އާއްމު ތަންތަނުގައި އުޅޭއިރު އިސްލާމްދީނާ ފުށުނާރާނެހެން ހެދުން އެޅުމަށް ށ. ކަނޑިތީމު ކައުންސިލުން މިއަދު އިލްތިމާސްކޮށްފިއެވެ.
މިކަމާ ގުޅިގެން ކަނޑިތީމު ކައުންސިލުން މީސް މީޑިއާގައި ހިއްސާކޮށްފައިވާ ޕޯސްޓެއްގައި ބުނެފައިވަނީ، އެ ރަށަކީ އިސްލާމީ މަތިވެރި އުސޫލުތަކާއި ދިވެހިވަންތަ އާދަތަކެއްގެ މައްޗަށް ބިނާވެފައިވާ އެކުވެރި ބަޔަކު ދިރިއުޅޭ މުޖުތަމައެއް ކަމަށެވެ.
އެހެންކަމުން ކަނޑިތީމުގެ މަގުތަކާއި އާންމު ތަންތަނުގައި އުޅޭއިރު އިސްލާމްދީނާއި ސަގާފީ މިންގަނޑުތަކަށް ފުށުނާރާނެ އަދަބުވެރި ހެދުން އެޅުމަށް އިލްތިމާސްކުރާ ކަމަށް އެ ރަށު ކައުންސިލުން ވަނީ އެދިފައެވެ.
ފުޅާ ދާއިރާއެއްގައި ލޯކަލް ޓޫރިޒަމްގެ ވިޔަފާރިކުރާ ރަށްރަށުގައި އިސްލާމްދީނާއި ދިވެހި ސަގާފަތާ އެއްގޮތަށް ހެދުން އަޅަން ފަތުރުވެރިންނަށް އަންގައި، ކައުންސިލްތަކުން ނޯޓިސް ހަރުކޮށްފައި ހުންނަ ނަމަވެސް، އިސްލާމްދީނާއި ދިވެހި ސަގާފަތާ ނުގުޅޭ ގޮތަށް އާންމު ތަންތަނުގައި ހެދުން އަޅައިގެން ފަތުރުވެރިން އުޅޭކަން ފާހަގަކޮށްލަންޖެހެއެވެ.
