މި އަހަރު ބޭއްވި ލޯކަލް ކައުންސިލްތަކުގެ އިންތިހާބުގައި މ. ވޭވަށު ކައުންސިލްގެ ގޮނޑިއަށް ވޯޓުލީ ތިން ކަރުދާހެއްގައި ތިކިތަކެއް ހުރުމުން އެ ކަރުދާސްތައް ބާތިލްކުރުމަށް ހައިކޯޓުން ކުރި ހުކުމް، ސުޕްރީމް ކޯޓުން މިއަދު ބާތިލްކޮށްފިއެވެ.
މި މައްސަލައިގައި ހައިކޯޓުން ބާތިލްކޮށްފައިވަނީ އެމްޑީޕީގެ ކެންޑިޑޭޓް އަޙުސަން ނަޢީމަށް ލިބުނު ތިން ވޯޓެކެވެ. އެ ވޯޓުތައް ބާތިލްކުރުމާ ގުޅިގެން ޕީއެންސީގެ ކެންޑިޑޭޓް މުޙައްމަދު ނަޒީހަށް އެއް ވޯޓުގެ ތަފާތުން ގޮނޑި ކާމިޔާބުވި ނަމަވެސް، އެމްޑީޕީގެ ކެންޑިޑޭޓުގެ ފަރާތުން އެ ނިންމުން ސުޕްރީމް ކޯޓުގައި އިސްތިއުނާފު ކުރިއެވެ.
ސުޕްރީމް ކޯޓުގެ ހުކުމުގައި ބަޔާންކޮށްފައިވާ ގޮތުގައި، ވޯޓު ކަރުދާސްތަކުގައި ހުރި ކަޅު ދެލީގެ ތިކިތަކަކީ ޗާޕުކުރުމުގެ ތެރޭގައި ދިމާވި ކަމެއް ކަމަށް ކަރުދާސްތައް ޗާޕުކުރި ނޮވެލްޓީން ބުނެފައިވާ ކަމަށެވެ. އަދި އެއީ ވޯޓުލީ މީހުން ގަސްތުގައި ޖަހާފައިވާ ނިޝާންތަކެއްކަން ސާބިތުކޮށްދެވޭނެ އެއްވެސް ހެއްކެއް ނެތް ކަމަށް ވެސް ކޯޓުން ވަނީ ބުނެފައެވެ.
މީގެ އިތުރުން، ވޯޓުލާފައިވަނީ ނޫކުލައިގެ ދެލިން ލިޔެވޭ ގަލަން ބޭނުންކޮށްގެން ކަމަށްވާއިރު، ވޯޓުލާ މަރުކަޒަށް ކަޅުކުލައިގެ ދެލިން ލިޔެވޭ ގަލަމެއް ވެއްދިކަމުގެ އެއްވެސް ޝަކުވާއެއް ރިޕޯޓުކޮށްފައި ނުވާތީ، ވޯޓުގެ ސިއްރުކަން ގެއްލިފައިވާ ކަމަށް ބެލެވޭނެ ގާނޫނީ އެއްވެސް ސަބަބެއް ނެތް ކަމަށް ވެސް ކޯޓުގެ ހުކުމުގައިވެއެވެ.
ސުޕްރީމް ކޯޓުގެ މި ނިންމުމާއެކު، އަޙުސަން ނަޢީމަށް ޖުމުލަ 121 ވޯޓު ލިބި އޭނާ ވަނީ މަގާމަށް އިންތިހާބުވެފައެވެ. ޕީއެންސީގެ ކެންޑިޑޭޓް ނަޒީހަށް ލިބިފައިވަނީ 118 ވޯޓެވެ. މި ނަތީޖާއާއެކު ވޭވަށު ކައުންސިލްގެ އަޣުލަބިއްޔަތު އިދިކޮޅު އެމްޑީޕީއަށް ލިބިފައިވާއިރު، އެ ޕާޓީއަށް މިހާރު ވަނީ ކައުންސިލްގެ ރައީސްގެ ގޮނޑިއާއެކު ޖުމްލަ ދެ ގޮނޑި ކާމިޔާބުވެފައެވެ. ޕީއެންސީއަށް ލިބިފައިވަނީ އެއް ގޮނޑިއެވެ.
