2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް ’ކޭ‘ ގައި ކޮލަމްބިއާ އާއި އުޒްބަކިސްތާން ބައްދަލުކުރި ފޯރިގަދަ މެޗު 3-1 ގެ ނަތީޖާއަކުން ކޮލަމްބިއާ ކާމިޔާބުކޮށްފިއެވެ.
މެޗުގެ ފުރަތަމަ ހާފުގައި ކޮލަމްބިއާއިން ގިނަ ހަމަލާތަކެއް އުފެއްދިއެވެ. މެޗުގެ 40 ވަނަ މިނެޓުގައި ކޮލަމްބިއާއަށް ލީޑު ނަގައިދިނީ ޑެނިއަލް މުނޯޒްއެވެ. މިއީ ލުއިސް ޑިއާޒް ތަނަވަސްކޮށްދިން ފުރުސަތަކުން އޭނާ ކާމިޔާބުކުރި ލަނޑެކެވެ. 80،000 އަށްވުރެ ގިނަ ސަޕޯޓަރުންގެ ކުރިމަތީގައި ކުޅުނު މި މެޗުގެ ފުރަތަމަ ހާފު ނިމުނީ 1-0 އިން ކޮލަމްބިއާ ކުރީގައި އޮވެގެންނެވެ.
ވޯލްޑް ކަޕްގައި އަލަށް ވާދަކުރާ އުޒްބަކިސްތާނުން ދެވަނަ ހާފުގައި ކުޅުން ރަނގަޅުކޮށް، މެޗުގެ 60 ވަނަ މިނެޓުގައި ނަތީޖާ އެއްވަރުކުރިއެވެ. މި ލަނޑު އެގައުމަށް ކާމިޔާބުކޮށްދިނީ އައްބޮސްބެކް ފައިޒުއްލައޭވްއެވެ. މިއީ ވޯލްޑް ކަޕްގެ ތާރީޚުގައި އުޒްބަކިސްތާނުން ޖެހި ފުރަތަމަ ލަނޑެވެ.
އުޒްބަކިސްތާނުން ނަތީޖާ އެއްވަރުކުރިތާ ފަސް މިނެޓު ފަހުން، 65 ވަނަ މިނެޓުގައި ލުއިސް ޑިއާޒް ވަނީ ލަނޑެއް ޖަހައި އަލުން ކޮލަމްބިއާއަށް ލީޑު ހޯދައިދީފައެވެ. އަދި މެޗުގެ އިތުރު ވަގުތުގެ 9 ވަނަ މިނެޓުގައި ޖަމިންޓަން ކަމްޕާޒް ވަނީ ކޮލަމްބިއާގެ ތިންވަނަ ލަނޑު ޖަހައި މެޗުން އެގައުމު މޮޅުވިކަން ކަށަވަރުކޮށްދީފައެވެ.
އިޓަލީގެ ކުރީގެ މަޝްހޫރު ކުޅުންތެރިޔާ ފަބިއޯ ކަނަވާރޯގެ އިރުޝާދުގެ ދަށުން ކުޅުނު އުޒްބަކިސްތާނުން މެޗުގެ ފަހުވަގުތު ނަތީޖާ އެއްވަރުކުރުމަށް ގިނަ މަސައްކަތްތަކެއް ކުރިއެވެ. ނަމަވެސް ކޮލަމްބިއާގެ ވަރުގަދަ ޑިފެންސުން ވަނީ އެ ހަމަލާތައް ހުއްޓުވާފައެވެ.
މި މެޗުން މޮޅުވުމާއެކު ކޮލަމްބިއާއަށް ވަނީ ތިން ޕޮއިންޓް ލިބިފައެވެ. މުބާރާތުގެ ދެވަނަ މެޗުގައި އަންނަ އަންގާރަ ދުވަހު ކޮލަމްބިއާ ނުކުންނާނީ ޑީ.އާރު ކޮންގޯއާ ދެކޮޅަށެވެ. ހަމަ އެ ދުވަހު އުޒްބަކިސްތާން ބައްދަލުކުރާނީ ޕޯޗުގަލްއާއެވެ.
