ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ އާ ރައީސް މުޙައްމަދު ނިޒާރަށް ރުހުން ހޯއްދެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވި މައްސަލަ ދިރާސާކުރުމަށްޓަކައި، މަޖިލީހުގެ އެސްއޯއީ ކޮމިޓީއަށް ފޮނުވައިފިއެވެ.
ޕީސީބީގެ އެންމެ އިސްވެރިޔާގެ މަގާމަށް ނިޒާރު އައްޔަންކުރެއްވީ މި އަހަރުގެ އޭޕްރީލް މަހުގެ 30 ވަނަ ދުވަހުއެވެ. ނިޒާރު އެ މަގާމަށް އައްޔަންކުރެއްވީ އެ މަގާމުގައި ކުރިން ހުންނެވި މުޙައްމަދު އަނަސް މަގާމުން އިސްތިއުފާ ދެއްވުމާ ގުޅިގެންނެވެ. ގާނޫނީ އޮނިގަނޑު ހަމަޖެހިފައިވާ ގޮތުން، ޕީސީބީގެ ރައީސް ކަމަށް އައްޔަންކުރައްވާ ބޭފުޅަކަށް ރައްޔިތުންގެ މަޖިލީހުގެ ރުހުން ހޯދަންޖެހޭތީ އެކަމަށް އެދިވަޑައިގެން ރައީސް މުޢިއްޒު ވަނީ މަޖިލީހަށް ސިޓީފުޅެއް ފޮނުއްވައިފައެވެ.
ފާހަގަކޮށްލެވޭ ގޮތުގައި މިއީ ޕީސީބީގެ އެންމެ މަތީ އިސްވެރިޔާގެ މަގާމު ނިޒާރު އަދާކުރައްވާ ފުރަތަމަ ފަހަރެއް ނޫނެވެ. އޭނާ ވަނީ މީގެ ކުރިން 2014 ވަނަ އަހަރުން ފެށިގެން 2019 ވަނަ އަހަރާއި ހަމައަށް މި މަގާމު ފުރުއްވައި، ސަރުކާރުގެ ކުންފުނިތަކުގެ ހިންގުން ހަރުދަނާކޮށް ގަވަރނަންސް އޮނިގަނޑުތައް އެކުލަވާލުމުގައި ވަރަށް މުހިއްމު ދައުރެއް އަދާކުރައްވައިފައެވެ.
މީގެ އިތުރުން އޭނާ ވަނީ، ދައުލަތުގެ ކުންފުނިތައް މޮނިޓަރކުރުމާއި، ބައިނަލްއަގުވާމީ ވިޔަފާރީގެ ރޮނގުން ތިރީސް އަހަރަށްވުރެ ދިގު މުއްދަތެއްގެ ފަންނީ ތަޖުރިބާ ވެސް ހާސިލުކުރައްވައިފައެވެ.
އަދި ހަމައެހެންމެ، ތައުލީމީ ރޮނގުން ވެސް ނިޒާރަކީ ފާހަގަކޮށްލެވޭ ބޭފުޅެކެވެ. އެގޮތުން އޭނާ ވަނީ އޮސްޓްރޭލިއާގެ ޔުނިވަރސިޓީ އޮފް ސައުތު އޮސްޓްރޭލިއާއިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ (އެމްބީއޭ) ފުރިހަމަކުރައްވައިފައެވެެ. މީގެ އިތުރުން ކޯޕަރޭޓް ގަވަރނަންސްއާއި ގުޅޭ ބައިނަލްއަގުވާމީ ގިނަ ފޯރަމްތަކާއި މަތީ ފަންތީގެ ތަމްރީނުތަކުގައި ވެސް އޭނާ ބައިވެރިވެވަޑައިގެންފައިވެއެވެ.
