މާލޭގެ އުތުރު ފަރާތު ބޮޑުތަކުރުފާނު މަގު ތަރައްޤީކުރުމުގެ ބިޔަ މަޝްރޫޢުގެ ދަށުން، ތާރުއެޅުމުގެ ކުރިން ކުރަންޖެހޭ އެންމެ ފަހުގެ މަސައްކަތްތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބާރު ސްޕީޑުގައި ފަށައިފިއެވެ.
މި މަޝްރޫޢުގެ ދަށުން މިހާރު ކުރިއަށްދަނީ ހެންވޭރު ފެރީ ޓަރމިނަލް ސަރަޙައްދުން ފެށިގެން މަގު އެއްވަރުކުރުމުގެ މަސައްކަތެވެ.
އެމްޓީސީސީން މަޢުލޫމާތު ދެއްވާފައިވާ ގޮތުގައި، ހުޅުމާލޭ ފެރީ ޓަރމިނަލުން ފެށިގެން ފޮރިން މިނިސްޓްރީ ހުރި ހިސާބަށް މިހާރު ވަނީ ސަބް ގްރޭޑިންގ ނުވަތަ މަގު އެއްވަރުކުރުމުގެ މަސައްކަތް އެއްކޮށް ނިންމާލާފައެވެ. މިއީ މިހާރު މަސައްކަތް ހިނގަމުންދާ ސަރަޙައްދުގެ ގާތްގަނޑަކަށް 50 އިންސައްތަ މަސައްކަތެވެ. ކުންފުނީގެ އަމާޒަކީ މި ހަފްތާގެ ނިޔަލަށް އިއްޒުއްދީން ފާލަމާ ހަމައަށް މަގު އެއްވަރުކޮށް ނިންމުމެވެ.
މަގު ތަރައްޤީކުރުމުގެ މަސައްކަތް ތާވަލާ އެއްގޮތަށް ކުރިއަށްދާއިރު، މިދިޔަ ހަފްތާގެ ތެރޭގައި އެ ސަރަޙައްދުގައި މައި ފެންހޮޅި ވަޅުލުމުގެ މަސައްކަތް ވަނީ މުޅިން ނިންމާލާފައެވެ. މަގު އެއްވަރުކުރުމުގެ މަސައްކަތަށްފަހު ދެން އެންމެ އަވަހަށް ފެށިގެންދާނީ ތާރުއެޅުމުގެ އަމަލީ މަސައްކަތެވެ. އެމްޓީސީސީން ލަފާކުރާ ގޮތުގައި މި މަހުގެ ފަހު ހަފްތާގެ ތެރޭގައި ތާރުއެޅުމުގެ މަސައްކަތް ފެށޭނެއެވެ.
ބޮޑުތަކުރުފާނު މަގު ތަރައްޤީކުރަނީ ޖުމްލަ 5 ސެގްމަންޓަކަށް ބަހާލައިގެން، އެންމެ ޒަމާނީ ފެންވަރަށެވެ. މި މަޝްރޫޢުގެ ތެރެއިން 580 އުޅަނދުގެ ޖާގައިގެ ޕާކިންގ ސަރަޙައްދެއްވެސް ތަރައްޤީކުރެވޭނެއެވެ. މީގެ އިތުރުން، މަގު ފުޅާކުރުމަށްޓަކައި ފަޅުތެރެއިން ބައެއް ހިއްކައިގެން މަގުގެ ފުޅާމިނަށް ވަނީ ބަދަލު ގެނެސްފައެވެ.
މާލޭގެ އުތުރު ފަރާތަކީ ސަރުކާރުގެ މުހިއްމު އޮފީސްތަކާއި ކުންފުނިތައް ހުންނަ، އަދި ދުވާލެއްގެ މައްޗަށް އެތައް ހާސް ބަޔަކު ބޭނުންކުރާ ސަރަޙައްދަކަށްވާތީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަންދެނީ މި މަސައްކަތް ވީހާވެސް އަވަހަށް ނިންމައި އާންމުންނަށް ލުއިފަސޭހަ ކޮށްދިނުމަށެވެ. މި މަޝްރޫޢުގެ ފުރަތަމަ މަރުޙަލާގައި މާރުކޭޓު ސަރަޙައްދުން ފެށިގެން އިއްޒުއްދީން ފާލަމާ ހަމައަށް މިހާރު ވަނީ ތަރައްޤީކޮށް ނިންމާފައެވެ. އެމްޓީސީސީގެ އަމާޒަކީ މި މަހުގެ ނިޔަލަށް މުޅި މަޝްރޫޢު ނިންމާލުމެވެ.
