2026 ވަނަ އަހަރުގެ ފީފާ ވޯލްޑް ކަޕްގައި ޤަތަރާއި ސްވިޒަލެންޑް ބައްދަލުކުރި ފޯރިގަދަ މެޗު 1-1 އިން އެއްވަރުވެގެން ނިމިއްޖެއެވެ.
މެޗުގެ ފުރަތަމަ ހާފު ފެށިގެން ދެ ޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔައިރު، މެޗުގެ 16 ވަނަ މިނެޓުގައި ޤަތަރުގެ މަހުމޫދު އަބޫނަދާއަށް ވަނީ ރީނދޫ ކާޑެއް ދައްކާފައެވެ. އޭގެ އެއް މިނެޓު ފަހުން، މެޗުގެ 17 ވަނަ މިނެޓުގައި ސްވިޒަލެންޑަށް ލިބުނު ޕެނަލްޓީއެއް ކާމިޔާބުކޮށްދީ ބްރީލް އެމްބޯލޯ ވަނީ އެ ޓީމަށް ލީޑު ނަގައިދީފައެވެ.
ފުރަތަމަ ހާފުގެ ކުޅުން ނިމުނުއިރު 1-0 އިން ސްވިޒަލެންޑް ކުރީގައި އޮތްއިރު، މި ހާފުގައި ސްވިޒަލެންޑްގެ ޑެނިސް ޒަކަރިއާއަށާއި ޤަތަރުގެ ޖާސިމް ޤާބިރަށް ވަނީ ރީނދޫ ކާޑު ދައްކާފައެވެ.
މެޗުގެ ދެވަނަ ހާފުގައި ދެ ޓީމުގެ ފަރާތުންވެސް ގިނަ ބަދަލުތަކެއް ފެނިގެންދިޔައެވެ. އެގޮތުން ޤަތަރުގެ ތަޖުރިބާކާރު ކުޅުންތެރިޔާ ޙަސަން އަލް ހައިދޯސްއާއި އަޙްމަދު އަލާ ފަދަ ކުޅުންތެރިން ކުޅުމަށް ނުކުތެވެ. ސްވިޒަލެންޑުންވެސް ވަނީ އެ ޓީމުގެ ބައެއް މުހިންމު ކުޅުންތެރިން ބަދަލުކޮށްފައެވެ.
މެޗުގެ ނަތީޖާ ޤަތަރަށް ހަމަހަމަ ކުރެވުނީ މެޗުގެ ފުރިހަމަ ވަގުތު ހަމަވެ، އިތުރުވަގުތުގެ ގޮތުގައި ދެއްކި 4 މިނެޓުގެ ތެރެއިން ފަހު މިނެޓުގައެވެ. ހުމާމް އަލް އަމީން ނަގައިދިން ހުރަހަކުން، ބޫލަމް ކޫކީ ވަނީ ބޮލުން ބޯޅަ ގޯލުގެ ތެރެއަށް ފޮނުވާލައި ޤަތަރަށް ނަތީޖާ އެއްވަރުކޮށްދީފައެވެ.
މި ނަތީޖާއާއެކު ދެ ޓީމަށްވެސް ވަނީ ޕޮއިންޓެއް ލިބިފައެވެ. މިއީ މެޗުގެ އެންމެ ފަހު ވަގުތާ ހަމައަށް ހިތްވަރު ދޫނުކޮށް ޤަތަރުން ކުރި މަސައްކަތުން ހޯދި މުހިންމު ނަތީޖާއެކެވެ.
