އިސްރާއީލާއި ލުބުނާނުގެ ހިޒްބުﷲ ޖަމާއަތާ ދެމެދު ކުރިއަށްދާ ހަނގުރާމަ ހުއްޓާލުމުގެ އައު އެއްބަސްވުމަކަށް ދެފަރާތުން އައިސްފައިވާ ކަމަށް އެމެރިކާގެ އިސް އޮފިޝަލަކާ ހަވާލާދީ ރޮއިޓާސް އިން ރިޕޯޓުކޮށްފިއެވެ. މި އެއްބަސްވުމަށް އާދެވުނު ނަމަވެސް، އިސްރާއީލުން ލުބުނާނުގެ ދެކުނުގެ ސަރަހައްދުތަކަށް ދެމުންދާ ހަމަލާތައް އަދިވެސް ދަނީ ކުރިއަށެވެ. މިއަދު އެކަނިވެސް އިސްރާއީލުގެ ހަމަލާތަކުގައި 47 މީހުން ޝަހީދުވެފައިވާ ކަމަށް ރިޕޯޓުތައް ބުނެއެވެ.
އިސްރާއީލުން ލުބުނާނަށް ދެމުންދާ ހަމަލާތަކާ ގުޅިގެން އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވަނީ އެކަން ވަރަށް ބޮޑަށް ކުށްވެރިކުރައްވާފައެވެ. އޭނާ ވިދާޅުވީ އިސްރާއީލުން ހަނގުރާމަ ކުރިއަށްގެންދިއުމަކީ އޭގެ ނަތީޖާ ވަރަށް ހިތިވާނެ ކަމެއް ކަމަށެވެ. މީގެ އިތުރުން، އެމެރިކާއާއި އީރާނާ ދެމެދު ސްވިޒަލޭންޑުގައި ބޭއްވުމަށް ހަމަޖެހިފައިވާ ބައްދަލުވުން ފަސްކުރެވިފައިވާ ކަމަށާއި، ކުރިއަށް އޮތް ދުވަސްތަކުގައި އެ ބައްދަލުވުން ބޭއްވޭނެ ކަމަށް އީރާނުން ބުނެއެވެ.
މި އެއްބަސްވުމާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ބުނީ އީރާނުން މި އެއްބަސްވުމަށް އައީ ”ގޮތް ހުސްވެގެން“ ކަމަށެވެ. އަދި އީރާނަށް އެމެރިކާގެ ފަރާތުން އެއްވެސް ފައިސާއެއް ނުލިބޭނެ ކަމަށްވެސް ޓްރަމްޕް ބުނެފައިވެއެވެ. މީގެ އިތުރުން، އީރާނުން އެއްބަސްވުމަށް އަމަލުކުރުމަށް 60 ދުވަހުގެ މުހުލަތެއް ދީފައިވާ ކަމަށާއި، އެހެން ނޫންނަމަ ހަރުކަށި ފިޔަވަޅު އަޅާނެ ކަމުގެ އިންޒާރު ޓްރަމްޕް ވަނީ ދެއްވާފައެވެ.
އިސްރާއީލުގެ މަސްރަހަށް ބަލާއިރު، އެމެރިކާއާއެކު އޮތް ގުޅުމަށް ބުރޫއަރާފައިވާތީ އިސްރާއީލުގެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. އަދި ބޮޑުވަޒީރު ބެންޖަމިން ނަތަންޔާހޫއަށް އޮތް ތާއީދު ކުޑަވެ، އިސްރާއީލުގެ %58 ރައްޔިތުން ގަބޫލުކުރާ ގޮތުގައި އޭނާ މަގާމުން ވަކިވާންޖެހެއެވެ. ސަބަބަކީ އީރާނާއި ލުބުނާނާ ގުޅޭގޮތުން އޭނާ ވީ ވައުދުތައް ފުއްދިފައި ނުވުމެވެ.
ލުބުނާނުގެ ސަރުކާރުން ބުނަމުންދަނީ އެ ގައުމުގެ މިނިވަންކަމާއި ސިޔާދަތު ރައްކާތެރިކުރުމަށްޓަކައި ސީދާ އިސްރާއީލާއެކު ވާހަކަދައްކަން ބޭނުންވާ ކަމަށެވެ. މިގޮތުން އަންނަ ހަފުތާގައި ވޮޝިންޓަންގައި ލުބުނާނާއި އިސްރާއީލުގެ މަންދޫބުން ބައްދަލުކުރުމަށް ވަނީ ހަމަޖެހިފައެވެ.
މީގެ އިތުރުން، ފަލަސްތީނުގެ އިރުމަތީ ގުދުސްގައި ހުރި ގްރީކް އޮތޮޑޮކްސް ޗާޗުގެ ބިންތަކެއް އިސްރާއީލުން ގަދަކަމުން އަތުލާފައިވާތީ، ފަލަސްތީނުގެ ފޮރިން މިނިސްޓްރީން ވަނީ އެކަން ކުށްވެރިކޮށް ބައިނަލްއަގުވާމީ މުޖުތަމައުގެ އެހީތެރިކަމަށް އެދިފައެވެ.
