ބޭންކް އޮފް މޯލްޑިވްސް (ބީއެމްއެލް) ގެ ޑޮލަރު ކާޑުން ފައިސާގެ މުއާމަލާތްތައް ކޮށްގެން ކޮންމެ ހަފުތާއަކު 1،000 ޑޮލަރު ލިބޭ ޕްރޮމޯޝަނެއް މިއަދު ފަށައިފިއެވެ.
މިފަދަ ޕްރޮމޯޝަނެއް ފެށުމުގެ މައިގަނޑު މަގުސަދަކީ ކަސްޓަމަރުންގެ މެދުގައި ޑޮލަރު ކާޑުގެ ބޭނުން އިތުރުކުރުން ކަމަށް އެ ބޭންކުން ވަނީ ބުނެފައެވެ. މި ޕްރޮމޯޝަން ކުރިއަށްދާނީ މިއަދުން ފެށިގެން އަންނަ ޖުލައި މަހުގެ ނިޔަލަށެވެ. މި މުއްދަތުގެ ތެރޭގައި ކޮންމެ ހަފްތާއަކު ގުރުއަތުން ހޮވޭ ނަސީބުވެރި ފަރާތަކަށް 1،000 ޑޮލަރުގެ ފައިސާގެ އިނާމެއް ލިބިގެންދާނެ ކަމަށް ބީއެމްއެލްއިން ބުންޏެވެ.
މި ޕްރޮމޯޝަންގައި ބައިވެރިވުމަށް ބީއެމްއެލްއިން ދޫކުރާ ޑޮލަރު ޑެބިޓް ކާޑަކަށް އެޕްލައިކުރަން ޖެހެއެވެ. މީގެ އިތުރުން އެ ކާޑުން މަދުވެގެން 100 ޑޮލަރުގެ މުއާމަލާތެއް ހިންގަންޖެހޭނެ ކަމަށް ބޭންކުން މައުލޫމާތުދެއެވެ.
ޑޮލަރު ޑެބިޓް ކާޑެއް ބޭނުންކޮށްގެން ވިޔަފާރިކޮށްގެންނާއި ސަބްސްކްރިޕްޝަންތަކަށް ފައިސާ ދައްކައިގެންނާއި ޓިކެޓް ނަގައިގެންނާއި ޑިޖިޓަލް ހިދުމަތްތަކަށް ފައިސާ ދައްކައިގެން ވެސް މި ޕްރޮމޯޝަނުގައި ބައިވެރިވެވޭނެ ކަމަށް ބީއެމްއެލްއިން ވަނީ އިތުރަށް ބުނެފައެވެ.
