ދިވެހިރާއްޖޭގެ އެންމެ ބޮޑު އިދިކޮޅު ޕާޓީ، އެމްޑީޕީގެ ޗެއާޕާސަން ހޮވުމަށް ބޭއްވި އިންތިޚާބު ބޮޑު ތަފާތަކުން ރައީސް މުޙައްމަދު ނަޝީދު ކާމިޔާބު ކުރައްވައިފިއެވެ. މުޅި ރާއްޖޭގައި ކުރިއަށްދިޔަ މި ފޯރިގަދަ އިންތިޚާބުގެ ވަގުތީ ނަތީޖާތައް ދައްކާގޮތުން، ރައީސް ނަޝީދު ވަނީ މީކާއިލްގެ މައްޗަށް 6 ހާސް ވޯޓުގެ ތަފާތުން، ކުރީގައި އޮވެ، ބޮޑު އަޣުލަބިއްޔަތެއް ހޯއްދަވާފައެވެ.
މި އިންތިޚާބުގައި ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް ނަސީމް، މިރޭގެ ވަގުތެއްގައި ވިދާޅުވީ އިންތިޚާބުގެ މިހާތަނަށް ލިބިފައިވާ ތަފާސްހިސާބުތަކުން ކުރީގައި އުޅުއްވަނީ އޭނާ ކަމަށެވެ. ނަމަވެސް އިންތިޚާބުގެ އިންސާފުވެރިކަމާ މެދު އޭނާ ވަނީ ބޮޑެތި ކަންބޮޑުވުންތަކެއް ފާޅުކުރައްވާފައެވެ. އެގޮތުން އިންތިޚާބުގެ ތެރެއިން ވަރަށް ހިތާމަވެރި ކަންކަން ފެންނަމުންދާކަން މީކާއިލް ފާހަގަކުރެއްވިއެވެ. އެގޮތުން ބައެއް ރަށްރަށުގައި އޭނާގެ މަންދޫބުންނަށް ގަސްދުގައި ފާސް ދޫނުކޮށް ވޯޓުލުން ކުރިއަށް ގެންގޮސްފައިވާ ކަމަށާއި، ބައެއް ރަށްރަށުގައި ވޯޓު ފޮށި ފަޅާލާފައި ހުއްޓާ އެ ފޮއްޓަށް ވޯޓުލާން މަޖުބޫރުކޮށްފައިވާ ކަމަށް އޭނާ ތުހުމަތު ކުރެއްވިއެވެ.
މީކާއިލްގެ މި ތުހުމަތުތަކަށް ފަހުވެސް، ވޯޓުލުން އިތުރު ބައި ގަޑި އިރަށް ދަންމައިގެން ނަޝީދު މިވަނީ މި އިންތިޚާބު ބޮޑުކޮށް ނަގާފައެވެ. މި ކާމިޔާބީއާ ގުޅިގެން އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވަނީ ރައީސް ނަޝީދަށާއި އެމްޑީޕީގެ އާންމު މެންބަރުންނަށް މަރުހަބާ ވިދާޅުވެފައެވެ. ފައްޔާޒް ވިދާޅުވީ، މާތް اللهގެ ވާގިފުޅާއެކު ކާމިޔާބަށް ވާސިލުވެވިއްޖެ ކަމަށާއި، މި ލިބުނު ކުޑަ ދުވަސްކޮޅު ތެރޭގައި މުޅި ރާއްޖޭގައި ”ރީނދޫ ލަޝްކަރު“ ރުކުރުވާލެވިފައި އޮތް މަންޒަރު ފެނުމަކީ ލިބުނު ވަރަށް ބޮޑު އުފަލެއް ކަމަށެވެ. އަދި މި ކެމްޕޭނުގައި ވަރަށް ބުރަކޮށް މަސައްކަތް ކުރެއްވި ކެމްޕޭން ޓީމަށް އޭނާ ވަނީ ޝުކުރު އަދާކުރައްވާފައެވެ.
