މޯލްޑިވްސް ކަރެކްޝަނަލް ސަރވިސްއިން ބަލަހައްޓަމުން އަންނަ މާފުށީ ޖަލުގައި އަލަށް ބެހެއްޓި ބެގެޖް ސްކްރީނިންގ މެޝިން ބޭނުންކުރަން ފަށައިފިއެވެ.
އިއްޔެ ބޭއްވި ރަސްމިއްޔާތެއްގައި މިކަން އިފްތިތާހުކޮށް ދެއްވީ ހޯމް މިނިސްޓަރު ޢަލީ އިހްސާނެވެ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހަދިޔާކުރި މި މެޝިނަކީ ޖަލުގެ ސަލާމަތީ ކަންކަން ހަރުދަނާކުރުމަށް ބެހެއްޓުނު މެޝިނެކެވެ. ހަމައެހެންމެ، މިއީ މާފުށީ ޖަލުގައި ބެހެއްޓުނު މިފަދަ ފުރަތަމަ މެޝިންކަން ވެސް ފާހަގަކޮށްލަންޖެހެއެވެ.
ޖަލުތަކުގެ ސެކިއުރިޓީ ހަރުދަނާކުރުމަށް މާފުށީ ޖަލުގައި ބެގެޖް ސްކްރީނިންގ މެޝިނެއް ބޭނުންކުރަން ފަށައިފިhttps://t.co/qgelBbpws9@HomeMinistrymv @CustomsMv @ImmigrationMV @MACLmedia pic.twitter.com/6uv252KaOo
— Maldives Correctional Service (@CorrectionsMv) June 15, 2026
މި މެޝިން ބޭނުންކުރާގޮތުގެ ތަމްރީން އެމްއޭސީއެލްއިން ދޭނެ ކަމަށާއި ބެގެޖް ސްކްރީންކުރުމަށް ބޭނުންވާ ހާއްސަ ތަމްރީން، މޯލްޑިވްސް ކަސްޓަމްސް ސަރވިސްއިން ވަނީ ދޭނެ ކަމަށް ކަރެކްޝަނުން ވަނީ ބުނެފައެވެ.
ކަރެކްޝަނުން އިތުރަށް ބުނެފައިވަނީ، މި މެޝިން މެދުވެރިކޮށް ގައިދީންނާއި ބަންދުގައި ތިބޭ މީހުން ޖަލަށް އަލަށް އަންނައިރު ގެންނަ ތަކެތި، އެ ފަރާތްތަކަށް އާއިލާއިން ފޮނުވާ ތަކެތި އަދި އާއިލީ އާއި އެކަހެރި ބައްދަލުވުންތަކަށް ޖަލަށް ޒިޔާރަތްކުރައްވާ ފަރާތްތަކުގެ ތަކެތި ސްކްރީން ކުރެވިގެންދާނެ ކަމަށެވެ.
ޖަލުތަކަށް މަނާ ތަކެތި ވެއްދުމުގެ މައްސަލައަކީ ހައްލުކުރެވިފައިނުވާ ބޮޑު މައްސަލައެކެވެ. މިގޮތަށް ވައްދާ ތަކެތީގެ ތެރޭގައި ފޯނާއި މަސްތުވާތަކެއްޗާއި އެނޫންވެސް ތަކެތި ވައްދާ އުޅެއެވެ.
