މި ފެށުނު ހިޖުރީ އާ އަހަރަކީ ދިވެހިރާއްޖޭގެ އިސްލާމީ ކަންތައްތަކަށް ފާގަތި އަހަރަކަށް ވެގެންދާނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިނިސްޓަރު ޝަހީމް މީޑިއާތަކަށް ފޮނުއްވި މެސެޖެއްގައި ވިދާޅުވީ، ހިޖުރީ ސަނަތުން 1448 ވަނަ އަހަރު ފެށިގެން ދާއިރު، މި އަހަރަކީ ދިވެހިރާއްޖޭގެ އިސްލާމީ ކަންތައްތަކަށް ފާގަތި އަހަރަކަށް ވެގެންދާނެ ކަމަށެވެ. އެގޮތުން ޒުވާން ހަތީބުންގެ އަދަދު 1،000 އަށް އަދި ހާފިޒުންގެ އަދަދު 350 އަށް ގާތްކުރާނެ ކަމަށެވެ.
ހަމައެހެންމެ ބިޔަ ބޮޑު ވަގުފު ބިނާތައް ނިންމުމުގެ އިތުރުން، ވަގުފު ފަންޑާއި ޒަކާތު ފަންޑު އިތުރުވެ ފަށާފައިވާ އިސްލާމީ މަރުކަޒުތަކުގެ މަސައްކަތް ނިމެންގާތްވާނެ ކަމަށް މިނިސްޓަރު ވަނީ ވިދާޅުވެފައެވެ. މިނިސްޓަރު ވަނީ، ހުޅުމާލެގައި ބިނާކުރެވޭ ބޮޑު މިސްކިތުގެ އަމަލީ މަސައްކަތް ފެށިގެން ދިއުމާއި އަތޮޅުތަކާއި ހުޅުމާލެގައި ބިނާކުރަމުންދާ ދާއިމީ ގިނަ މިސްކިތްތަކެއް ނިމި ހުޅުވިގެން ދިއުމަކީ ވަރަށް ބޮޑަށް އުންމީދު ކުރައްވާ ކަމެއްކަމަށް ވިދާޅުވެފައެވެ.
މިނިސްޓަރު ޝަހީމް ވިދާޅުވީ، މި ނޫނަސް ގިނަ ކުރިއެރުންތަކެއް އިސްލާމީ ދާއިރާއަށް މި އަހަރު ލިބިގެންދާނެ ކަމަށެވެ.
މި ހިނގާ 1448 ވަނަ އަހަރަކީ ރާއްޖެ އިސްލާމީ ހިދާޔަތުގެ ގަބޫލުކުރިތާ 900 އަހަރު ފުރޭ އަހަރު ކަމުން، ކުރިއަށް އޮތް އިސްލާމީ ގަރުނަށް ރާއްޖޭގެ އިސްލާމީ ހަޟާރަތުގެ އަސާސްތައް ވަރުގަދަ ކުރުމުގެ ހަރުދަނާ ބިންގާތަކެއް އެޅިގެންދާނެ އަހަރު ކަމަށާއި އަމާޒަކީ ރާއްޖޭގެ އިސްލާމީ ޝަހްސިއްޔަތު ދަމަހައްޓާނެ ހަރުދަނާ ޖީލަކާއި ވަރުގަދަ އިސްލާމީ އުމްރާނީ ކުރިއެރުން ގެނައުން ކަމަށް މިނިސްޓަރު ޝަހީމް ވަނީ އިތުރަށް ވިދާޅުވެފައެވެ.
