ނައިޖީރިއާގެ އަސްކަރިއްޔާއިން ވޭތުވެދިޔަ އެއް އަހަރު ދުވަހުގެ ތެރޭގައި 13،000 އަށްވުރެ ގިނަ ”ޓެރަރިސްޓުން“ ނައްތާލާފައިވާ ކަމަށް އެ ގައުމުގެ ރައީސް ބޯލާ އަހުމަދު ޓިނޫބޫ އިޢުލާން ކުރައްވައިފިއެވެ. އޭނާ މިކަން ހާމަކުރެއްވީ އެ ގައުމުގައި ހަތިޔާރު އެޅި ޖަމާއަތްތަކުންނާއި ކުށްވެރިވާ ގޭންގުތަކުން މީހުން ވަގަށް ނެގުމާއި ބޮޑެތި ހަމަލާތައް ދެމުންދާ ދަނޑިވަޅެއްގައެވެ.
ހުކުރު ދުވަހު ގައުމާ މުޚާތަބު ކުރައްވައި ދެއްވި ޓީވީ މެސެޖެއްގައި ރައީސް ޓިނޫބޫ ވިދާޅުވީ، 2023 ވަނަ އަހަރު އޭނާ ވެރިކަމާ ހަވާލުވެވަޑައިގަތް ފަހުން، ހަތިޔާރު އެޅި ހަނގުރާމަވެރިންނާ ދެކޮޅަށް ކުރާ ހަނގުރާމައިގައި މަރުވާ މީހުންގެ އަދަދު 81 އިންސައްތަ ދަށްވެފައިވާ ކަމަށެވެ. އަދި ”އޮޕަރޭޝަން ސޭފް ކޮރިޑޯ“ ގެ ދަށުން 124،000 ހަނގުރާމަވެރިންނާއި އެމީހުންގެ އާއިލާތަކުން ހަތިޔާރު ބަހައްޓައި އަމާންދީފައިވާ ކަމަށްވެސް ރައީސް ވިދާޅުވިއެވެ. މިއީ ހަތިޔާރު ބަހައްޓާ މީހުން އަލުން މުޖުތަމައަށް ނެރުމަށް ހިންގާ ރިހެބިލިޓޭޝަން ޕްރޮގްރާމެެއް ގޮތުގައި ސިފަކުރެއްވިއެވެ.
ރައީސް ޓިނޫބޫގެ މި ތަގުރީރަކީ ނައިޖީރިއާގެ ”ޑިމޮކްރަސީ ޑޭ“ ފާހަގަކުރުމުގެ ގޮތުން ދެއްވި ތަގުރީރެކެވެ. މި ދުވަހަކީ 1999 ވަނަ އަހަރު އެ ގައުމުގައި އަސްކަރީ ވެރިކަން ނިމުމަކަށް އައިސް، ޑިމޮކްރަސީ އިއާދަވި ދުވަހެވެ.
ނަމަވެސް، ރައީސްގެ ތަގުރީރުގައި ކާމިޔާބީގެ ވާހަކަތައް ހިމެނުނު ކަމުގައިވީ ނަމަވެސް، އެފްރިކާގެ ދެވަނައަށް އެންމެ ބޮޑު އިގްތިސާދު އޮތް ނައިޖީރިއާ އަދިވެސް އޮތީ ސަލާމަތީ ގޮތުން ބޮޑު ނުރައްކަލެއްގެ ތެރޭގައެވެ. އައި.އެސް އަދި އަލްގައިދާއާ ގުޅުންހުރި ޖަމާއަތްތަކުންނާއި ކުށްވެރިވާ ގޭންގުތަކުން ދަނީ ފައިސާ ހޯދުމުގެ ބޭނުމުގައި އާންމުން ވަގަށް ނަގަމުން ކަމަށް ނައިޖީރިއާއިން ތުހުމަތު ކުރެއެވެ. ވަކިން ހާއްސަކޮށް، ސަލާމަތީ ބާރުތަކުގެ ހިދުމަތް މަދުން ލިބޭ ރަށްފުށުގެ ސަރަހައްދުތަކުގައި ހުންނަ ސްކޫލްތަކާއި، ފައްޅިތަކާއި މިސްކިތްތަކަށް އަމާޒުކޮށް މިފަދަ ހަމަލާތައް ދެމުންދާކަން ފާހަގަކުރިއެވެ.
ކުރިން ހަމައެކަނި ގައުމުގެ އުތުރު ސަރަހައްދުގައި ހަރަކާތްތެރިވި މި ޖަމާއަތްތައް، މިހާރު ވަނީ ގައުމުގެ ހުޅަނގު ދެކުނުގެ ސަރަހައްދުތަކަށް ފެތުރެން ފަށާފައިކަމަށް ވެއެވެ. އޮފިޝަލުން ފާހަގަކުރި ގޮތުގައި، މި ޖަމާއަތްތައް އެހެން ސަރަހައްދުތަކަށް ބަދަލުވަނީ އަސްކަރިއްޔާގެ ފިއްތުންތައް ކުރިމަތިވުމުގެ ސަބަބުންނެވެ.
ނައިޖީރިއާގެ ސަލާމަތީ ކަންކަން ވަރުގަދަކުރުމަށްކަމަށްބުނެ އިޒްރޭލަށް ވާގިވެރިވާ އެމެރިކާއިންވެސް ދަނީ އެޤައުމަށް އެހީތެރިކަން ފޯރުކޮށްދެމުންނެވެ. އެގޮތުން، ހަތިޔާރު އެޅި ޖަމާއަތްތައް ތިބޭ ތަންތަނަށް އަމާޒުކޮށް ހަމަލާދިނުމުގައި އެމެރިކާ އަސްކަރިއްޔާއިން އެހީތެރިވަމުންދާއިރު، މިދިޔަ ފެބުރުވަރީ މަހު އެމެރިކާގެ 100 ސިފައިން ވަނީ ނައިޖީރިއާއަށް ފޮނުވާފައެވެ.
