މެދުއިރުމަތީގައި އެމެރިކާއިން ”އަމިއްލަ ދިފާޢުގައި“ އީރާނާ ދެކޮޅަށް ހިންގަމުންދާ އަސްކަރީ ހަރަކާތްތަކުގެ ސަބަބުން އެހެން ޤައުމުތަކުގެ އާންމު މަސައްކަތްތެރިންގެ ފުރާނަތަކަށްވެސް ވަނީ ނުރައްކާވެފައެވެ. އީރާނާ ދެކޮޅަށް އެމެރިކާއިން ކަނޑުމަތީގައި ހިންގަމުންދާ ”ބްލޮކޭޑް“ (ހިފަހައްޓައި ބަންދުކުރުން) ތަންފީޒުކުރުމުގެ ގޮތުން ވިޔަފާރި ބޯޓުފަހަރަށް ދިން ޙަމަލާތަކެއްގައި، އިންޑިއާގެ 3 ފަޅުވެރިއަކު މަރުވެއްޖެއެވެ.
މިކަމާ ގުޅިގެން އިންޑިއާގެ އާންމުންގެ މެދުގައި ބޮޑު ރުޅިވެރިކަމެއް އުފެދި، އިންޑިއާ ސަރުކާރުން ވަނީ އދ. ގެ ސަލާމަތީ މަޖިލީހަށް (ޔޫއެންއެސްސީ) މި މައްސަލަ ހުށަހަޅައި، އެމެރިކާގެ ބާރުވެރިކަމާ ދެކޮޅަށް އެމެރިކާފަދަ އިސްތިއުމާރީ ޤައުމުތަކުގެ މުށުތެރޭގައިވާ އ.ދ. އަށް މައްސަލަ ހުށައަޅައިފައެވެ.
ޙަމަލާތަކުގެ ތަފްޞީލާއި އިންޑިއާގެ ރައްދު
– ވިޔަފާރި ބޯޓުތަކަށް ޙަމަލާދިނުން: އެމެރިކާގެ ސިފައިން ވަނީ އީރާނުގެ ބަނދަރުތަކާ ދިމާއަށް ދަތުރުކޮށް، ސާންކްޝަންތަކާ ޚިލާފުވި ކަމަށް ބުނެ، ގަލްފް އޮފް އޮމާންގައި ދަތުރުކުރަމުންދިޔަ ތެޔޮ ޓޭންކަރެއް ކަމަށްވާ ’ސެޓެބެލޯ‘ އަދި ގިނީ-ބިސާއު ދިދައިގެ ދަށުން ދަތުރުކުރި ’އެމް.ވީ ޖަލްވީރް‘ އަށް ބާރުގަދަ ޙަމަލާތަކެއް ދީފައެވެ.
– މަރުވިކަން ކަށަވަރުކުރުން: އިންޑިއާގެ ޔޫނިއަން މިނިސްޓަރ ސަރަބަނަންދާ ސޮނޯވާލް ވަނީ، އެމެރިކާއިން ދިން ޙަމަލާގައި ’ސެޓެބެލޯ‘ ގައި މަސައްކަތްކުރަމުންދިޔަ އިންޑިއާގެ 3 ރައްޔިތަކު މަރުވެފައިވާކަން ރަސްމީކޮށް ކަށަވަރުކޮށްދީފައެވެ.
– އދ. ގައި ކުރި ޝަކުވާ: މި ހާދިސާއާ ގުޅިގެން އިންޑިއާއިން ވަނީ އދ. ގެ ސަލާމަތީ މަޖިލީހުގައި ވަރުގަދަ ބަޔާނެއް ނެރެފައެވެ. އިންޑިއާއިން ވަނީ ހަތިޔާރެއް ނެތް އާންމު ވިޔަފާރި ބޯޓުތަކަށް އަސްކަރީ ބާރުގެ ބޭނުންކުރުމުގެ ޤާނޫނީ ހުއްދައާ މެދު ސުވާލު އުފައްދައި، ކަނޑުމަތީގެ މަސައްކަތްތެރިންގެ ސަލާމަތްތެރިކަން ކަށަވަރުކުރުމަށް ގޮވާލާފައެވެ.
