ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ޕީޕަލްސް ޗޮއިސްގެ ފުރަތަމަ ފަންގިފިލާ ހުޅުވައި ބޭނުންކުރަން ފަށައިފިއެވެ.
މިކަމަށްޓަކައި އިއްޔެ ރޭ އެ ފިހާރައިގައި ބޭއްވި ހާއްސަ ރަސްމިއްޔާތެއްގައި މި ފްލޯ ހުޅުއްވައި ދެއްވީ އިކޮނޮމިކް މިނިސްޓަރު މުޙައްމަދު ސަޢީދެވެ. އެ ރަސްމިއްޔާތުގައި ޗައިނާގެ މަޝްހޫރު ބްރޭންޑެއް ކަމަށްވާ ”ސުންމީ“ ބްރޭންޑްގެ އުފެއްދުންތައް ވެސް ވަނީ ތައާރަފްކޮށްފައެވެ.
އެސްޓީއޯ ޕީޕަލްސް ޗޮއިސްގެ ފުރަތަމަ ފަންގިފިލާ ހާއްސަކޮށްފައިވަނީ ހޯމް އިމްޕްރޫވްމަންޓް ސާމާނުގެ އިތުރުން ގޭތެރެ ރީތިކުރުމަށް ބޭނުންވާ ސާމާނުތަކަށެވެ. އެ ތަނުގައި ޕްރޮކިޔޯ ޕްލަސް އަދި ޕީކަބޫގެ އައުޓްލެޓަކާއި ރެއިމްބޯ ހޯމް އިމްޕްރޫވްމަންޓްގެ ޑިސްޕްލޭ ޒޯނެއް ވެސް ހުރެއެވެ. މީގެ އިތުރުން ދިވެހިންގެ މެދުގައި މަޝްހޫރު ކޮފީ ބީންސް އެންޑް ޓީ ލީވްސްގެ އައުޓްލެޓެއް ވެސް ފުރަތަމަ ފަންގިފިލާގައި ވަރަށް އަވަހަށް ހުޅުވަން ހަމަޖެހިފައިވާ ކަމަށް އެސްޓީއޯއިން ވަނީ ބުނެފައެވެ.
އެސްޓީއޯ ޕީޕަލްސް ޗޮއިސްގައި އަލަށް ހުޅުވި ފަންގިފިލާގައި މިހާރު ވެސް އެސްޓީއޯ ޕީޕަލްސް ޗޮއިސްގައި ވިއްކަމުންދާ މަގުބޫލު ބްރޭންޑްތައް ކަމަށްވާ ފިލިޕްސް، ރަސެލްހޮބްސް، އެލްޖީޓިވީ އަދި ޑައިސަންގެ ތަފާތު އެކި ސާމާނުތައް ހުރެއެވެ. ހަމައެހެންމެ، މި ފަންގިފިލާގައި ކުޑަކުދިން ގޮވައިގެން ވިޔަފާރިކުރަން ދާ ފަރާތްތަކަށް، އެ ކުދިން ބައިތިއްބާނެ ކިޑްސް ކޯނާއެއް ވެސް ހާއްސަކޮށްފައިވެއެވެ.
ފާހަގަކޮށްލަންޖެހޭ ގޮތުގައި އެސްޓީއޯ ޕީޕަލްސް ޗޮއިސްއަކީ ރާއްޖެއަށް ސުޕަރމާކެޓް ކޮންސްޕްޓް ތައާރަފް ކުރި ފުރަތަމަ ފިހާރައެވެ. މި ފިހާރައިން ކާބޯތަކެތިން ފެށިގެން ހޯމް އިމްޕްރޫވްމަންޓު ސާމާނާއި ކޮސްމެޓިކްސް ވެސް ލިބެން ހުންނަކަން ފާހަގަކޮށްލަންޖެހެއެވެ.
