ފަލަސްތީނުގެ ބިންތަކުގައި ޔަހޫދީން ހިންގަމުންދާ ނިރުބަވެރި އަމަލުތަކަށް އެބައިމީހުން ޖަވާބުދާރީކުރުވުމަށް ބައިނަލްއަގުވާމީ މުޖުތަމައަށް ދިވެހިރާއްޖެއިން މިއަދު ގޮވާލައިފިއެވެ.
އދ. ގެ އިންސާނީ ހައްގުތަކާ ބެހޭ މަޖިލީހުގެ 62 ވަނަ ސެޝަނުގެ ތެރެއިން، ފަލަސްތީނުގެ މައްސަލަތައް ދިރާސާކުރާ މިނިވަން ބައިނަލްއަގުވާމީ ”ކޮމިޝަން އޮފް އިންކުއަރީ“ އާއެކު ބޭއްވުނު މުހިންމު ބަހުސްގައި، ދިވެހިރާއްޖޭގެ ފަރާތުން މިކަމާ ގުޅޭ ބަޔާން އިއްވަވައިދެއްވީ ޖެނީވާގައި ހުންނަވާ ރާއްޖޭގެ ދާއިމީ މަންދޫބު، ސަފީރު ޑރ. ސަލްމާ ރަޝީދެވެ.
މި ބަޔާނުގައި، ޔަހޫދީންގެ އިސްތިއުމާރީ ބާރުތަކުން ފަލަސްތީނުގެ ކުށެއްނެތް ރައްޔިތުންނާ ދެކޮޅަށް ހިންގަމުންދާ ލާއިންސާނީ އަސްކަރީ އުދުވާންތަކާއި، އިންސާނީ އެހީ ފޯރުކޮށްދިނުމަށް އެ ފަރާތުން ކުރިމަތިކުރާ ހުރަސްތައް ދިވެހި ސަރުކާރުގެ ނަމުގައި އެންމެ ހަރުކަށި އިބާރާތުން ކުށްވެރިކޮށްފައިވެއެެވެ.
ހަމައެއާއެކު، ބައިނަލްއަގުވާމީ ގާނޫނުތަކާއި އިންސާނީ ހައްގުތަކާ ބެހޭ މުއާހަދާތަކަށް ޔަހޫދީ ދައުލަތުން ފުރިހަމައަށް ބޯލެނބުމަށާއި، އާންމު ރައްޔިތުންނާއި އާންމުން ދިރިއުޅޭ ތަންތަނަށް ރައްކާތެރިކަން ކަށަވަރުކޮށްދިނުމަށް ރާއްޖެއިން ވަނީ ގޮވާލައިފައެވެ. މީގެ އިތުރުން، އެއްވެސް ހުރަހެއް ނެތި، ރައްކާތެރިކަމާއެކު ދެމެހެއްޓެނިވި ގޮތެއްގައި އިންސާނީ އެހީ ފޯރުކޮށްދެވޭނެ އިންތިޒާމުތައް ހަމަޖައްސައިދިނުމަށް ވެސް ރާއްޖޭގެ ބަޔާނުގައި ވަނީ ބާރުއަޅައިފައެވެ.
ޔަހޫދީ ދައުލަތުން ބައިނަލްއަގުވާމީ ގާނޫނުތަކާ ކަނޑައެޅިގެން ހިލާފުވަމުންދާއިރު، އެއްވެސް ޒިންމާދާރުކުރުވުމެއް ނެތި އަމަލުކުރުމުގެ ސަގާފަތް ނިމުމަކަށް ގެނެސް، ޖަވާބުދާރީކުރުވުމަށް ބައިނަލްއަގުވާމީ މުޖުތަމައުން ގުޅިގެން މަސައްކަތް ކުރަންޖެހޭ ކަމަށް ރާއްޖޭގެ ބަޔާނުގައި ވަނީ ފާހަގަކޮށްފައެވެ.
ފަލަސްތީނުގެ މައްސަލައަށް އިންސާފުވެރި، ދެމެހެއްޓެނިވި އަދި ސުލްހަވެރި ހައްލެއް ހޯދުމަށް މަގުފަހިވާނެ މާހައުލެއް ބިނާކުރުމަށް ގޮވާލާ ގޮވާލުން ތަކުރާރުކުރަމުން ރާއްޖެއިން ވަނީ ފަލަސްތީނުގެ ރައްޔިތުންނަށް ލިބިގެންވާ އަމިއްލަ އިހުތިޔާރުގައި ގޮތް ނިންމުމުގެ ހައްގަށް ފުރިހަމައަށް އިހުތިރާމްކުރުމަށް ވެސް ގޮވާލައިފައެވެ.
ބަޔާން ނިންމާލަމުން، ޔަހޫދީންގެ ޣައިރު ގާނޫނީ އަމަލުތައް ވަގުތުން ހުއްޓާލުމަށާއި، 1967 ވަނަ އަހަރުގެ ބޯޑަރުތަކުގެ މައްޗަށް ބިނާވެފައިވާ، އިރުމަތީ ގުދުސްއަކީ ވެރިރަށް ކަމުގައި ކަނޑައެޅިފައިވާ، މިނިވަން އަދި މުސްތަގިއްލު ފަލަސްތީނުގެ ދައުލަތެއް ގާއިމުކުރުމަށް ކުރާ މަސައްކަތުގައި، ރާއްޖެއިން އަބަދުވެސް ސާބިތުކަންމަތީ ދެމިއޮންނާނެކަމުގެ ފުރިހަމަ ޔަގީންކަން ވަނީ ދީފައެވެ.
