ގައުމިއްޔަތަށް ލޯބިކުރާ، ޒިންމާދާރު ޒުވާން ޖީލެއް ބިނާކުރުމަށް ސަރުކާރުން ކުރިއަށްގެންދާ ”ދިވެހި ވަތަނީ ހިދުމަތުގެ ފަންނީ ތަމްރީނު“ (ނޭޝަނަލް ސަރވިސް ސްކިލްސް ޓްރޭނިންގ) ޕްރޮގްރާމްގެ ދެވަނަ ކޯސް ރަސްމީކޮށް މިއަދު ފަށައިފިއެވެ.
ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުހައްމަދު މުއިއްޒުގެ އިސްނަންގަވައިގެން ކުރިއަށްގެންދާ މި ޕްރޮގްރާމްގެ ދެވަނަ ބުރު އިފްތިތާހް ކުރުމަށް މިއަދު ބޭއްވި ރަސްމިއްޔާތު އޮތީ ބ. ކިހާދޫގައި ހުންނަ އެމްއެންޑީއެފް ސަރވިސް ކޯރގެ، ސްކޫލު އޮފް އިންޖިނިއަރިންގ އެންޑް ލޮޖިސްޓިކްސްގައެވެ.
މި ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ.
މި ޕްރޮގްރާމަކީ ޒުވާނުންނަކީ ނަފުސާނީ ގޮތުންނާއި ޖިސްމާނީ ގޮތުން ދުޅަހެޔޮ، އަހުލާގީ ގޮތުން ހަރުދަނާ، އަދި ފަންނީ ހުނަރުވެރި ބަޔަކަށް ހެދުމުގެ މަގްސަދުގައި ކުރިއަށްގެންދާ ޕްރޮގްރާމެކެވެ. ސަރުކާރުގެ އަމާޒަކީ އިހުލާސްތެރި އަދި އަބުރުވެރި، މުޖުތަމަޢަށް ބޭނުންތެރި ޒުވާނުންތަކެއް މި ތަމްރީނުތަކުގެ ތެރެއިން ބިނާކުރުމެވެ.
މި މަހުގެ 3 ވަނަ ދުވަހުން ފެށިގެން ތަމްރީނަށް ރިޕޯޓްކޮށްފައިވާ މި ކޯހުގެ ދެވަނަ ސީރީޒްގައި ރާއްޖޭގެ 17 އަތޮޅަކުން ޖުމްލަ 75 ބައިވެރިން ބައިވެރިވެއެވެ. އޭގެ ތެރޭގައި ހިމެނެނީ 62 ފިރިހެން ބައިވެރިންނާއި 13 އަންހެން ބައިވެރިންނެވެ.
ޖުމްލަ 16 ހަފުތާ ނުވަތަ ހަތަރު މަސްދުވަހުގެ މުއްދަތަށް ކުރިއަށްގެންދާ މި ތަމްރީނު ޕްރޮގްރާމްގައި އަމަލީ ގިނަ ހުނަރުތަކެއް އުނގަންނައިދިނުމަށް ވަނީ ހަމަޖެހިފައެވެ. އޭގެ ތެރޭގައި އޮޓޯ މޯބައިލް ،އިންޖިނިއަރިންގ .އަދި މެރިން އިންޖިނިއަރިންގ
އިލެކްޓްރީޝަން ،އަދި ރެފްރިޖެރޭޝަން މަސައްކަތް ވެލްޑިންގ ،އަދި މެޓަލް ފެބްރިކޭޝަން އޮފީސް މެނޭޖުމަންޓް ދާއިރާ ހިމެނެއެވެ.
މި ކޯސް ފުރިހަމަކުރާ ދަރިވަރުންނަށް މޯލްޑިވްސް ކޮލިފިކޭޝަން އޮތޯރިޓީ (MQA) އިން ޤަބޫލުކުރާ ލެވެލް 3 ގެ ސެޓިފިކެޓެއް ލިބޭނެއެވެ. މި ޕްރޮގްރާމްގައި ކިޔަވައިދެއްވަނީ އެކި ފަންނީ ދާއިރާތަކުން އަމަލީ ތަޖުރިބާ ހޯއްދަވާފައިވާ ސިފައިންގެ ތަޖުރިބާކާރު އިންސްޓްރަކްޓަރުންނެވެ.
މިއަދުގެ ރަސްމިއްޔާތުގައި ކޯހުގެ މުދައްރިބުންނަށް ވައުދު ލައިދިނުމާއި ދަރިވަރުންގެ އަޒުމް އައުކުރުން ވެސް އޮތެވެ. މުދައްރިބުންނަށް ވައުދު ލައިދެއްވީ ކެޕްޓަން މުހައްމަދު ޝަރީފެވެ. އަދި ދަރިވަރުންގެ އަޒުމް އައުކޮށްދެއްވީ މޭޖަރ ހުސައިން ޝާހިދެވެ. މި ރަސްމިއްޔާތުގައި އެމްއެންޑީއެފްގެ އިސް އޮފިސަރުންނާއި ދަރިވަރުން ބައިވެރިވެފައިވެއެވެ.
