ރާއްޖޭގެ އެކި ކަންކޮޅުތަކުގައި ބޯހިޔާވަހިކަމުގެ އިތުރު މަޝްރޫއުތައް ފެށުމަށް ސަރުކާރުން ތައްޔާރުވަމުން އަންނަ ކަމަށް ހައުސިންގ މިނިސްޓްރީން ހާމަކޮށްފިއެވެ.
ދައުލަތުގެ މީޑިއާ (ޕީއެސްއެމް) އިން ގެނެސްދޭ ރާއްޖެ މިއަދު ޕްރޮގްރާމުގައި ވާހަކަދައްކަވަމުން ހައުސިންގ މިނިސްޓްރީގެ ސްޓޭޓް މިނިސްޓަރު އަޙްމަދު ނާޒިމް މުޙައްމަދު ވިދާޅުވީ، އަތޮޅުތެރޭގެ ރަށްރަށުގައި ހިންގުމަށް ހަމަޖެހިފައިވާ ބޯހިޔާވަހިކަމުގެ އިތުރު މަޝްރޫއުތައް، ކުރިއަށް އޮތް މަހެއްހައި ދުވަހުގެ ތެރޭގައި އިފްތިތާހްކުރުމަށް ހަމަޖެހިފައިވާކަމަށެވެ.
ހައުސިންގ މިނިސްޓްރީން މަޝްރޫއުތައް ހިންގުމަށް ނިންމާފައިވަނީ ދެ މޮޑެލްއަކަށެވެ. އެގޮތުން އަގުހެޔޮކޮށް ބޯހިޔާވަހިކަމަށް އެދި ކުރިމަތިލެވޭނެހެން ތަރައްގީކުރާ އެފޯރޑަބަލް ހައުސިންގއާއި މާލީ އިދާރާތަކުގެ ފައިނޭންސިންއަށް ކުރިމަތިލެވޭނެ ނިޒާމެއް ގާއިމުކޮށް އަމިއްލަ ގޯތީގައި ގެދޮރުބިނާކުރުމުގެ ސްކީމްތަކެއް މީގެތެރޭގައި ހިމެނެއެވެ.
އަތޮޅުތެރޭގެ ރަށްރަށުގައި ބޯހިޔާވަހިކަމުގެ މަޝްރޫއުތައް ފެށުމަކީ، އަމިއްލަ ބޯހިޔާވަހިކަމެއް ނެތް ފަރާތްތަކަށް އަމާޒުކޮށްގެން ސަރުކާރުން ފަށަން ނިންމާފަައިވާ މަޝްރޫއުތަކެކެވެ. މި މަޝްރޫއުތަކުގެ ދަށުން އެކަށީގެންވާ އަގެއްގައި ފެންވަރު ރަނގަޅު ބޯހިޔާވަހިކަން ކޮންމެ ރައްޔިތަކަށް ވެސް ފޯރުކޮށްދެވޭނެއެވެ.
މި ދައުރު ނިމުމުގެ ކުރިން ދިވެހި ކޮންމެ ރައްޔިތަކީ ވެސް އަމިއްލަ ބޯހިޔާވަހިކަމެއް ލިބިފައިވާ މީހަކަށް ހެދުމަކީ މި ސަރުކާރުން ވަރަށް ބޮޑު އިސްކަމެއްދީގެން ކުރަމުން އަންނަ މަސައްކަތެއްކަން ފާހަގަކޮށްލަންޖެހެއެވެ.
