އެމްޑީޕީގެ އެތެރޭގެ އިންތިޚާބުގައި ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް ނަސީމް، އިންތިޚާބުގެ މިހާތަނަށް ލިބިފައިވާ ތަފާސްހިސާބުތަކުން ކުރީގައި އުޅުއްވަނީ އޭނާ ކަމަށް ވިދާޅުވެއްޖެއެވެ. ނަމަވެސް އިންތިޚާބުގެ އިންސާފުވެރިކަމާ މެދު އޭނާ ވަނީ ބޮޑެތި ކަންބޮޑުވުންތަކެއް ފާޅުކުރައްވާފައެވެ.
އެމްޑީޕީގެ ޗެއާޕާސަން ކަމަށް ވާދަކުރައްވާ މީކާއިލް ދެންމެ މީޑިއާ ތަކަށް ދެއްވި އިންޓަވިއުއެއްގައި ވިދާޅުވީ، މިހާތަނަށް ލިބިފައިވާ ތަފާސްހިސާބުތަކަށް ބަލާއިރު އޭނާ އަދިވެސް އުޅުއްވަނީ ކުރީގައި ކަމަށެވެ. އަދި ވީހާވެސް ގިނަ އެމްޑީޕީގެ އާންމު މެންބަރުން ނުކުމެ ވޯޓު ދެއްވުމަށް އޭނާ ވަނީ އިލްތިމާސް ކުރައްވާފައެވެ.
ނަމަވެސް، އިންތިޚާބުގެ ތެރެއިން ވަރަށް ހިތާމަވެރި ކަންކަން ފެންނަމުންދާކަން މީކާއިލް ފާހަގަކުރެއްވިއެވެ. އެގޮތުން ބައެއް ރަށްރަށުގައި އޭނާގެ މަންދޫބުންނަށް ގަސްދުގައި ފާސް ދޫނުކޮށް ވޯޓުލުން ކުރިއަށް ގެންގޮސްފައިވާ ކަމަށާއި، ބައެއް ރަށްރަށުގައި ވޯޓު ފޮށި ފަޅާލާފައި ހުއްޓާ އެ ފޮއްޓަށް ވޯޓުލާން މަޖުބޫރުކޮށްފައިވާ ކަމަށް އޭނާ ތުހުމަތު ކުރެއްވިއެވެ.
”ބައެއް ރަށްރަށުގައި ވޯޓާސް ލިސްޓް އޮޅުވާލާފައިވޭ. އަދި އަޅުގަނޑުމެންނަށް ވޯޓުލާން ތިބި މީހުން ވޯޓާސް ލިސްޓުން އުނިކޮށްފައިވާކަން ފާހަގަވޭ. މިއީ އަޅުގަނޑު ދުވަހަކުވެސް އެމްޑީޕީގެ އެތެރޭގެ އިންތިޚާބެއްގައި ދެކެން ބޭނުންވި މަންޒަރެއް ނޫން،“ މީކާއިލް ވިދާޅުވިއެވެ.
ކުރިއަށް އޮތް ރިޔާސީ އިންތިޚާބަށް އިޝާރާތް ކުރައްވަމުން މީކާއިލް ވިދާޅުވީ، 2028 ވަނަ އަހަރުގެ އިންތިޚާބު ކާމިޔާބު ކުރެވެން އޮތީ ޕާޓީގެ އެތެރޭގެ އިންސާފުވެރިކަމާއި ހަމަހަމަކަން ގާއިމުކޮށްގެން ކަމަށެވެ. އަދި އެތެރޭގެ އިންތިޚާބުތަކުގެ ސައްހަކަން ކަށަވަރުކޮށްގެން މެނުވީ 2028 ވަނަ އަހަރުގެ ކާމިޔާބީއާ ހަމައަށް ނުދެވޭނެ ކަމަށްވެސް އޭނާ ވިދާޅުވިއެވެ.
”2028 ކާމިޔާބު ކުރެވެން އޮތީ އެތެރޭގެ އިންސާފުވެރިކަން ގާއިމުކޮށްގެން، ހަމަހަމަކަން ގާއިމުކޮށްގެން އެތެރޭގެ އިންތިހާބު ތަކުގެ ސައްހަކަން ކަށަވަރުކޮށްގެން. އެހެންވީމަ އެމަގުން ހިނގައިގެން އަޅުގަނޑުމެންނަށް 2028 ލިބޭނީ“ މީކާއިލް ވިދާޅުވިއެވެ.
މީކާއިލް އިތުރަށް ވިދާޅުވީ މިއީ އެމްޑީޕީގެ މެންބަރުން ތަސައްވަރުކުރާ އެމްޑީޕީއެއް ނޫން ކަމަށެވެ. އަދި ޕާޓީގެ ތެރޭގައި ޑިމޮކްރަސީ ހަރުދަނާކުރުމަށްޓަކައި، މިނިވަން އަދި އިންސާފުވެރި އިންތިޚާބެއް ކަށަވަރުކޮށްދިނުމަށް އެޕާޓީގެ އިލެކްޝަންސް ކޮމިޓީއަށް އޭނާ ގޮވާލެއްވިއެވެ.
