ގދ. ތިނަދޫގައި ހުންނަ ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) ގެ ކެމްޕަސް އިތުރަށް ތަރައްގީކުރުމަށް ސަރުކާރުން ކުރިއަށްގެންދާ މުހިންމު މަޝްރޫއުގެ މަސައްކަތްތައް ބާރުދުވެލީގައި ކުރިއަށްދާކަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.
މި މަޝްރޫއުގެ އެންމެ ފަހުގެ މައުލޫމާތު ހިއްސާކުރަމުން އެމްޓީސީސީން ބުނީ، މިހާރު ކުރިއަށްދަނީ މުވައްޒަފުންގެ އެކަމޮޑޭޝަން އިމާރާތުގެ ފުރަތަމަ ފަންގިފިލާގެ ބީމްތަކާއި ސްލެބްތަކުގެ ދަގަނޑު އެޅުމާއި ފޯމްވޯކްގެ މަސައްކަތްތައް ކަމަށެވެ.
ތިން ފިޔަވައްސަކަށް ބަހާލައިގެން ކުރިއަށްގެންދާ މި ބިޔަ މަޝްރޫއުގެ ދަށުން، ދަރިވަރުންނާއި މުވައްޒަފުންނަށް ބޭނުންވާ ޒަމާނީ ފެންވަރުގެ އެކަމޮޑޭޝަން ވަސީލަތްތައް ގާއިމުކުރުމަށް ވަނީ ހަމަޖެހިފައެވެ. އެގޮތުން މި މަޝްރޫއުގެ ތެރޭގައި ތިން ފަންގިފިލާގެ އެކަޑަމިކް އިމާރާތަކާއި، ދަރިވަރުންނާއި މުވައްޒަފުންނަށް ވަކިވަކިން ހާއްސަކޮށްފައިވާ ދެ ފަންގިފިލާގެ ދެ އެކަމޮޑޭޝަން ބްލޮކް ބިނާކުރުން ހިމެނެއެވެ.
Project Update: Construction of MNU Staff Accomodation Building at the MNU Gdh. Thinadhoo
First floor beams, slabs rebar and form works are ongoing.
Follow more updates at: https://t.co/SfVAzkW2pp #MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/grEf1NFujP
— MTCC Plc (@MTCCPlc) June 18, 2026
އެމްޓީސީސީން ހާމަކޮށްފައިވާ ތަފްސީލުތަކަށް ބަލާއިރު، ދަރިވަރުންގެ އެކަމޮޑޭޝަން ބްލޮކްގައި 31 ކޮޓަރިއާއި ލޯންޑްރީގެ ހިދުމަތް ހިމެނޭނެއެވެ. އަދި މުވައްޒަފުންގެ ބްލޮކްގައި ހަތް ކޮޓަރިއާއި ކެފޭއެއް ގާއިމުކުރުމަށް ވަނީ ނިންމާފައެވެ.
މި މަޝްރޫއަކީ ތިނަދޫ ކެމްޕަސް ފުޅާކޮށް، އެ ތަނަކީ ޒަމާނީ ފެންވަރުގެ ތައުލީމީ މާހައުލަކަށް ހެދުމަށް ކުރިއަށްގެންދާ މަސައްކަތެކެވެ. މީގެ ސަބަބުން ދަރިވަރުންނާއި މުވައްޒަފުންނަށް ބޭނުންވާ ތައުލީމީ އަދި ބޯހިޔާވަހިކަމުގެ ވަސީލަތްތައް ފަސޭހަކަމާއެކު ލިބިގެންދާނެއެވެ.
