ފީފާ ވޯލްޑް ކަޕް 2026 ގެ ގްރޫޕް ’އޭ‘ ގައި ރޭ ކުޅުނު ފޯރިގަދަ މެޗުން، ފަހަތުން އަރައި 2-1 ގެ ނަތީޖާއަކުން ޗެކްރިޕަބްލިކް ބަލިކޮށް ދެކުނު ކޮރެއާއިން މުބާރާތުގެ ފެށުން ކާމިޔާބުކޮށްފިއެވެ.
މެކްސިކޯގެ ގުއަދަލަހާރާ ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެންދިޔައީ ފަނޑު ކުޅުމެކެވެ. ނަތީޖާއެއްގެ ގޮތުން ފުރަތަމަ ހާފު ނިމިގެން ދިޔައީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
ނަމަވެސް، ދެވަނަ ހާފު ފަށައިގެން މެޗުގެ 59 ވަނަ މިނެޓުގައި ޗެކްރިޕަބްލިކްގެ ކެޕްޓަން ލަދިސްލާވް ކްރެޖްޗީ ވަނީ ބޮލުން ފޮނުވާލި ހަމަލާއަކުން ލަނޑެއް ޖަހައި އެ ޓީމަށް ކުރިހޯދައިދީފައެވެ. މި ލަނޑާއެކު ދެކުނު ކޮރެއާއިން ކުޅުން ވަރުގަދަކޮށް، މެޗުގެ 67 ވަނަ މިނެޓުގައި ހުވާން އިން-ބިއޮމް ވަނީ ހިތްގައިމު ލަނޑެއް ޖަހައި ނަތީޖާ އެއްވަރުކޮށްދީފައެވެ.
މެޗުން ދެކުނު ކޮރެއާ މޮޅުވި ލަނޑު 80 ވަނަ މިނެޓުގައި ޖަހައިދިނީ އޯ ހިޔޮން-ގްޔޫ އެވެ. މި ލަނޑު ޖެހުމަށް ފުރުސަތު ތަނަވަސްކޮށްދިނީވެސް މެޗުގެ މޮޅު ކުޅުންތެރިޔާގެ މަގާމު ހޯދި ހުވާން އެވެ. މަޝްހޫރު ފޯވާޑް ސޮން ހިއުން-މިންގެ ކެޕްޓަންކަމުގެ ދަށުން ކުޅުނު ކޮރެއާ ޓީމުން މުޅި މެޗު ކޮންޓްރޯލްކޮށް ގިނަ ހަމަލާތަކެއް އުފެއްދިއެވެ.
މި މުބާރާތުގެ ފުރަތަމަ މެޗުގައި މެކްސިކޯ އިން ވަނީ ސައުތު އެފްރިކާ 2-0 އިން ބަލިކޮށްފައެވެ. އެހެންކަމުން ގްރޫޕް އޭގެ އެއްވަނައިގައި މިވަގުތު އޮތީ މެކްސިކޯއެވެ. ދެކުނު ކޮރެއާ ދެވަނައިގައި އޮތްއިރު، ޗެކްރިޕަބްލިކް އޮތީ ތިންވަނައިގައެވެ.
މި ގްރޫޕްގެ ދެން އޮތް މެޗުތަކުގައި ޖޫން 18 ވަނަ ދުވަހު މެކްސިކޯ ނުކުންނާނީ ދެކުނު ކޮރެއާއާ ދެކޮޅަށެވެ. އަދި ހަމަ އެދުވަހު ޗެކިއާ ބައްދަލުކުރާނީ ސައުތު އެފްރިކާއާއެވެ.
މި މުބާރާތުގެ ފުރަތަމަ މެޗުގައި މެކްސިކޯގެ ރައުލް ހިމެނޭޒް އަދި ޖޫލިއަން ކީނޯނޭސް ވަނީ ލަނޑު ޖަހައި، އެ ގައުމަށް މުހިންމު މޮޅެއް ހޯދައިދީފައެވެ.