އިންތިޚާބުގައި ވޯޓު ދެއްވި ހުރިހާ މެންބަރުންނަށް ޚާއްޞަ ޝުކުރެއް އަދާކުރައްވަމުން ފައްޔާޒް ވިދާޅުވީ، ޕާޓީގެ މެންބަރުން މިއަދު ސާބިތުކޮށްދެއްވީ ޕާޓީގެ މިސްރާބު ކަނޑައަޅައިދޭ ވިންދަކީ އާންމު މެންބަރުން ކަމަށެވެ. ”ހިތަށް ވީ ތަދުގެ ބަދަލު ހޯދުމަށް ވުރެ މި ރާއްޖެ އިސްކޮށް ތިޔަ ދެއްވީ މުހިންމު ވޯޓެއް،“ އޭނާ ވިދާޅުވިއެވެ.
މީގެ އިތުރުން، ގަލޮޅު ދެކުނު ދާއިރާގެ މެންބަރު މީކާއިލް ނަސީމާއި ކެމްޕޭން ޓީމުން ދެއްކި ހިތްވަރަށް ފައްޔާޒް ވަނީ ސާބަސް ދެއްވާފައެވެ. އޭނާ އިތުރަށް ވިދާޅުވީ، ދެން އޮތް އެންމެ މުހިންމު މަސައްކަތަކީ އެކުގައި ނުކުމެ މިހާރު އޮތް ސަރުކާރު ބަލިކުރުން ކަމަށާއި، ބަދަހި ސަފުތަކަކާއެކު އެ މަސައްކަތް ކާމިޔާބު ކުރާނެ ކަމަށެވެ.
މަރުހަބާ ރައީސް ނަޝީދު. މަރުހަބާ އެމްޑީޕީ މެންބަރުން. މާތް اللهގެ ވާގިފުޅާއެކު އަޅުގަނޑުމެންނަށް ކާމިޔާބަށް ވާސިލުވެވިއްޖެ. މި ލިބުނު ކުޑަ ދުވަސްކޮޅު ތެރޭ މުޅި ރާއްޖޭގައި ރީނދޫ ލަޝްކަރު ރުކުރުވާލެވިފައި އޮތް މަންޒަރު ފެނުމަކީ ބޮޑު އުފަލެއް. މި ކެމްޕޭނުގައި ވަރަށް ބުރަކޮށް… pic.twitter.com/t3upOYHCKE
— Fayyaz Ismail (@faya_i) June 12, 2026
ފައްޔާޒްގެ މެސެޖު ނިންމާލައްވަމުން ވިދާޅުވީ، އެމްޑީޕީގެ މެންބަރުން ތިބީ ބޮޑު ބަދަލަކަށް ތައްޔާރަށްކަން މިއަދު ސާބިތުކޮށްދީފި ކަމަށެވެ. އަދި ރައީސް ނަޝީދަށް ދެއްވި ވޯޓާއެކު ރާއްޖެއަށް ”ބޮޑު ބަދަލު“ ގެނައުމުގެ މަސައްކަތް މިއަދު ފެށިގެން ދިޔައީ ކަމަށްވެސް އޭނާ ވިދާޅުވިއެވެ.
މި އިންތިޚާބަކީ ކުރިއަށް އޮތް ރިޔާސީ އިންތިޚާބަށް އެމްޑީޕީ ތައްޔާރުވުމުގެ ގޮތުން ބޭއްވުނު ވަރަށް މުހިންމު ހަރަކާތެކެވެ. ރައީސް ނަޝީދުގެ މި ކާމިޔާބީއާއެކު، ޕާޓީގެ ހަރަކާތްތައް އިތުރަށް ވަރުގަދަވެގެންދާނެ ކަމަށް ސިޔާސީ މަސްރަޙު ދިރާސާކުރާ ފަރާތްތަކުން ލަފާކުރެއެވެ.
