2026 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތުގައި އީރާނުގެ ގައުމީ ޓީމަށް ދަތުރުފަތުރުގެ ދަތިތަކާ ކުރިމަތިލާން ޖެހިފައިވާތީ، އެ މައްސަލަ ދުނިޔޭގެ ފުޓްބޯޅައިގެ މައި އިދާރާ (ފީފާ) އަށް ހުށަހެޅުމަށް އީރާނުން ނިންމައިފިއެވެ.
އީރާނުގެ ފުޓްބޯޅަ ފެޑެރޭޝަނުން ބުރާސްފަތި ދުވަހު ހާމަކުރި ގޮތުގައި، އުތުރު އެމެރިކާގައި ބާއްވާ މި މުބާރާތުގެ އިންތިޒާމުކުރާ ފަރާތްތަކުން އީރާނު ޓީމަށް ދަތިވާނެހެން ހަރުކަށި ފިޔަވަޅުތަކެއް އަޅަމުންދެއެވެ. މިކަމުގެ ސަބަބުން ޓީމުގެ ފަންނީ މުވައްޒަފުން ރާވާފައިވާ ތަމްރީނުތަކާއި ތައްޔާރީތަކަށް ބޮޑެތި ހުރަސްތަކެއް ކުރިމަތިވަމުންދާ ކަމަށް އެ ފެޑެރޭޝަނުން ބުނެއެވެ.
މި މައްސަލަ ބޮޑުވެފައިވަނީ އަންނަ އާދީއްތަ ދުވަހު ލޮސް އެންޖެލިސްގައި ބެލްޖިއަމާ ދެކޮޅަށް ކުޅޭ މެޗަށް ތައްޔާރުވުމަށް، މެކްސިކޯގެ ޓިޖުއާނާގައި ހުރި އީރާނުގެ ބޭސް ކޭމްޕުން އެމެރިކާއަށް ދިއުމަށް އެދުނު އެދުމަށް އިންތިޒާމުކުރާ ފަރާތްތަކުން ދެކޮޅު ހެދުމުންނެވެ. އީރާނުން އެދުނީ މެޗުގެ ދެ ދުވަސް ކުރިން އެމެރިކާއަށް ދިއުމަށެވެ. އެއީ މެޗު ކުޅޭ ތަނުގެ މާހައުލަށް ކުޅުންތެރިން ހޭނުމަށާއި، ފަހު ތަމްރީނުތައް ފުރިހަމަކުރުމަށް ވަގުތު ހޯދުމުގެ ބޭނުމުގައެވެ. ނަމަވެސް، އެމެރިކާގެ އޮފިޝަލުން އަންގާފައިވަނީ އީރާނު ޓީމަށް އެމެރިކާއަށް ވަދެވޭނީ މެޗުގެ އެއްދުވަސް ކުރިން ކަމަށެވެ.
ވައިޓް ހައުސްގެ ފީފާ ޓާސްކް ފޯސްގެ އެގްޒެކެޓިވް ޑިރެކްޓަރު އެންޑްރޫ ގިއުލިއާނީ ވިދާޅުވީ، އީރާނަށް އެމެރިކާއަށް ވަދެވޭނީ މެޗު އޮންނަ ދުވަހުގެ ކުރީ ދުވަހު ކަމަށާއި، މެޗު ނިމޭތާ މަދު ގަޑިއިރުތަކެއްގެ ތެރޭގައި އެ ގައުމުން ފުރަން ޖެހޭނެ ކަމަށެވެ. މި އުސޫލު ޖޫން 26 ގައި ސިއެޓްލްގައި މިޞްރާ ދެކޮޅަށް އީރާނު ކުޅޭ މެޗުގައިވެސް ހިފަހައްޓާނެ ކަމަށް އޭނާ ވިދާޅުވިއެވެ.
މިދިޔަ ހޯމަ ދުވަހު ނިއުޒީލޭންޑާ ދެކޮޅަށް ކުޅުނު ފުރަތަމަ މެޗަށްފަހުވެސް، އީރާނު ޓީމަށް ވަނީ ހޮޓަލުގައި އަރާމުކޮށްލުމުގެ ފުރުސަތު ނުދީ، މެޗު ނިމުނުތާ ކުޑަވަގުތުކޮޅެއްގެ ތެރޭގައި އެމެރިކާއިން ފުރުވާލާފައެވެ.
މި މައްސަލައަކީ ސިޔާސީ ގޮތުން މަސްރަހު ގޯސްވެފައިވާ ދަނޑިވަޅެއްގައި ހިނގަމުންދާ ކަމަކަށްވާއިރު، އީރާނުން ތުހުމަތުކުރާ ގޮތުގައި މިއީ އެ ގައުމުގެ ޓީމަށް ގަސްތުގައި ކުރިމަތިކުރުވާ ދަތިތަކެކެވެ. އީރާނު ހިމެނެނީ މުބާރާތުގެ ގްރޫޕް ’ޖީ‘ ގައެވެ.
