ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ ހިޔާ ޓަވަރުތަކުގެ ތެރެއިން، އެންމެ ޓަވަރެއް ފިޔަވައި ހުރިހާ ޓަވަރުތަކެއްގައި ލިފްޓް ހަރުކޮށް ބޭނުންކުރަން ފަށައިފިއެވެ.
އެންމެފަހުން ލިފްޓު ހަރުކުރީ ހިޔާ ޓަވަރު 13 14 އަދި 15 ގައެވެ. މި ޓަވަރުތަކުގައި އިތުރު ލިފްޓު ހަރުކުރުމުގެ މަސައްކަތް ނިންމައި އާންމުންނަށް މިހާރު ވަނީ ހުޅުވާލައިފައެވެ. އެހެންކަމުން ހިޔާ ޓަވަރު 16 ފިޔަވައި ހުރިހާ ޓަވަރެއްގައި އިތުރު ދެ ލިފްޓު ހަރުކުރުމުގެ މަސައްކަތް މިހާރު މިވަނީ ނިންމާލެވިފައެވެ.
ހިޔާގެ ކޮންމެ ޓަވަރެއްގައި ހަރުކުރި ލިފްޓުތަކަކީ ސްޓްރެޗާ އެރުވޭ ވަރުގެ ޖާގަތަނަވަސް ބޮޑެތި ލިފްޓުތަކެކެވެ. މި ލިފްޓުތަކުގައި 21 މީހުންގެ ޖާގަ ވެސް ހުރެއެވެ.
ހިޔާގެ 25 ފަންގިފިލާގެ 16 ޓަވަރު ތަރައްގީކުރިއިރު ހަރުކޮށްފައި ހުރީ ޖާގަ ތަނަވަސް ލިފްޓުތަކެއް ނޫނެވެ. އަދި ލިފްޓު މަދުވުމުގެ ސަބަބުން ފްލެޓުތަކަށް އަރައި ފޭބުމަށް ދަތިވާކަމުގެ ކަންބޮޑުވުމަކީ އެތަނުގައި ދިރިއުޅޭ ފަރާތްތަކުގެ ވަރަށް ބޮޑު ޝަކުވާއެކެވެ. މި މައްސަލަ ހައްލުކުރުމަށް ކޮންމެ ޓަވަރެއްގައި ޖާގަ ތަނަވަސް އިތުރު ދެ ލިފްޓު ހަރުކުރުމަކީ ރައީސް މުޢިއްޒުގެ ރިޔާސީ ވައުދުފުޅެކެވެ.
ހިޔާގެ ޓަވަރުތަކުގައި ލިފްޓު ހަރުކުރުމުގެ މަސައްކަތް ކުރިއަށް ގެންދަނީ ޗައިނާގެ ޝެންޔެންގް ޔުއަންޑާ އިންޓެލެކްޗުއަލް އިންޑަސްޓްރީ ގްރޫޕް ކޯ ލިމިޓެޑާ ހަވާލުކޮށްގެންނެވެ. މިހާރު ލިފްޓް ހަރުނުކުރެވި ހުރި 16 ވަނަ ޓަވަރުގައި ލިފްޓް ހަރުކުރުމުގެ މަސައްކަތް ވީހާ ވެސް އަވަހަކަށް ނިންމައި އާންމުންނަށް ހުޅުވާލުމަކީ އެ ކުންފުނީގެ އަމާޒެވެ.
