އެމްޑީޕީގެ އެތެރޭގެ އިންތިޚާބު ކާމިޔާބު ކުރައްވައި، އެ ޕާޓީގެ ޗެއާޕާސަންގެ މަގާމަށް އިންތިޚާބުވެވަޑައިގަތް މުޙައްމަދު ނަޝީދަށް، ކުރީގެ ރައީސް އިބްރާހިމް މުޙައްމަދު ސޯލިހު މަރުހަބާ ވިދާޅުވެއްޖެއެވެ.
އިބޫ ސޯލިހު އެކްސްގައި ކުރެއްވި ޕޯސްޓެއްގައި ވިދާޅުވީ، އެމްޑީޕީގެ ޗެއާޕާސަން އިންތިޚާބު ކާމިޔާބު ކުރެއްވި މުޙައްމަދު ނަޝީދަށް ވަރަށް ބޮޑަށް މަރުހަބާ ދަންނަވާ ކަމަށެވެ. އަދި މިވަގުތަކީ ސަރުކާރު ޖަވާބުދާރީ ކުރުވުމަށްޓަކައި އެމްޑީޕީން ކުރަންޖެހޭ ސިޔާސީ މަސައްކަތްތައް ވަރަށް ގިނަވެފައިވާ ވަގުތެއްކަން އެމަނިކުފާނު ފާހަގަކުރެއްވިއެވެ.
އިބޫ ސޯލިހު ވިދާޅުވި ގޮތުގައި، މި މަސައްކަތްތައް ކުރުމުގައި އާ ޗެއާޕާސަންގެ ތަޖުރިބާގެ އަލީގައި ކުރިއަށް ވަޑައިގަންނަވާނެ ކަމާމެދު އެއްވެސް ޝައްކެއް ނެތެވެ.
މީގެ އިތުރުން، މި އިންތިޚާބުގައި ނަޝީދާ ވާދަކުރެއްވި މީކާއީލް ނަސީމް ކުރެއްވި މަސައްކަތްތަކަށް ވެސް އިބޫ ސޯލިހު ވަނީ ތައުރީފު ކުރައްވާފައެވެ. މީކާއީލްގެ މަސައްކަތްތައް ވަރަށް ކައިރިން ދުށް މީހެއްގެ ހައިސިއްޔަތުން މަރުހަބާ ދަންނަވަމުން، ރައީސް ސޯލިހު ވިދާޅުވީ މީކާއީލްގެ ސިޔާސީ މުސްތަގުބަލު ފެންނަނީ ވަރަށް އުޖާލާކޮށް ކަމަށެވެ.
އެމްޑީޕީ ގެ ޗެއަރޕާސަން އިންތިޚާބު ކާމިޔާބު ކުރެއްވި ރައީސް @MohamedNasheed އަށް ވަރަށް ބޮޑަށް މަރުޙަބާ ދަންނަވަން.
ސަރުކާރު ޖަވާބުދާރީ ކުރުވުމަށް @MDPSecretariat އިން ކުރަން ޖެހޭ ސިޔާސީ މަސައްކަތްތައް މިވަގުތު ވަރަށް ގިނަ. އެ މަސައްކަތްތައް ކުރުމުގައި މަނިކުފާނުގެ ތަޖުރިބާ ގެ…
— Ibrahim Mohamed Solih (@ibusolih) June 12, 2026
މި އިންތިޚާބާ ގުޅޭގޮތުން އިބޫ ސޯލިހު އިތުރަށް ވިދާޅުވީ، މިއީ އެމްޑީޕީގެ އެތެރޭގެ ޑިމޮކްރެސީ ފައްކާވެ ފުރިހަމަވަމުން އަންނަކަމުގެ ހެއްކެއް ކަމަށެވެ. އަދި ޕާޓީއާއިގެން ކުރިއަށްދާންވީ އެންމެން އެކުގައި ކަމަށް ވެސް އެމަނިކުފާނު ވިދާޅުވިއެވެ.
