2026 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕާ ގުޅޭ ހަރަކާތްތަކުގައި ބައިވެރިވެވަޑައިގަތުމަށް އެމެރިކާއަށް ދަތުރުކުރެއްވުމަށް ފަލަސްތީނުގެ ފުޓްބޯޅަ އެސޯސިއޭޝަންގެ ރައީސް ޖިބްރީލް ރަޖޫބަށް އެމެރިކާގެ ވިސާ ނުލިބުނު މައްސަލައެއް ފެންމަތިވެއްޖެއެވެ.
ފަލަސްތީނުގެ ފުޓްބޯޅަ އިދާރާގެ އިސްވެރިޔާ ވިދާޅުވި ގޮތުގައި، އެހެން ގައުމުތަކުގެ ފެޑެރޭޝަންތަކުގެ ރައީސުންނާއެކު ވޯލްޑް ކަޕްގެ ހަރަކާތްތަކުގައި ބައިވެރިވުމަށް އެމެރިކާއަށް އެތެރެވުމުގެ ހުއްދައަށް އެދިވަޑައިގެން، އޭނާ މިވަގުތު ހުންނެވީ މެކްސިކޯ ސިޓީގައެވެ. ބުރާސްފަތި ދުވަހު މެކްސިކޯ އާއި ދެކުނު އެފްރިކާ ބައްދަލުކުރި މެޗު ބައްލަވާލެއްވުމަށްފަހު، އެމެރިކާއަށް އެތެރެވުމުގެ ހުއްދަ ނުލިބިގެން މަޑުކުރަން ޖެހިފައިވާ ގިނަ ފަރާތްތަކުގެ ތެރޭގައި އޭނާ ހިމެނެއެވެ.
މިކަމާ ގުޅޭގޮތުން އޭޕީ ނިއުސް އެޖެންސީއަށް މައުލޫމާތު ދެއްވަމުން ރަޖޫބު ވިދާޅުވީ، ދުނިޔޭގެ ފުޓްބޯޅަ އާއިލާގެ ބައިވެރިންނަށް މިފަދަ ބޮޑު މުބާރާތެއްގައި ބައިވެރިވުމުގެ ހައްގު ނިގުޅައިގަތުމަކީ އިންސާފެއް ނޫން ކަމަށެވެ.
ފަލަސްތީނުގެ ޓީމު މި މުބާރާތަށް ކޮލިފައި ނުވި ނަމަވެސް، ދުނިޔޭގެ އެއްބައިވަންތަކަން ދައްކުވައިދިނުމުގެ ގޮތުން ކޮންމެ ހަތަރު އަހަރަކުން އެއްފަހަރު ބާއްވާ މި މުބާރާތަށް ދުނިޔޭގެ ހުރިހާ ގައުމެއްގެ ފުޓްބޯޅަ އެސޯސިއޭޝަންތަކުގެ ރައީސުންނަށް ފީފާއިން ދައުވަތު އަރުވައެވެ.
މިދިޔަ އަހަރު ފީފާގެ ރައީސް ޖިއާނީ އިންފަންޓީނޯ ވިދާޅުވެފައިވަނީ، 2026 ގެ ވޯލްޑް ކަޕަށް ކެނެޑާ، މެކްސިކޯ އަދި އެމެރިކާއަށް ދާ ހުރިހާ އެންމެންނަށް މަރުހަބާ ކިޔާނެ ކަމަށެވެ. ނަމަވެސް، އެމެރިކާއިން ވަނީ ބައެއް ގައުމުތަކުގެ މަންދޫބުންނަށް ވިސާ ދިނުމަށް އިންކާރުކޮށްފައެވެ. މީގެ ތެރޭގައި ސޯމާލިއާގެ ރެފްރީއަކާއި އިރާގު ޓީމާއެކު ދަތުރުކުރި ފޮޓޯގްރާފަރަކު ވެސް ހިމެނެއެވެ.
މި މައްސަލައާ ގުޅިގެން އިންފަންޓީނޯ ބުދަ ދުވަހު ނޫސްވެރިންނަށް މައުލޫމާތު ދެއްވަމުން ވިދާޅުވީ، ވިސާގެ މައްސަލަތައް ހައްލުކުރުމަށް ފީފާއިން މަސައްކަތް ކުރަމުންދާ ކަމަށެވެ. ނަމަވެސް، ފީފާއަކީ ގައުމުތަކުގެ ސަރުކާރުތަކާއި ފުލުހުންގެ މައްޗަށް ބަސްބުނެވޭނެ އިދާރާއެއް ނޫން ކަމަށް ބުނެ އޭނާ ވަނީ އެމެރިކާ ދިފާއުކުރައްވާފައެވެ.
