ނިމިދިޔަ އެމްޑީޕީ ވެރިކަމުގައި، ސަރުކާރަށް ސަނާ ނުކިޔާތީ އެތައް ސަތޭކަ މުވައްޒަފުން ވަޒީފާއިން ވަކިކޮށްފައިވާ ކަމަށް ރައްޔިތުންގެ މަޖިލީހުގެ ބާރަށު ދާއިރާ ތަމްސީލުކުރައްވާ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު މިއަދު ވިދާޅުވެއްޖެއެވެ.
ޝުޖާއު މި މޭރުމުން ވިދާޅުވީ، މި ސަރުކާރުން އިދިކޮޅު އެމްޑީޕީއަށް ތާއީދުކުރާ އެތައް ބަޔަކު ވަޒީފާއިން ވަކިކުރަމުންދާ ކަމަށް ބުނެ ކުރީގެ ރައީސް މުޙައްމަދު ނަޝީދު ދައްކަވަމުން ގެންދަވާ ވާހަކަތަކަށް ރައްދުދެއްވައި މީސް މީޑިއާގައި ހިއްސާކުރެއްވި ޕޯސްޓެއްގައެވެ. ޝުޖާއު ވިދާޅުވީ، އެމްޑީޕީގެ ވެރިކަމުގައި އެތައް ސަތޭކަ މުވައްޒަފުން ޕީޕީއެމް/ޕީއެންސީ ފިކުރަށް ތާއީދުކުރީތީ ވަޒީފާއިން ވަކިކުރިކަން ރައީސް ނަޝީދަށް އެނގިވަޑައިގަންނަވަންޖެހޭނެ ކަމަށެވެ.
MDP ކޮންމެވެސް ވަރަކަށް ލަދުހަޔާތް ހުންނަންވާނެ.ރައީސް ނަޝީދަށް އެގެންވާނެ އެމަނިކުފާނުގެ ޕާޓީގެ ވެރިކަމުގައި އެތައް ސަތޭކަ މުވައްޒަފުން އަޅުގަނޑުމެންގެ ފިކުރު ވީމާ ވަޒީފާއިން ވަކިކުރިކަން.ސަރުކާރަށް ސަނާނުކިޔާތީ ވަޒީފާއިން ވަކިކުރި އެތައް މުވައްޒަފުން އެމުވައްޒަފުންގެ ވަޒީފާއިން… https://t.co/w2vxmE3O2c
— Ibrahim Shujau (@IbrahimShujaau) June 16, 2026
ސަރުކާރަށް ސަނާ ނުކިޔާތީ ވަޒީފާއިން ވަކިކުރި އެތައް މުވައްޒަފުން، އެ މުވައްޒަފުންގެ ވަޒީފާއިން ވަކިކުރި ޗިޓްތައް މިހާރު ވެސް ގޭގެ ސިޓިންގރޫމް ފާރުތަކުގައި ބަހައްޓާފައި އެބަހުރިކަން ފާހަގަކުރައްވައި ޝުޖާއު ވިދާޅުވީ ޕީޕީއެމް/ޕީއެންސީ ފިކުރަށް ތާއީދުކުރީތީ އެ ދުވަސްވަރު ވަޒީފާއިން ވަކިކުރި ފަރާތްތަކުގެ ދަފްތަރު ވެސް އަދިވެސް އެބައޮތް ކަމަށެވެ.
”ސަރުކާރަށް ސަނާ ނުކިޔާތީ ވަޒީފާއިން ވަކިކުރި އެތައް މުވައްޒަފުން އެ މުވައްޒަފުންގެ ވަޒީފާއިން ވަކި ކުރި ޗިޓްތައް މިހާރު ވެސް އެ ބޭފުޅުންގެ ގޭގެ ސިޓިންގރޫމް ފާރުތަކުގައި ބެހެއްޓިފައި އެބަހުރި. ގޮސް ބައްލަވާލައްވާ. އެ ދަފްތަރު އަޅުގަނޑުމެން އަތުގައި އެބަ އޮތް،“ – ޝުޖާއު ވިދާޅުވިއެވެ.
ޝުޖާއު ވިދާޅުވީ، އެ މުވައްޒަފުންގެ ހައްގު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަނބުރާ އެ މުވައްޒަފުންނަށް ދެއްވާފައިވާ ކަމަށާއި، އެއީ ބޮޑު ބަދަލު ކަމަށެވެ. އަދި މި ސަރުކާރުން ސިޔާސީ ގޮތުން ހިޔާލު ތަފާތުވެގެން އެއްވެސް މުވައްޒަފަކު ވަޒީފާއިން ވަކިކޮށްފައިނުވާ ކަމަށް ވެސް ޝުޖާއު ވަނީ ވިދާޅުވެފައެވެ.
ޝުޖާއު މި މޭރުމުން ވިދާޅުވެފައިވާއިރު، މި ސަރުކާރުން އެމްޑީޕީއަށް ތާއީދުކުރާ އެތައް ބަޔަކު ވަޒީފާއިން ވަކިކުރަމުންދާ ކަމަށް ބުނެ ކުރީގެ ރައީސް ނަޝީދު އިސްވެ ހުންނަވައި، ގައުމުގެ އަމާންކަން ނަގައިލުމަށާއި ހަމަޖެހުން ގަޑުބަޑުކޮށްލުމަށް އަންނަ ބުރާސްފަތި ދުވަހު މަގުމައްޗަށް ނުކުމެ ހަމަނުޖެހުން ހިންގުމަށް މިހާރު އަންނަނީ ތައްޔާރުވަމުންނެވެ.
