ކުޅިވަރު ކުޅޭ ހުރިހާ ސަރަހައްދެއްގައި ވެސް ނަމާދު ވަގުތު ޖެހުމާއެކު 20 މިނެޓަށް ކުޅިވަރު ހަރަކާތްތައް މަޑުޖައްސާލުމަށް ސްޕޯޓްސް މިނިސްޓްރީން ގައުމީ ކުޅިވަރު އެސޯސިއޭޝަންތަކަށް އަންގައިފިއެވެ.
މިދިޔަ އާދީއްތަ ދުވަހު ސްޕޯޓްސް މިނިސްޓްރީން ކުޅިވަރު އެސޯސިއޭޝަންތަކަށް ފޮނުވި ސަރކިއުލަރއެއްގައި ބުނެފައިވަނީ، ކުޅިވަރު ކުޅޭ ސަރަހައްދުތަކުގައި، ނަމާދަށް ބަންގި ގޮވުމާއެކު 20 މިނިޓަށް ހުރިހާ ކުޅިވަރު ހަރަކާތެއް މަޑުޖައްސާލައި، އެކަން ތަންފީޒުކުރުމަކީ މި ސަރުކާރުގެ ސިޔާސަތެއް ކަމަށެވެ. އެހެންކަމުން ކުޅިވަރު އެސޯސިއޭޝަންތަކުން އެ އުސޫލާ އެއްގޮތަށް އަމަލުކުރުމަށް އެ ސާކިއުލާގައި ވަނީ އެދިފައެވެ.
ސްޕޯޓްސް މިނިސްޓްރީގެ ސަރކިއުލަރގައި ބުނެފައިވަނީ ކްލަބްތަކާއި އެކަޑަމީތަކާއި އަމިއްލަ ފަރާތްތަކުން ކުރިއަށް ގެންދާ ހަރަކާތްތައް ވެސް މީގެ ތެރޭގައި ހިމެނޭ ކަމަށެވެ.
ނަމާދު ވަގުތުތަކާ ދިމާކޮށް ކުޅިވަރު ނުކުޅޭވޭ ގޮތް ހެދުމަށް ގަވާއިދުތަކެއް ހެދުމުގެ މަސައްކަތް ފައްޓަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރެއްވީ މި މަހުގެ ފުރަތަމަ ދުވަހުއެވެ. ރައީސް ވިދާޅުވީ ދިވެހިންނަކީ އިސްލާމްދީނާއި ގާނޫނުއަސާސީގެ ހަމަތަކުގެ މަތިން ކަންކަން ބައްޓަންކުރާ ބައެއް ކަމަށެވެ.
ނަމާދު ވަގުތު ނިމިގެންދާއިރު ވެސް ކުޅިވަރު ކުޅުމުގައި ތިބުމަކީ އެންމެ ރަނގަޅު ގޮތް ނޫންކަން ފާހަގަކުރައްވަމުން ރައީސް ވިދާޅުވީ، ގަސްތުގައި ނޫނަސް ކަންކަން މިހާރު ހިނގަމުން އަންނަ ގޮތަކީ އެއީ ކަމަށެވެ. އަދި އެކަމާ ނުހަނު ހިތާމަކުރައްވާ ކަމަށްވެސް އެމަނިކުފާނު ވިދާޅުވިއެވެ. ރައީސް ވިދާޅުވީ، ބަންގި ގޮވާ ވަގުތުން ފެށިގެން ކަނޑައެޅޭ ވަކި ވަގުތުކޮޅަކަށް ހުރިހާ ކުޅިވަރުތަކެއް މެދުކަނޑާލުމަށް ގެންނަންޖެހޭ ބައެއް ބަދަލުތައް ގެންނަވާނެ ކަމަށެވެ.
ރައީސް އިތުރަށް ވިދާޅުވީ، ސަރުކާރުން އަޅާ ސްޕޯޓްސް ކޮމްޕްލެކްސްތަކާއި އިމާރާތްތަކާއި ކުޅިވަރު ކުޅޭ މައިދާން، އެކުވެނި ފަދަ ތަންތަނުގައި ވުޟޫކޮށް ނަމާދުކުރެވޭނޭހެން ފެސިލިޓީތައް ގާއިމުކުރެވިގެންދާނެ ކަމަށެވެ. އަދި އެ މަސައްކަތްތައް ކުރުމަށް ވާންޖެހޭ އެންމެފަހުގެ ތައްޔާރީތައް ވުމަށްޓަކައި ކުރަންޖެހޭ މަޝްވަރާތައް ކުރަމުން އަންނަ ކަމަށްވެސް އެމަނިކުފާނު ވިދާޅުވިއެވެ.
