ނިމިދިޔަ 35 ވަނަ ގައުމީ އެތުލެޓިކްސް ޗެމްޕިއަންޝިޕްގެ އެންމެ މޮޅު އަންހެން އަދި ފިރިހެން އެތުލީޓުގެ ޝަރަފު ޓްރެކް އެންޑް ފީލްޑް އެސޯސިއޭޝަންގެ ޢާއިޝަތު ޝާޔާ ޝަފީޢު އާއި ޔޫސުފް ނާއިކް ވަޖީހު ހޯދައިފިއެވެ.
މި މުބާރާތުގައި ޝާޔާ އާއި ނާއިކް ވެސް ވަނީ އާ ރެކޯޑުތަކެއް ގާއިމުކޮށްފައެވެ. އެގޮތުން ޝޮޓްޕުޓް އުކުމުގެ ގައުމީ ރެކޯޑް ޝާޔާ އާކުރީ 10.20 މީޓަރު ދުރަށް އެއްލައިގެންނެވެ. މިއީ މިދިޔަ އަހަރު އޭނާ ހެދި 9.80 މީޓަރުގެ ރެކޯޑަށްވުރެ ބޮޑު ކުރިއެރުމެކެވެ. މީގެ އިތުރުން ޑިސްކަސް އުކުމުން ވެސް ޝާޔާ ވަނީ ރަން މެޑަލް ހޯދައިފައެވެ.
ފިރިހެން އެންމެ މޮޅު އެތުލީޓުގެ މަގާމު ހޯދި ނާއިކް ވަނީ، އޭނާ އަތުގައި އޮތް ހައި ޖަމްޕްގެ ގައުމީ ރެކޯޑް އަނެއްކާ ވެސް އާކޮށްފައެވެ. މިދިޔަ އަހަރު 1.88 މީޓަރު މަތިން ފުންމައިގެން 16 އަހަރުވީ ރެކޯޑް މުގުރާލި ނާއިކް، މި ފަހަރުގެ މުބާރާތުގައި ވަނީ 1.91 މީޓަރު މަތިން ފުންމައި އާ ރެކޯޑެއް ހަދައިފައެވެ. މީގެ އިތުރުން، ޓްރިޕަލް ޖަމްޕުން ރިހި މެޑަލް އަދި ލޯންގް ޖަމްޕުން ލޯ މެޑަލް ވެސް އޭނާ ކާމިޔާބުކުރިއެވެ. ޓްރިޕަލް ޖަމްޕުން އެއްވަނަ ހޯދީ 12.68 މީޓަރަށް ފުންމި މުހައްމަދު ޖައިލަމް ވަލީދެވެ. ދެވަނައިގައި ނާއިކް 12.25 މީޓަރަށް ފުންމިއިރު، ތިންވަނަ ހޯދި ޢީސާ ޝަފީޢު ފުންމާފައިވަނީ 12.10 މީޓަރަށެވެ.
ރާއްޖޭގެ އެންމެ ބާރު ދުވުންތެރިޔާ ޙަސަން ސާއިދު ވެސް ވަނީ މި މުބާރާތުގައި އާދަޔާ ހިލާފު މޮޅު ކުޅުމެއް ދައްކާފައެވެ. އޭނާ ވަނީ 100 މީޓަރު، 200 މީޓަރު އަދި 400 މީޓަރު ދުވުމުން އެއްވަނަ ހޯދައި، ތިން ރަން މެޑަލް ކާމިޔާބުކޮށްފައެވެ. އަންހެން 1500 މީޓަރު ދުވުމާއި 800 މީޓަރު ދުވުން ފަސޫހާ އަޙުމަދު ކާމިޔާބުކުރި އިރު، ފިރިހެން 1500 އަދި 800 މީޓަރު ކާމިޔާބުކުރީ ޙުސައިން ރިޒާއެވެ.
މި އަހަރު އަންހެން އަދި ފިރިހެން އެއްވަނަ ކްލަބްގެ ގޮތުގައި ހޮވިފައިވަނީ ދިވެހި ސިފައިންގެ ކްލަބެވެ.
