ދިވެހިރާއްޖޭގެ މަސްވެރިކަމުގެ ސިނާއަތުގެ ގާބިލުކަން އިތުރުކުރުމަށް ސަރުކާރުން ފަށާފައިވާ މަސް ރައްކާކުރެވޭ މިންވަރު އިތުރުކުރުމުގެ ބޮޑު މަޝްރޫއުގެ މަސައްކަތްތައް 2027 ވަނަ އަހަރުގެ ކުރިން ނިމޭނެ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ހާމަކޮށްފިއެވެ.
ދައުލަތުގެ މީޑިޔާ، ޕީއެސްއެމްއަށް ދެއްވި ބަސްދީގަތުމެއްގައި އެ ވުޒާރާގެ ސްޓޭޓް މިނިސްޓަރު މުހައްމަދު މުއްތަލިބު ވިދާޅުވީ، މަސްވެރިންނަށް މިހާރު އެކަށީގެންވާ ރަނގަޅު އަގެއް ލިބުމުގައި ކުރިމަތިވާ އެންމެ ބޮޑު ގޮންޖެހުމަކީ މަސް ރައްކާކުރުމުގެ ގާބިލުކަން ނެތުން ކަމަށެވެ. މީގެ ސަބަބުން ބާޒާރުގައި މަސް ގަންނަ އަގަކަށް މަސް ވިއްކަން މަޖުބޫރުވާ ކަމަށާއި، ނަމަވެސް އާ ފެސިލިޓީތަކާއެކު ބާޒާރުގައި އަގު އުފުލެންދެން މަސް ރައްކާކޮށްފައި ބެހެއްޓުމުގެ ފުރުސަތު ލިބޭނެ ކަމަށް އޭނާ ފާހަގަކުރެއްވިއެވެ.
”މިހާރު މި ލިބޭ މަސްކޮޅު، އެންމެ އަވަހަށް ގަންނަ ބަޔަކަށް ވިއްކާލަން މަޖުބޫރުވޭ. އެއީ މޫސުމީ މަސްވެރިކަމުގައި އެ ރައްކާކުރެވޭނެ ޖާގައެއް ނެތުން. ނަމަވެސް މި ފެސިލިޓީތަކާއެކު ވާދަވެރިކޮށް، އެންމެ ބޮޑު އަގެއް ދޭ ބަޔަކަށް ވިއްކޭނެ ފުރުޞަތު ލިބޭނެ. މީގެސަބަބުން މަހުގެ އަގަށް ރަނގަޅު ބަދަލެއް އައިސް މަސްވެރިންނަށް ރަނގަޅު އަގެއް ދޭން މަގުފަހިވާނެ،“ ސްޓޭޓް މިނިސްޓަރު ވިދާޅުވިއެވެ.
މި ސަރުކާރު ވެރިކަމާ ހަވާލުވިއިރު ރާއްޖޭގައި މަސް ގަނޑުކޮށް ރައްކާކުރެވެނީ 9،500 ޓަނަށެވެ. ނަމަވެސް ސަރުކާރުގެ އަމާޒަކީ މި އަދަދު 25،000 ޓަނަށް އިތުރުކުރުމެވެ. މި އަމާޒަށް ވާސިލުވުމަށް ކުރެވޭ މަސައްކަތްތަކުގެ ތަފްސީލް ދެއްވަމުން މުއްތަލިބު ވިދާޅުވީ:
ތިނަދޫ ސިޓީ: 1,000 ޓަނުގެ ފެސިލިޓީ – މި އަހަރުގެ ފަހު ކުއާޓަރަށް ނިމޭނެ.
މ. މުލަކު: ކޯލްޑް ސްޓޮރޭޖް – އަންނަ ޑިސެންބަރު 10 އަށް ނިމޭނެ.
ކޫއްޑޫ އާއި ފެލިވަރު: ކޮންމެ ރަށެއްގައި 4,000 ޓަނުގެ ފެސިލިޓީ.
ގދ. ފިޔޯރީ: 3,000 ޓަނުގެ ކޯލްޑް ސްޓޮރޭޖް.
ފ. ނިލަންދޫ: 1,500 ޓަނުގެ ކޯލްޑް ސްޓޮރޭޖް.
ފުނައްޑޫ: 1,300 ޓަނުގެ މަސް ރައްކާކުރެވޭނެ މަރުކަޒެއް.
ސްޓޭޓް މިނިސްޓަރު ސިފަކުރެއްވި ގޮތުގައި މަސް ރައްކާކުރުމުގެ ގާބިލުކަން އިތުރުވުމަކީ މަސްވެރިކަމުގެ ސިނާއަތަށް މިހާތަނަށް ގެނެވޭނެ އެންމެ ބޮޑު ހެޔޮ ބަދަލެވެ. މީގެ އިތުރުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ދަނީ މަހަށް އިތުރު އަގު ހޯދައިދިނުމަށްޓަކައި، ދުވާލެއްގެ މައްޗަށް ދަޅުގައި ބަންދުކުރެވޭ މަހުގެ އަދަދު އިތުރުކުރުމުގެ މުހިއްމު މަޝްރޫއުތަކެއްވެސް ހިންގަމުންނެވެ.
