ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހުޅުމާލެ ދެވަނަ ފިޔަވަހީގެ ހިޔާ ސަރަހައްދުގައި ދިރިއުޅެމުންދާ ރައްޔިތުންނާ ބައްދަލުކުރައްވަން ނިންމަވައިފިއެވެ.
މި ބައްދަލުކުރެއްވުން ބޭއްވުމަށް ހަމަޖެހިފައި ވަނީ ހުޅުމާލެ ދެވަނަ ފިޔަވަހީގެ ހިޔާ ޕާކު ސަރަހައްދުގައެވެ. ޕީޕަލްސް ނޭޝަނަލް ކޮންގްރެސް (ޕީއެންސީ) އިން ވަނީ މިރޭ 9:45 ގައި ބާއްވާ މި ބައްދަލުކުރެއްވުމުގައި ބައިވެރިވާން ހުރިހާ ރައްޔިތުންނަށް ދައުވަތުދޭ ކަމަށް ބުނެފައެވެ. މި ބައްދަލުވުމުގައި ކުރިއަށް އޮތް ރައްޔިތުންގެ މަޖިލިސް އިންތިހާބުގައި އެ ޕާޓީން ވާދަކުރާ ކެންޑިޑޭޓުން ބައިވެރިވާ ގޮތަށް ވަނީ ހަމަޖެހިފައެވެ.
މާލޭގައި ރޭ ބޭއްވި ކެމްޕެއިން ހަރަކާތެއްގައި ރައީސް ވަނީ ރައްޔިތުންނާ ބައްދަލުކުރައްވައި، އިދިކޮޅު ފަރާތްތަކުން ސަރުކާރާ މެދު ރައްޔިތުންގެ އިތުބާރު ގެއްލުވާލުމަށް ދައްކަމުން އަންނަ ވާހަކަތަކުގެ ތަފްސީލު މިރޭ ހާމަކުރައްވާނެ ކަމަށް ވިދާޅުވެފައެވެ. އެގޮތުން އެއް ކަމެއްގެ ގޮތުގައި ރައީސް ފާހަގަކުރައްވާފައި ވަނީ ރަސްމާލެ މަޝްރޫއާ ގުޅިގެން ދައްކަމުންގެންދާ ވާހަކަތަކެވެ.
ރައީސް ވަނީ ރައްޔިތުން އެދޭ ތަރައްގީ ގެނައުމަށް ކުރިއަށް އޮތް މަޖިލިސް އިންތިހާބުގައި ސަރުކާރަށް މެޖޯރިޓީ ހޯދައިދިނުމަށް އެދިވަޑައިގެންފައެވެ.
ރައްޔިތުން މަޖިލިސް އިންތިހާބުގެ ކެމްޕެއިން ހަރަކާތްތައް ކުރިއަށްދާއިރު، ސަރުކާރު ހިންގާ ޕާޓީއަށް ނިސްބަތްވާ ކެންޑިޑޭޓުންނަށް ތާއީދު ހޯދުމަށް އެ ޕާޓީން ކުރިއަށް ގެންދާ ހަރަކާތްތަކުގައި ޕާޓީގެ ރައީސް އަދި ރައީސް މުޢިއްޒު ގެންދަވަނީ ބައިވެރިވެވަޑައިގަންނަވަމުންނެވެ. އެގޮތުން ކެމްޕެއިން ޖަގަހަތައް ހުޅުވުމާއި ޑޯޓުޑޯ ހަރަކާތްތަކުގައި އެމަނިކުފާނު އަންނަނީ ބައިވެރިވަޑައިގަންނަވަމުންނެވެ.
