ރާއްޖޭގައި ވަކި ސިނާއަތެއްގެ ގޮތުގައި މެރިކަލްޗަރ ތަރައްގީކުރުމަށް ސަރުކާރުން ކުރަމުން އަންނަ މަސައްކަތްތަކުގެ ތެރެއިން، މޫދުވިނަ އާލާކުރުމުގެ މަސައްކަތް ކާމިޔާބުކަމާއެކު މިހާރު އަންނަނީ ކުރަމުންނެވެ.
މިކަމާ ގުޅޭގޮތުން އެންމެފަހުގެ މައުލޫމާތު ދެއްވަމުން ފިޝަރީޒް މިނިސްޓްރީގެ ސްޓޭޓް މިނިސްޓަރ މުޙައްމަދު މުއްޠަލިބް ވިދާޅުވީ، ރާއްޖޭގައި މޫދުވިނަ އާލާކުރުމުގެ މަސައްކަތް ކުންފުންޏަކުން ތަޖުރިބާކޮށްފައިވާ ކަމަށާއި އެ މަސައްކަތުގެ ނަތީޖާ ވަރަށް ފުރިހަމަ ކަމަށެވެ. މި މަސައްކަތް ޓެސްޓްކުރުމުގެ ގޮތުން ފެށީ އެންމެ 100 އެއްހައި ކިލޯގެ މޫދުވިނަ ކަލްޗަރކުރަން ފަށައިގެންނެވެ. ނަމަވެސް ބ. ފެހެންދޫގައި ކުރަމުން އަންނަ މި މަސައްކަތުގެ ދަށުން މަހެއްގެ މައްޗަށް 63 ޓަނުގެ މޫދުވިނަ ހާވެސްޓްކޮށް އެކްސްޕޯޓްކުރެއެވެ.
”63 ޓަނުގެ ޑްރައިޑް ސީވީޑަކީ އެއީ ގާތްގަނޑަކަށް ބަލާނަމަ ފަސް ކޮންޓެއިނަރުގެ ސީވީޑް އެކްސްޕޯޓްކުރެވިގެން އެދަނީ މަހެއްގެ މައްޗަށް. އެހެންވީމަ މިއީ ހަމަ ރަނގަޅު އިންވެސްޓްމަންޓެއްގެ ގޮތުގައި އަޅުގަނޑުމެންނަށް ފެނިގެން މިދިޔައީ.“ – މުއްޠަލިބު ވިދާޅުވިއެވެ.
ސަރުކާރުގެ އަމާޒަކީ މި މަސައްކަތް އިތުރަށް ފުޅާކޮށް މުޅި ރާއްޖެއަށް ފެތުރުމެވެ. އެގޮތުން ރާއްޖޭގައި މެރިކަލްޗަރ ސިނާއަތް ތަރައްގީކުރަން ސަރުކާރުން ވަނީ ހާއްސަ ފަސް ސަރަޙައްދެއް ކަނޑައަޅައިފައެވެ. އެއީ، ބޮޑު ތިލަދުންމަތި، ރ. އަތޮޅު، މ. އަތޮޅު، ތ. އަތޮޅުގެ އިތުރުން މަނިޔަފުއްޓާ ގާތްގަނޑަކަށް 2 ކިލޯމީޓަރު ދުރުގައި އޮތް ފަޅެއްގައެވެ.
ސްޓޭޓް މިނިސްޓަރު މުއްޠަލިބް ފާހަގަކުރެއްވި ގޮތުގައި، ގއ. އަތޮޅުގައި ދިވެހި އިންވެސްޓަރުން އިސްނަގައިގެން ސީވީޑް އާލާކުރުމުގެ މަސައްކަތް މިހާރު ވަނީ ފަށައިފައެވެ. މީގެ އިތުރުން، މި ދާއިރާއަށް އިންވެސްޓްކުރުމަށް ޝައުގުވެރިވާ ގިނަ ފަރާތްތަކަކުން ސަރުކާރަށް ޕްރޮޕޯސަލްތައް ހުށަހަޅަމުންދާކަން އޭނާ ފާހަގަކުރެއްވިއެވެ.
ސަރުކާރުގެ އަމާޒަކީ ކައިރި މުސްތަގުބަލެއްގައި މި ސިނާއަތް އިތުރަށް ފުޅާވެ، ރާއްޖޭގެ ކަޅުބިލަމަހުގެ މަސްވެރިކަމާ އެއްވަރުގެ، ނުވަތަ އެއަށްވުރެ ބޮޑު އާމްދަނީއެއް ގައުމަށް ލިއްބައިދޭ މުހިންމު ސިނާއަތަކަށް މިކަން ބަދަލުވެގެންދިއުމެވެ.
މި ސިނާއަތުގައި ހަރަކާތްތެރިވާން ބޭނުންވާ ފަރާތްތަކަށް ހިތްވަރު ދިނުމުގެ ގޮތުން، ”މެރިކަލްޗަރ ސްކީމް“ ގެ ނަމުގައި ސަރުކާރުން ވަނީ ހާއްސަ އެހީގެ ޕްރޮގްރާމެއް ތައާރަފްކޮށްފައެވެ. މި ސްކީމްގެ ދަށުން، ވިޔަފާރި ފެށުމަށް ބޭނުންވާ މޫދުކޮށި ފަދަ ވަސީލަތްތައް ހޯދުމަށް މާލީ އެހީތެރިކަން ފޯރުކޮށްދޭނެއެވެ. މިއީ މިހާރު މި މަސައްކަތުގައި އުޅޭ ފަރާތްތަކަށް ވިޔަފާރި ފުޅާކުރުމަށާއި، އަލަށް މި ދާއިރާއަށް ނުކުންނަން ބޭނުންވާ ދިވެހި އިންވެސްޓަރުންނަށް ފަހިވެގެންދާނެ ރަނގަޅު ފުރުސަތަކަށް ވާނެއެވެ.
