ހިލޭ ޓީވީ ނަމަކަށް ކިޔާ ވެބްސައިޓަކުން ވޯލްޑް ކަޕްގެ މެޗުތައް ހިލޭ ދައްކާނެ ކަމަށް ބުނެފައިވަނިކޮށް އެކަން ހުއްޓުވުމަށް ސިވިލް ކޯޓުން އަމުރެއް ނެރެފިއެވެ.
ސިވިލް ކޯޓުން މި އަމުރު ނެރެފައިވަނީ ހިލޭ ޓީވީ ވެބްސައިޓުން ވޯލްޑް ކަޕްގެ މެޗުތައް އެއްވެސް ފީއަކާނުލައި ހިލޭ ދައްކާނެ ކަމަށް ބުނުމާ ގުޅިގެން، މީޑިއާނެޓުން ސިވިލް ކޯޓަށް ހުށަހެޅި ވަގުތީ އަމުރަކާ ގުޅިގެންނެވެ.
ހިލޭ ޓީވީން މީޑިއާނެޓްގެ ހައްގުތަކަށް އަރައިގަންނަމުންދާ ކަމަށް ބުނެ މީޑިއާނެޓުން ވަނީ ސިވިލް ކޯޓަށް މައްސަލަ ހުށަހަޅައިފައެވެ. ހިލޭ ޓީވީން މީޑިއާނެޓްގެ ފީޑްތައް އެއްކުރުމަށްފަހު އެ ފަރާތުގެ ވެބްސައިޓް މެދުވެރިކޮށް ފެންނާނެ ކަމަށް ޓެލެގްރާމް ގްރޫޕްގައި ބުނެފައިވާ ކަމަށް މީޑިއާނެޓުން ވަނީ ބުނެފައެވެ.
ވޯލްޑް ކަޕްގެ މެޗުތައް ދެއްކުމުގެ އެއްވެސް ހައްގެއް ނެތް ބަޔަކު ހިންގާ މިފަދަ އަމަލުތައް ނުހުއްޓުވައިފިނަމަ ދައުވާކުރާ ފަރާތުގެ މަސްލަހަތަށާއި އާންމުންގެ މަސްލަހަތަށް ވެސް އިއާދަނުކުރެވޭ ވަރުގެ ބޮޑެތި ގެއްލުންތަކެއް ކުރިމަތިވެދާނެ ކަމަށް މީޑިއާނެޓުން ސިވިލް ކޯޓަށް ހުށަހެޅި ބަޔާނުގައި ވަނީ ފާހަގަކޮށްފައެވެ.
މި މައްސަލައާ ގުޅިހެން ސިވިލް ކޯޓުން ނެރުނު ވަގުތީ އަމުރުގައި ބުނެފައިވަނީ، އެ ކޯޓުން ބަލަމުންދާ މި މައްސަލައާމެދު ގޮތެއް ކަނޑައަޅައި ނިމެންދެން ހިލޭ ޓީވީގެ ވެބްސައިޓުން ދިވެހިރާއްޖޭގެ އައިޕީ އެޑްރެސްތަކުން ނުވަދެވޭނޭހެން ހެދުމަށް ކޮމިޔުނިކޭޝަން އޮތޯރިޓީ އޮފް މޯލްޑިވްސްގެ މައްޗަށް އަންގައި އަމުރުކުރާ ކަމަށެވެ.
