޑެޕިއުޓީ ސީއީއޯގެ މަގާމުން ޒިޔަތު އިސްތިއުފާ ދެއްވީ ކޮން ސަބަބަކާ ހުރެ ކަމެއް އެއްވެސް ފަރާތަކުން ހާމަކޮށްފައެއް ނުވެއެވެ.
އެމްޕީއެލްގެ ޑެޕިއުޓީ ސީއީއޯގެ މަގާމަށް ޒިޔަތު އައްޔަނުކޮށްފައިވަނީ މި އަހަރުގެ މާރިޗް މަހުގެ ތެރޭގައެވެ. މަގާމަށް އައްޔަނުކުރުމާއެކު، އޭނާ ވަނީ އެމްޕީއެލްގެ ބޯޑު މެންބަރެއްގެ ގޮތުގައި ވެސް ހަމަޖައްސައިފައެވެ. ނަމަވެސް، މިދިޔަ މަހުގެ އެއްވަނަ ދުވަހު އޭނާ ވަނީ އެމްޕީއެލްގެ ބޯޑުން ވަކިކޮށްފައެވެ.
ޒިޔަތު ބޯޑުން ވަކިކުރުމަށްފަހު، އެމްޕީއެލްގެ ބޯޑުގެ އެގްޒެކްޓިވް މެންބަރަކަށް ހަމަޖައްސާފައިވަނީ މުޙައްމަދު ލަމްއާނެވެ.
ފާހަގަކޮށްލަންޖެހޭ ގޮތުގައި ޒިޔަތަކީ މީގެ ކުރިން ވެސް ސަރުކާރުގެ ކުންފުނިތަކުގެ އިސް މަގާމުތައް ފުރުއްވާފައިވާ ބޭފުޅެކެވެ. އެގޮތުން ކުރީގެ ރައީސް އަބްދުﷲ ޔާމީންގެ ވެރިކަމުގައި އޭނާ ހުންނެވީ އެމްޓީސީސީގެ ސީއީއޯގެ މަގާމުގައެވެ.
