މަސްވެރިކަމުގެ ސިނާއަތުގައި އުޅޭ މަސްވެރިންގެ އަދަދު މަދުވީ، ނިމިދިޔަ އެމްޑީޕީ ސަރުކާރުގައި ފެނަކަ ފަދަ ކުންފުނިތަކުން ވަޒީފާ ދިނުމުން ކަމަށާއި، ނަމަވެސް މިހާރު އެ ސިނާއަތަށް ހެޔޮ ބަދަލުތަކެއް އަންނަމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުން ސިލްސިލާކޮށް ގެނެސްދޭ ”ދަ ޕަލްސް“ ޕްރޮގްރާމްގައި މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ކުރަމުން އަންނަ މަސައްކަތްތަކާ ގުޅޭގޮތުން މައުލޫމާތު ދެއްވަމުން ރައީސް މުޢިއްޒު ވިދާޅުވީ، މަސްވެރިންގެ އަދަދު މަދުވެފައިވާކަން ފާހަގަކުރެވުނު ނަމަވެސް އެކަމާ ގުޅޭ ސަރވޭއެއް ކުރެވިފައިނުވާ ކަމަށެވެ. މިކަން ދެނެގަތުމަށް ކުރިއަށް އޮތް ދެ މަހެއްހައި ދުވަހުގެ ތެރޭގައި ސަރވޭއެއް ކުރަން ނިންމާފައިވާ ކަމަށް އެމަނިކުފާނު ވިދާޅުވިއެވެ.
”ވަރަށް ފަސޭހަ އާމްދަނީއެއް އެއީ ރަށުގައި ހުރެގެން ގޭގައި ހުރެގެން ހެޔޮވަރުގެ މުސާރައެއް ލިބޭ ކަމަށް ވަންޏާ ވަރަށް ފަސޭހަވާނެ އެ ގޮތް ހިޔާރުކުރަން. އެހެންވެ މިދިޔަ ސަރުކާރުގެ ތެރޭގައި ފެނަކައަށް ހާއްސަކޮށް ވަރަށް ބައިވަރު އެތައް ހާސް ބަޔަކު ވެއްދި. ވެއްދިއިރު މި ވެއްދީ މަސްވެރިކަމުގެ ސިނާއަތުގައި ތިބި އެތައް ބައެއް.“ – ރައީސް މުޢިއްޒު ވިދާޅުވިއެވެ.
މީގެ ކުރިއާ އަޅާބަލާއިރު އަތޮޅުތެރޭގެ ރަށްރަށުގައި މަސްދޯނިތައް މަދުވެއްޖެކަން ފާހަގަކުރައްވައި ރައީސް މުޢިއްޒު ވިދާޅުވީ، މި ސަރުކާރުން އަބަދު ވެސް މަސައްކަތް ކުރާނީ ކަންކަން ރަނގަޅު ކުރެވޭތޯ ކަމަށެވެ. އެގޮތުން ފެނަކަ ފަދަ ކުންފުނިތައް ރައިޓް ސައިޒް ކުރަމުން އަންނަނީ މިފަދަ ސަބަބުތަކަށްޓަކައިކަން އެމަނިކުފާނު ވަނީ ވިދާޅުވެފައެވެ.
”އޭރުން މަސްވެރިކަމުގެ ސިނާއަތަށް ޒުވާނުން އިތުރުވެގެންދާނެ. އަދި އެހެން ޕްރައިވެޓް ސެކްޓަރގައި މަސައްކަތް ކުރާނެ ޒުވާނުން ލިބިގެންދާނެ. ހަގީގަތުގައި ސަރުކާރުގެ އެސްއޯއީތަކުގެ ތެރެއިން ހުރިހާ ޒުވާނުންނާ ނޫނީ ހުރިހާ ރައްޔިތުން މިހެން ވަޒީފާ ދީފައި ހިފަހައްޓާފައި ހުރުމުގެ ސަބަބުން އިގުތިސާދު ފުޅަލެއް ނުވޭ. އޭގެ ސަަބަބުން އުފެއްދުންތެރިކަން އިތުރެއް ނުވޭ.“ – ރައީސް ވިދާޅުވިއެވެ.
ރައީސް މުޢިއްޒު އިތުރަށް ވިދާޅުވީ، މިކަންކަން ރަނގަޅު ކުރުމުގެ މަސައްކަތް ކުރަނީ ވަށައިޖެހޭ އިގުތިސާދީ ސިޔާސަތެއްގެ ތެރެއިން ކަމަށާއި، އެކަމުގެ ހެޔޮ ނަތީޖާ މަސްވެރިކަމާއި އެހެން ބައެއް ސިނާއަތްތަކަށް ކުރާނެ ކަމަށެވެ.
