ފެން ބިލުގެ ފައިސާ މަހުން މަހަށް ދައްކާ ހަލާސްކުރެވޭނެ އިންތިޒާމް މާލެ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އިން ހަމަޖައްސައިފިއެވެ.
އާންމު ރައްޔިތުންގެ މާލީ ހާލަތު ރަނގަޅު ކުރުމަށްޓަކައި ސަރުކާރުން ކުރަމުން އަންނަ މަސައްކަތްތަކުގެ ތެރެއިން، ގޭބިސީތަކުގެ ފެން ބިލާއި ކަރަންޓު ބިލު ނުދެއްކި ގިނަ ދުވަސްވެގެން އަރާފައިވާ ޖޫރިމަނާ ފައިސާ މާފުކޮށްދިނުމަށް މި މަހުގެ 24 ވަނަ ދުވަހު ވަނީ ނިންމާފައެވެ.
ސަރުކާރުގެ މި ނިންމުމާ ގުޅިގެން، އެމްޑަބްލިއުއެސްސީން ބުރާސްފަތި ދުވަހު ބުނީ އެ ކުންފުނީގެ ޑޮމެސްޓިކް ކަސްޓަމަރުންގެ ބިލުތަކަށް މިދިޔަ ޑިސެމްބަރު މަހުގެ ނިޔަލަށް އަރާފައިވާ ޖޫރިމަނާ މާފުކޮށްދެވޭނެ ކަމަށެވެ. މިގޮތުން ޖޫރިމަނާ މާފުކޮށްދެވޭނީ ޖޫރިމަނާ ނިސްބަތްވާ ބިލުތަކަށް
ދައްކަން ޖެހޭ ޖުމްލަ ފައިސާ އަންނަ މަހުގެ ފުރަތަމަ ދުވަހުން ފެށިގެން މި އަހަރުގެ ޑިސެމްބަރު މަހުގެ 31 ވަނަ ދުވަހާ ދެމެދު އެއްކޮށް ދައްކާ ހަލާސްކުރާ ކަސްޓަމަރުންނަށް ކަމަށް އެ ކުންފުނިން ބުނެއެވެ.
އެމްޑަބްލިއުއެސްސީން ބުނެފައި ވަނީ އެއްބަސްވުމެއްގެ ދަށުން އެ ބިލުތަކަށް މަހުން މަހަށް ބަހާލައިގެން ފައިސާ ދައްކާ ހަލާސްކުރުމަށް އެދޭ ކަސްޓަމަރުންނަށް އެ އިންތިޒާމު ހަމަޖައްސައިދޭނެ ކަމަށެވެ. މަހުން މަހަށް ބަހާލައިގެން ފައިސާ ދައްކާ ކަސްޓަމަރުންނަށް ޖޫރިމަނާ މާފުކޮށްދެވޭނީ އެއްބަސްވުމާ އެއްގޮތަށް ފައިސާ ދައްކާ ހަލާސްކުރުމުން ކަމަށް ވެސް އެމްޑަބްލިއުއެސްސީން ބުނެއެވެ.
އެމްޑަބްލިއުއެސްސީން ބުނި ގޮތުގައި އެ ކުންފުނީގެ ކަސްޓަމަރ ކެއަރ ސެންޓަރުގެ ހޮޓްލައިން 105 އަށް ގުޅުމުން ނުވަތަ 1050 އަށް އެސްއެމްއެސްއެއް ފޮނުވުމުން ނުވަތަ mail@mwsc.com.mv އަށް އީ-މެއިލް ކުރުމުން މި ކަމުގައި އެހީތެރިކަން ލިބޭނެ ކަމުގައެވެ.
ނުދެއްކި ގިނަ ދުވަސްވެގެން ޖޫރިމަނާ އަރާފައިވާ ބިލުތަކަށް ފައިސާ ދައްކާ ހަލާސްކުރުމަށް މި ފުރުސަތުގެ ބޭނުން ހިފުމަށާއި ގަވާއިދުން ބިލުތަކަށް ފައިސާ ދައްކަމުން ގެންދިއުމަށް އެ ކުންފުނީގެ ހުރިހާ ކަސްޓަމަރުންނަށް އެމްޑަބްލިއުއެސްސީން ވަނީ އިލްތިމާސްކޮށްފައެވެ.
