ކަނޑުމަގުން ރާއްޖެ އެތެރެކުރި މުދާ ޝިޕްމަންޓެއްގެ ތެރޭގައި ފޮރުވައިގެން ގެނައި 5,600 އަށްވުރެ ގިނަ ވޭޕް ކާޓްރިޖް މޯލްޑިވްސް ކަސްޓަމްސް ސަރވިސްއިން އަތުލައިގަނެފިއެވެ. މި މައްސަލައާ ގުޅިގެން ކުރީގެ ރައީސް އިބްރާހީމް މުޙައްމަދު ޞާލިޙާއި، ކުރީގެ ފަސްޓްލޭޑީ ފަޒްނާ އަޙްމަދަށް ބޮޑެތި ތުހުމަތުތަކެއް ވަނީ އަމާޒުވެފައެވެ.
މި މުދާ ޝިޕްމަންޓަކީ ކުރީގެ ފަސްޓްލޭޑީ ފަޒްނާ އަޙްމަދާއި، އެކަމަނާގެ ބައްޕަ ސިއްކަ އަޙްމަދު އިސްމާޢީލް މަނިކު އަދި އާއިލީ އެހެން މެންބަރުންގެ މަސްލަހަތު އޮންނަ ”ޕޭން އޯޝަން އިންޓަރނޭޝަނަލް ޕްރައިވެޓް ލިމިޓެޑް“ އިން އެތެރެކުރި މުދާ ކަމަށް ކަސްޓަމްސް އިން ވަނީ މައުލޫމާތު ދެއްވާފައެވެ. އެހެން ނަމަވެސް ފުލުހުންގެ ރަސްމީ ބަހެއް މިކަމުގައި އަދި ލިބިފައި ނުވެއެވެ.
ކަސްޓަމްސްއިން ބުނި ގޮތުގައި، މިދިޔަ ޖޫން މަހުގެ 17 ވީ ބުދަ ދުވަހު މާލޭ ކޮމާޝަލް ހާބަރުގައި ހިންގި ޚާއްސަ އޮޕަރޭޝަނަކީ، ރާއްޖެ ގެނައި ޝިޕްމަންޓެއްގައި ޤާނޫނާ ޚިލާފު ތަކެތި ހުރެދާނެކަމަށް ބެލެވިގެން ހިންގި އޮޕަރޭޝަނެކެވެ. ”ޖެނެރަލް ކާގޯ“ ގެ ގޮތުގައި ޑިކްލެއަރ ކޮށްފައިވާ މި ޝިޕްމަންޓް ބަލައި ފާސްކުރިއިރު، އޭގެ ތެރޭގައި ފޮރުވާފައި ހުރި 5,600 ވޭޕް ކާޓްރިޖް ވަނީ ފެނިފައެވެ.
ކަނޑުމަގުން ރާއްޖެ ގެނައި މުދާ ޝިޕްމެންޓެއްގައި ޤާނޫނާ ގަވާއިދާ ޚިލާފް ތަކެތި ހުރެދާނެކަމަށް ކަސްޓަމްސްއަށް ބެލެވިގެން، ޖޫން 17 ވަނަ ދުވަހު، މާލޭ ކޮމާޝަލް ހާބަރުގައި،ޚާއްސަ އޮޕަރޭޝަނެއް ވަނީ ހިންގިފައި. pic.twitter.com/H95bC8p0D5
— Maldives Customs Service (@CustomsMv) June 18, 2026
މި މައްސަލައާ ގުޅިގެން ސޯޝަލް މީޑިއާގައި ގިނަ ބައެއްގެ ފާޑުކިޔުން ވަނީ ކުރީގެ ރައީސްގެ ދެކަނބަލުންނަށް އަމާޒުވެފައެވެ. ގިނަ ބަޔަކު ތުހުމަތު ކުރާ ގޮތުގައި، އަމިއްލަ މާލީ މަންފާއަށްޓަކައި ޤާނޫނާ ޚިލާފު ކަންކަން ކުރުމަކީ އެ އާއިލާގެ އާދައެކެވެ. އަދި ދައުލަތުގެ އެންމެ މަތީ މަގާމުތަކުގައި ތިއްބެވިއިރުވެސް، އާއިލީ ވިޔަފާރިތަކުން މިފަދަ ނޭދެވޭ އަމަލުތައް ހިންގާފައިވާކަން މި ހާދިސާއިން ހާމަވާކަމަށް އާންމުން ދަނީ ބުނަމުންނެވެ.
5,000 illegal vapes intercepted by Maldives Customs, linked to Pan Ocean International Pvt Ltd, owned by former First Lady Fazna Ahmed, her father Sikka, and other family members. For them, principles end where financial interests begin. Born criminals living as thieves. What a… pic.twitter.com/Dh018TwVWm
— Zahid Rameez (@xahidcreator) June 18, 2026
މީގެ އިތުރުން، މި މަހުގެ 14 އަދި 15 ވަނަ ދުވަހު މާލޭ ކޮމާޝަލް ހާބަރުގައި ހިންގި އެހެން އޮޕަރޭޝަންތަކެއްގައިވެސް 1,108 ވޭޕް ކާޓްރިޖާއި 27 ވޭޕް ޑިވައިސް ވަނީ އަތުލައިގަނެފައެވެ.
މި މައްސަލަ ކަސްޓަމްސްއިން އިތުރަށް ތަޙުޤީޤު ކުރަމުންދާއިރު، މިކަމުގައި ޝާމިލްވާ ފަރާތްތަކާމެދު ޤާނޫނީ ފިޔަވަޅު އެޅުމަށް ގިނަ ބަޔަކު ދަނީ ގޮވާލަމުންނެވެ. މިހާތަނަށް މިކަމާ ގުޅޭގޮތުން ކުރީގެ ރައީސް ޞާލިޙުގެ ފަރާތްޕުޅުން ނުވަތަ ފަޒްނާ އަޙްމަދުގެ ފަރާތްޕުޅުން ރަސްމީ ބަހެއް ލިބިފައެއް ނުވެއެވެ.
