ޑިއުޓީގައި އުޅުއްވަނިކޮށް ކަނޑަށް ވެއްޓި ގެއްލުނު ފުލުހަކު ހޯދުމަށް ހިންގި ޚާއްޞަ އޮޕަރޭޝަނުގައި އަމަލީ ގޮތުން ބައިވެރިވެ، ބޮޑު އެހީތެރިކަމެއް ފޯރުކޮށްދިން ދެ ޑައިވަރުންނަށް މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ ޢަލީ އިހުސާނާއި ކޮމިޝަނަރ އޮފް ޕޮލިސް އަހުމަދު މުހައްމަދު އިޚްލާޞްތެރިކަމާއެކު ޝުކުރު އަދާކުރައްވައިފިއެވެ.
މި އޮޕަރޭޝަނުގައި އިސްނަންގަވައިގެން ނުރައްކާތެރި މަސައްކަތްތަކެއް ކޮށްދެއްވާފައިވަނީ ކ. ގާފަރު، ބްލޫ ހެވަން، އަޙްމަދު ފައިޞަލް އާއި އއ. އުކުޅަސް، މީރާޒް، ޞައްދާމު އަޙްމަދެވެ.
މި ހާދިސާ ހިނގާފައިވަނީ 2026 ޖޫން 11 ވީ ދުވަހުގެ ފަތިހުގެ ވަގުތެއްގައެވެ. ފުލުހުންގެ ’ލޯންޗު 57‘ ގައި ރަސްމީ ޑިއުޓީގައި އުޅުނު ފުލުހަކު ކަނޑަށް ވެއްޓި ގެއްލުމާ ގުޅިގެން، އެ އޮފިސަރު ހޯދުމަށާއި ހަށިގަނޑު ނެގުމަށް (ރިކަވަރ ކުރުމަށް) ކުރެވުނު ބުރަ މަސައްކަތުގައި މި ދެ ބޭފުޅުން ވަނީ އެންމެ މުހިންމު ދައުރެއް އަދާކުރައްވާފައެވެ.
މިނިސްޓަރ ޢަލީ އިހުސާނާއި ކޮމިޝަނަރ އޮފް ޕޮލިސް މިއަދު ވަނީ އެ ދެ ޑައިވަރުންނަށް ވަކިވަކިން ފޯނުން ގުޅުއްވައި، އެ ނާޒުކު ދަނޑިވަޅުގައި އެ ބޭފުޅުން ދެއްކެވި ހިތްވަރަށް ތައުރީފު ކުރައްވާފައެވެ. އަދި އެ ބޭފުޅުންގެ އަމިއްލަ ނަންފުޅުގައާއި މުޅި ފުލުހުންގެ މުއައްސަސާގެ ނަމުގައި ވަނީ ޝުކުރު އަދާކުރައްވާފައެވެ.
މި ފޯނު ކޯލްތަކުގައި މިނިސްޓަރާއި ސީޕީ ފާހަގަކުރެއްވި ގޮތުގައި، މިފަދަ ހިތާމަވެރި ހާދިސާތަކުގައި އާންމު ރައްޔިތުންގެ ފަރާތުން ލިބޭ މިފަދަ އެހީތެރިކަމަކީ ދިވެހި މުޖުތަމައުގެ އެއްބައެއްވަންތަކަމާއި، އޯގާތެރިކަމުގެ މަތިވެރި ނަމޫނާއެކެވެ. އަދި މި އޮޕަރޭޝަނުގައި އެ ދެ ޑައިވަރުން ކޮށްދެއްވި މަސައްކަތަކީ އަގުނުކުރެވޭނެ ފަދަ މުހިންމު ޤައުމީ ޚިދުމަތެއްކަން ދެ ބޭފުޅުންވެސް ފާހަގަކުރެއްވިއެވެ.
މީގެ އިތުރުން، ކުއްލި ހާލަތްތަކުގައި ދައުލަތުގެ ސަލާމަތީ ޚިދުމަތްތަކާއި އާންމު ރައްޔިތުން ގުޅިގެން މަސައްކަތް ކުރުމުގެ މުހިންމުކަމުގެ މައްޗަށްވެސް މިނިސްޓަރާއި ކޮމިޝަނަރ އަލިއަޅުއްވާލެއްވިއެވެ.
ފުލުހުންގެ މުއައްސަސާއިން ވިދާޅުވީ، މިއީ ފުލުހުންގެ ޚިދުމަތަށް ކުރިމަތިވި ހިތާމަވެރި ދަނޑިވަޅެއްގައި އާންމު ދެ ރައްޔިތަކު ފޯރުކޮށްދިން ނުހަނު ބޮޑު އެހީތެރިކަމެއް ކަމަށާއި، އެކަން މުޅި މުއައްސަސާއިން ނުހަނު ޝުކުރުވެރިކަމާއެކު ބަލައިގަންނަ ކަމަށެވެ.
