މަޖިލީހަށް އިންތިހާބުވާ ޕާޓީ ބަދަލުކޮށްފިނަމަ މެންބަރުކަމުގެ ގޮނޑި ގެއްލޭ ގޮތަށް ހަދާ ގާނޫނުގެ ބިލު، އެންޓި-ޑިފެކްޝަން ބިލު ރައްޔިތުންގެ މަޖިލީހަށް ބަލައިގަނެ، ދިރާސާ ކުރުމަށް ހާއްސަ ކޮމެޓީއަކަށް ފޮނުވަން ފާސްކޮށްފިއެވެ.
ބާރަށު ދާއިރާގެ އެމްޑީޕީ މެންބަރު އަހްމަދު އަބްދުﷲ ހުށަހެޅުއްވި މި ބިލު މަޖިލީހަށް ބަލައިގަތުމަށް ނިންމާފައި ވަނީ މިއަދުގެ ޖަލްސާގައި ބައިވެރިވި 41 މެންބަރުންގެ އިއްތިފާގުންނެވެ. މި ބިލު ދިރާސާ ކުރުމަށް ހަތް މެންބަރުންގެ ވަގުތީ ކޮމެޓީއަކަށް ފޮނުވަން މަޖިލީހުން ފާސްކުރިއިރު، ކޮމެޓީގައި ތިބޭނެ މެންބަރުންނާ ގުޅޭގޮތުން ހިޔާލު ތަފާތުވުން އުފެދި މަޝްވަރާ ކުރުމަށް ޖަލްސާ އިރުކޮޅަކަށް މެދުކަނޑާލަން ވެސް ޖެހުނެވެ.
އެންޓި-ޑިފެކްޝަން ބިލު ހުށަހެޅި ބޭނުމެއް ކަމުގައި ބުނެފައި ވަނީ ރައްޔިތުންގެ މަޖިލީހުގެ މެންބަރުންނާއި އިދާރީ ދާއިރާތައް ލާމަރުކަޒީ އުސޫލުން ހިންގުމަށް ގާއިމުކޮށްފައިވާ އަތޮޅު ކައުންސިލުތަކަށާއި ރަށު ކައުންސިލުތަކަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ރައްޔިތުން އިންތިހާބުކުރާ ދައުރުގެ ތެރޭގައި އެ އިންތިހާބުކުރި ސިޔާސީ ފިކުރުގައި ދެމި ތިބޭ ބައެއްކަން ކަށަވަރު ކުރުމާ އެކު، ރައްޔިތުން އިންތިހާބުކުރާ މަގާމުތަކުގައި ތިބޭ މީހުންނަކީ ތަފާތު ސިޔާސީ އަދި މާލީ ނުފޫޒުން އެއްކިބާވެފައިވާ އަދި އާންމު ރައްޔިތުންގެ މެދުގައި އިތުބާރާއި ޔަގީންކަން ލިބިގެންވާ ބައެއް ކަމަށް ހެދުން ކަމަށެވެ.
ވަކި ސިޔާސީ ޕާޓީއެއްގެ ޓިކެޓުގައި ވާދަކޮށްގެން މަޖިލީހަށް އިންތިހާބުވުމަށްފަހު، އެ އިންތިހާބުވި ދައުރުގެ ތެރޭގައި އިންތިހާބުވި ޕާޓީގެ މެންބަރުކަމުން އަމިއްލައަށް ވަކިވާން ހުށަހަޅައި އެކަން އިލެކްޝަންސް ކޮމިޝަނުގައި ދަފްތަރުވުމުން މެންބަރުކަމުގެ ގޮނޑި ގެއްލޭނެ ކަމަށް މި ބިލުގައި ބަޔާންކޮށްފައިވެއެވެ. އަދި ވަކި ސިޔާސީ ޕާޓީއެއްގެ ޓިކެޓުގައި ވާދަކޮށްގެން ރައްޔިތުންގެ މަޖިލީހަށް އިންތިހާބުވުމަށްފަހު، އެ ދައުރުގެ ތެރޭގައި އިންތިހާބުވި ޕާޓީ ނޫން އެހެން ޕާޓީއެއްގެ މެންބަރެއްގެ ގޮތުގައި އިލެކްޝަންސް ކޮމިޝަނުގައި ދަފްތަރުވުމުން ވެސް މަޖިލީހުގެ މެންބަރުކަމުގެ ގޮނޑި ގެއްލޭނެ ކަމަށް ވަނީ ބުނެފައެވެ.
މި ބިލުގައި ރިކޯލް ވޯޓު ނެގޭނެ ހާލަތްތައް ބަޔާންކޮށްފައިވާއިރު، މެންބަރު ކަމުގައި ދެމިހުންނަން ފެނޭތޯ ބެލުމަށް އެ މެންބަރަކު ތަމްސީލުކުރާ އިދާރީ ދާއިރާގައި އިލެކްޝަންސް ކޮމިޝަނުގެ ފަރާތުން ނަގާ ވޯޓުގައި ވޯޓުލާ މީހުންގެ އަގުލަބިއްޔަތުން އެ މެންބަރަކު މަގާމުގައި ބަހައްޓަން ނުފެންނަ ކަމަށް ނިންމައިފި ނަމަ އެކަން އެ ކޮމިޝަނުން އަންގާ ދުވަހުން ފެށިގެން މެންބަރުކަމުން އިސްތިއުފާ ދޭން ވާނެ ކަމަށް ބުނެއެވެ.
