މާލޭ ސަރަހައްދުގެ ދަތުރުފަތުރުގެ ނިޒާމު ހަރުދަނާކުރުމަށް ސަރުކާރުން ފަށާފައިވާ ”މާލެ ޓެކްސީ“ ލައިންގެ ހިދުމަތް ވިލިމާލޭގައި ފެށުމަށް ތައްޔާރުވެފައިވާ ކަމަށް މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
މާލެ ޓެކްސީ ލައިންގެ ހިދުމަތް ވިލިމާލޭގައި ފެށުމަށްޓަކައި ވަމުންއަންނަ އެންމެފަހުގެ ތައްޔާރީތައް ބައްލަވާލެއްވުމަށް އެމްޓީސީސީގެ މެނޭޖިންގ ޑިރެކްޓަރު އަޙްމަދު ސަޢުދީ އާއި ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުޙައްމަދު އިސްމާޢީލް ވަނީ ވިލިމާލެއަށް ވަޑައިގެންފައެވެ. މި ޒިޔާރަތުގައި ދެ ބޭފުޅުން ވަނީ ހިދުމަތް ފެށުމަށް ބޭނުންވާ އިންތިޒާމުތަކާއި، ވިލިމާލޭގެ މަގުތަކުގައި ދަތުރުފަތުރު ކުރުމަށް ހުރި ފުރުސަތުތަކާ ގުޅޭގޮތުން މަޝްވަރާކުރައްވައިފައެވެ.
”މާލެ ޓެކްސީ“ ގެ ނަމުގައި އެމްޓީސީސީން ޓެކްސީގެ ހިދުމަތް ފަށާފައިވަނީ މި އަހަރުގެ ފެބްރުއަރީ މަހުގެ ތެރޭގައެވެ. ހިދުމަތް ތައާރަފުކުރުމަށްފަހު ދުވަސްކޮޅަކަށް ރައްޔިތުންނަށް ހިލޭ ދަތުރުކުރުމުގެ ފުރުސަތު ދިނުމަށްފަހު، ފެބްރުއަރީ މަހުގެ 18 ވަނަ ދުވަހުން ފެށިގެން ދަތުރުތަކަށް އަގު ނަގަން ވަނީ ފަށައިފައެވެ.
ޖުމުލަ 150 ކާރާއެކު ފެށި މި ހިދުމަތަކީ 24 ގަޑިއިރު ދެމުން އަންނަ ހިދުމަތެކެވެ.
ސަރުކާރުން އަންނަނީ ޓެކްސީގެ ހިދުމަތް މިހާރަށްވުރެ ބޮޑަށް ފުޅާކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މާލެ ޓެކްސީގެ ނަމުގައި މޯބައިލް ފޯނު އެޕްލިކޭޝަނެއް ތައާރަފްކޮށްފައިވާއިރު، ރާއްޖޭގެ ދެވަނައަށް އެންމެ ބޮޑު ސިޓީ ކަމަށްވާ އައްޑޫ ސިޓީގައި ވެސް މި ހިދުމަތް ފެށުމަށް ވަނީ ނިންމައިފައެވެ.
