ކޮންމެ ލޭ ހަދިޔާކުރުމެއްގެ ފަހަތުގައި އޯގާތެރިކަމާއި އިންސާނިއްޔަތުކަމުގެ ވާހަކައެއް އޮންނަ ކަމަށް ރައީސުލްޖުމްހޫރިއްޔާގެ އަނބިކަނބަލުން، ފަސްޓް ލޭޑީ ސާޖިދާ މުޙައްމަދު ވިދާޅުވެއްޖެއެވެ.
ބައިނަލްއަގްވާމީ ލޭ ހަދިޔާކުރާ ފަރާތްތަކުގެ ދުވަހާއި ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައި މެޑަމް ސާޖިދާ ވަނީ، ލޭ ހަދިޔާކުރާ ފަރާތްތަކުން ދައްކުވައިދޭ އޯގާތެރިކަމާއި އިންސާނިއްޔަތުކަމަށް ތައުރީފުކުރައްވައިފައެވެ. އެކަމަނާ ވިދާޅުވީ، ލޭ ހަދިޔާކުރާ ފަރާތްތަކުން އެ ކުރަނީ އެއްވެސް އަމިއްލަ އެދުމަކާ ނުލައި ދީލަތި މަސައްކަތެއް ކަމަށެވެ.
އެކަމުގެ ސަބަބުން ބަލިމީހުންނަށާއި އެމީހުންގެ އާއިލާތަކަށް، ހަޔާތުގެ އެންމެ ދަތި އުނދަގޫ ވަގުތުތަކުގައި އުންމީދެއް ލިބިގެންދާކަން މެޑަމް ސާޖިދާ ވަނީ ފާހަގަކުރައްވައިފައެވެ.
On this #WorldBloodDonorDay, we honour the kindness and generosity of blood donors whose selfless acts bring hope to patients and families during some of the most difficult moments of their lives.
Behind every blood donation is a story of compassion and an act of humanity. For… pic.twitter.com/yfu8HWuLx6
— First Lady Sajidha Mohamed (@sajidhaamohamed) June 14, 2026
ކޮންމެ ލޭ ހަދިޔާކުރުމެއްގެ ފަހަތުގައިވަނީ އޯގާތެރިކަމާއި އިންސާނިއްޔަތުކަމުގެ ފުން މާނައެއް އެކުލެވިގެންވާ ވާހަކައެއް ކަމަށާއި ވަކިން ހާއްސަކޮށް ނާޒުކު ހާލަތްތަކުގައި ފަރުވާ ހޯދަމުންދާ ބަލިމީހުންނަށާއި، އެމީހުންގެ އާއިލާތަކަށް، ލޭ ހަދިޔާކުރާ މީހަކު ވެދޭ އެހީތެރިކަމަކީ ބިރުވެރިކަމާއި ގޮތް ހުސްވުމުގެ ބަދަލުގައި އާ ހިތްވަރެއް ލިބިގެންދާ ކަމެއްކަން އެކަމަނާ ފާހަގަކުރެއްވިއެވެ.
ފުރާނަ ސަލާމަތްކުރުމަކީ އަބަދުވެސް ވަރަށް ބޮޑެތި ކަންތައްތަކެއް ކޮށްގެން ކުރެވޭނެ ކަމެއް ނޫންކަން ފާހަގަކުރައްވައި މެޑަމް ސާޖިދާ ވިދާޅުވީ، ބައެއް ފަހަރު ވަރަށް ކުޑަ އަދި އޯގާތެރި އަމަލަކުން ވެސް މީހެއްގެ ދިރިއުޅުމަށް ބޮޑެތި ބަދަލުތަކެއް ގެނެވިދާނެ ކަމަށެވެ.
މެޑަމް ސާޖިދާގެ މެސެޖު ނިންމަވާލައްވާފައިވަނީ އެއްވެސް މަޖުބޫރުކަމެއް ނެތި އަމިއްލަ އިސްނެގުމުގެ މަތިން ލޭ ހަދިޔާކުރުމުގެ މުހިންމުކަމާ މެދު ހޭލުންތެރިކަން އިތުރުކުރުމަށާއި، އެއީ ކޮންމެ މީހެއްގެ ވެސް ބޮލުގައި އެޅިފައިވާ ޒިންމާއެއްގެ ގޮތުގައި ދެކިގެން އެކަން ކުރުމަށް ނަސޭހަތްތެރިވަމުންނެވެ.
