ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެންމެ މަތީ ގުނަވަން ކަމަށްވާ ”މަތީ މަޖްލީސް“ މިއަހަރުގެ ސެޕްޓެމްބަރު މަހު ބޭއްވުމަށް ނިންމައި، އެކަމަށްވާންޖެހޭ ތައްޔާރީތައް ފަށާފައިވާކަން އެ ޕާޓީން ހާމަކޮށްފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޕީއެންސީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، ކޮންގްރެސް ޕާޓީގެ މަތީ މަޖްލީސް ބޭއްވުމަށް ހަމަޖެހިފައިވަނީ މިއަހަރުގެ ސެޕްޓެމްބަރު މަހުގެ 15 އިން 18 އަށް ކަމަށެވެ. އެހެން ޕާޓީތަކުން ”ކޮންގްރެސް“ ގެ ނަމުން މުޚާތަބުކުރާ މި ބައްދަލުވުމަށް ޕީއެންސީގައި ކިޔަނީ ”މަތީ މަޖްލީސް“ ކަމަށް އޭނާ ފާހަގަކުރެއްވިއެވެ.
މި މަޖްލީސް ރާވާ ހިންގުމަށްޓަކައި ޕާޓީގެ ލީޑަރޝިޕާއި މަޖިލިސް މެންބަރުންގެ މަޝްވަރާގެ މަތިން 13 މެންބަރުންގެ މައްޗަށް އެކުލެވޭ ޚާއްޞަ ސްޓީރިންގ ކޮމިޓީއެއް ނުވަތަ ޓާސްކް ފޯހެއް މިހާރު ވަނީ އެކުލަވާލާފައެވެ.
އަބްދުއްރަހީމް ވިދާޅުވި ގޮތުގައި މަތީ މަޖްލީސް ބޭއްވުމުގެ ކުރިން ކުރަންޖެހޭ އެންމެ މުހިންމު މަސައްކަތަކީ ދާއިރާތަކުގެ އިސް މަގާމުތަކަށް މެންބަރުން އިންތިޚާބު ކުރުމެވެ. މިގޮތުން ދާއިރާތަކުގެ ރައީސުން، ނައިބު ރައީސުން، ޒުވާނުންގެ ހަރަކާތުގެ ރައީސުން، އަންހެނުންގެ ކޮމިޓީގެ ރައީސުން އަދި ސްޓީރިންގ ކޮމިޓީތަކުގެ މެންބަރުން އިންތިޚާބު ކުރުމަށް ވަނީ ނިންމާފައެވެ.
މި މަގާމުތަކަށް ކުރިމަތިލުމުގެ ފުރުޞަތު މިއަދުން ފެށިގެން މި މަހުގެ 30 ވަނަ ދުވަހުގެ ނިޔަލަށް ވަނީ ހުޅުވާލާފައެވެ. މިކަމަށްޓަކައި ޚާއްޞަ ޕޯޓަލްއެއް މިއަދު އިފްތިތާހުކޮށްފައިވާއިރު، ކުރިމަތިލެވޭނީ މިއަދާ ހަމައަށް ޕީއެންސީގެ ދަފްތަރުގައި ތިބި މެންބަރުންނަށް އެކަނި ކަމަށް ޗެއަރޕާސަން ވިދާޅުވިއެވެ.
އިންތިޚާބާ ގުޅޭ މުހިންމު ތާރީޚްތައް
ޖުލައި 1: ވަގުތީ ވޯޓާސް ލިސްޓު އިއުލާނުކުރުން.
ޝަކުވާ ހުށަހެޅުމަށް 3 ދުވަހުގެ ފުރުޞަތެއް ދިނުން.
ޖުލައި 4: ދާއިމީ ވޯޓާސް ލިސްޓު އިއުލާނުކުރުން.
ޖުލައި 11 (ހޮނިހިރު): އިންތިޚާބު ބޭއްވުން.
ދާއިރާތަކުގެ ރައީސުން އިންތިޚާބު ކުރުމާ ގުޅޭގޮތުން ވާހަކަދައްކަވަމުން އޭނާ ވިދާޅުވީ، ރައްޔިތުންގެ މަޖިލީހުގެ މެންބަރުން ތިއްބެވި ދާއިރާތަކުގެ ޕާޓީ ރައީސަކީ އެ ދާއިރާއެއްގެ މަޖިލިސް މެންބަރު ކަމަށެވެ. ނަމަވެސް، މަޖިލިސް މެންބަރަކަށް އިތުބާރު ނެތް ހާލަތެއްގައި ނުވަތަ ޕާޓީގެ އަސާސީ ގަވާއިދާ ޚިލާފުވެފައިވާނަމަ، އެ ދާއިރާއަކަށް އައު ރައީސަކު އިންތިޚާބު ކުރާނެއެވެ. މީގެ އިތުރުން، ޕީއެންސީގެ މަޖިލިސް މެންބަރުން ނެތް ދާއިރާތަކަށްވެސް ރައީސުން އިންތިޚާބު ކުރާނެއެވެ.
މި އިންތިޚާބާ ގުޅޭ އިތުރު މައުލޫމާތު ޕީއެންސީގެ ރަސްމީ ވެބްސައިޓުން ލިބޭނެ އިންތިޒާމު މިހާރު ވަނީ ހަމަޖައްސާފައެވެ.
