އެމެރިކާއާއި އީރާނާ ދެމެދު ޤާއިމުކުރި ސުލްޙައިގެ އެއްބަސްވުމަށް ކުޑަކޮށްވެސް ބޯނުލަނބާނެކަން ހާމަކޮށް، އިޒްރޭލުގެ ޓެރަރިސްޓް އަސްކަރިއްޔާއިން މިއަދު ދެކުނު ލުބުނާނުގެ ތިން ކާރަކަށް އަމާޒުކޮށް ނުރައްކާތެރި ޑްރޯން ޙަމަލާތަކެއް ދީފިއެވެ. ލުބުނާނުގެ ރަސްމީ ނިއުސް އެޖެންސީ (އެންއެންއޭ) އިން ކަށަވަރުކޮށްދޭ ގޮތުގައި، މި ރަހުމްކުޑަ ޙަމަލާތަކުގައި މަދުވެގެން 4 އާންމުން ވަނީ ޤަތުލުވެ، އެތައް ބަޔަކު ޒަޚަމްވެފައެވެ.
މި ޙަމަލާއަކީ ލުބުނާނުގެ ބިންތަކުން ނުފައިބާނެ ކަމަށާއި، އެ ސަރަޙައްދުތަކުން މީހުން ހުސްކުރާނެ ކަމަށް ބުނެ އިޒްރޭލުގެ ދިފާޢީ ވަޒީރު އިސްރޭލް ކާޓްޒް އިއްޔެ އިޢުލާންކުރި ހަރުކަށި އަނިޔާވެރި ސިޔާސަތު ތަންފީޛުކުރުމުގެ ގޮތުން ދިން ފުރަތަމަ ހަމަލާއެވެ.
ޙަމަލާގެ ރަހުމްކުޑަ ތަފްޞީލާއި ހުޅަނގުގެ މުނާފިޤުކަން
މައިފަދޫންގެ ”ޑަބަލް-ޓެޕް“ ޙަމަލާ: އިޒްރޭލުގެ ޓެރަރިސްޓް އުސޫލުތައް އެންމެ ބޮޑަށް ފެނުނީ މައިފަދޫން އަވަށުންނެވެ. އިޒްރޭލުގެ ޑްރޯނަކުން ފުރަތަމަ ބޮންއެޅީ އާންމުންގެ ކާރަކަށެވެ. އެއަށްފަހު، އަވަށުގެ ރައްޔިތުންނާއި މީހުން ސަލާމަތްކުރާ ފަރާތްތަކުން އެހީތެރިވުމަށް އެ ސަރަޙައްދަށް އެއްވި ވަގުތު، ޑްރޯނުން ވަނީ ދެވަނަ މިސައިލެއް ސީދާ އެއްވެފައި ތިބި މީހުންގެ މެދަށް ފޮނުވާލާފައެވެ. މިއީ މީހުން މަރަން އިޒްރޭލުން ބޭނުންކުރާ ވަރަށް ނުރައްކާތެރި ”ޑަބަލް-ޓެޕް“ އުސޫލެކެވެ.
ޝައުކިންގެ ޙަމަލާ: މީގެ އިތުރުން، އޭގެ ކައިރީގައި އޮންނަތާ ޝައުކިން ރަށުން ދަތުރުކުރި އެހެން ކާރަކަށް ޑްރޯނުން ދިން ޙަމަލާއެއްގައި، ކާރުގައި ތިބި އަނެއް ދެމީހުން ވަނީ ދިރިތިއްބާ އަނދާ އަޅިޔަށް ހަދާފައެވެ.
