އެމްޑީޕީގެ ޗެއާޕާސަން ހޮވުމަށް މިއަދު ބާއްވަމުންދާ އިންތިހާބުގެ ތެރެއިން، ގދ. ފިޔޯރީ އާއި ފ. ފީއަލީގައި ހަމަނުޖެހުން ހިންގުމާ ގުޅިގެން އެ ދެ ރަށުގައި ވޯޓުލުން މެދުކެނޑިއްޖެއެވެ.
މައުލޫމާތު ލިބިފައިވާ ގޮތުގައި، މިއަދު ހަވީރު ގދ. ފިޔޯރީގައި ހިނގި ހަމަނުޖެހުމުގައި ކެންޑިޑޭޓެއްގެ މަންދޫބެއް ކަމަށް ބުނެ އެތަނަށް ދިޔަ މީހަކު ވަނީ ވޯޓު ފޮށި ފަޅާލައިފައެވެ. އޭނާ އެތަނުގައި އަޑުގަދަކޮށް ހަމަނުޖެހުން ހިންގުމާ ގުޅިގެން، ވޯޓުލާ މަރުކަޒުން އޭނާ ވަނީ ބޭރުކޮށްލާފައެވެ. މީސްމީޑިއާގައި އާންމުވަމުންދާ ފޮޓޯތަކުން ފެންނަ ގޮތުގައި، ފިޔޯރީގެ ވޯޓު ފޮއްޓަށް ވަނީ ވަރަށް ބޮޑަށް ގެއްލުންދީފައެވެ. އަދި ވޯޓު ފޮށި ފަޅާލުމުގެ ސަބަބުން ބައެއް ވޯޓު ކަރުދާސްތައް ބިންމައްޗަށް އުކާލެވިފައި ހުރި މަންޒަރު ފެނެއެވެ.
މީގެ އިތުރުން ފ. ފީއަލީގައި ވެސް ވޯޓުލާ މަރުކަޒުގައި ބޮޑެތި ދެބަސްވުންތަކެއް ވަނީ އުފެދިފައެވެ. ފީއަލީގައި ވޯޓުލުން ކުރިއަށްދަނީ ރަސްމީ ވޯޓު ލިސްޓަށް ނޫން ކަމަށް ބުނެ، ކެންޑިޑޭޓް މީކާއިލް އަހުމަދު ނަސީމްގެ ފަރާތުން ވަނީ ރަސްމީކޮށް ޝަކުވާ ހުށަހަޅާފައެވެ. އެ ރަށުގައި ހިނގި ހަމަނުޖެހުމުގެ ތެރެއިން ބަޔަކު މީހުން ވޯޓު ފޮށި ހިފައިގެން މަރުކަޒުން ނުކުމެގެންދާ މަންޒަރު ފެންނަ ވީޑިއޯތައް ވެސް މީސްމީޑިއާގައި ދަނީ ދައުރުވަމުންނެވެ.
އެމްޑީޕީގެ މި އިންތިހާބަކީ ރާއްޖޭގެ މީހުން ދިރިއުޅޭ ހުރިހާ ރަށަކާއި، އަދި އަވަށްޓެރި ސްރީލަންކާގައި ވެސް ވޯޓު ފޮށި ބަހައްޓައިގެން ކުރިއަށްގެންދާ އިންތިހާބެކެވެ. ޖުމްލަ 241 ވޯޓު ފޮށި ބަހައްޓާފައިވާއިރު، މީގެ ތެރޭގައި މާލޭގެ 10 ސްކޫލެއްގައި ބަހައްޓާފައިވާ ފޮށިތައް ވެސް ހިމެނެއެވެ.
ޗެއާޕާސަންގެ މަގާމަށް މި އިންތިހާބުގައި ވާދަކުރައްވަނީ ކުރީގެ ރައީސް މުހައްމަދު ނަޝީދާއި، ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމެވެ. މި ދެ ރަށުގައި ހިނގި ހަމަނުޖެހުންތަކާ ގުޅިގެން ވޯޓުލުން މެދުކެނޑިފައިވީ ނަމަވެސް، އިތުރު ރަށްރަށުގައި ވޯޓުލުމުގެ ކަންކަން އަމާންކަމާއެކު ކުރިއަށްދާ ކަމަށް މައުލޫމާތު ލިބެއެވެ.
