އިމިގްރޭޝަންގެ ކުރީގެ ކޮންޓްރޯލަރ ޖެނެރަލް މުޙައްމަދު ޝަމްޢާން ވަޙީދު މީޑިއާތަކާ ބައްދަލުކޮށް ފުލުހުންގެ ތަޙުޤީޤާ ގުޅޭގޮތުން ކޮށްފައިވާ ތުހުމަތުތަކަކީ އެއްވެސް އަސާސެއް ނެތް ޙަޤީޤަތާއި ޚިލާފު ވާހަކަތަކެއް ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
މި މައްސަލައާ ގުޅިގެން ފުލުހުން ނެރުނު ބަޔާނެއްގައި ވިދާޅުވީ، ޝަމްޢާން ވަޙީދާއި މޯލްޑިވްސް އިމިގްރޭޝަންގެ ބައެއް މުވައްޒަފުން ގުޅިގެން މަޤާމުގެ ނުފޫޒު ބޭނުންކޮށްގެން ބިދޭސީންގެ އަތުން ނުހައްގު މާލީ މަންފާ ހޯދައި، މަނީ ލޯންޑަރިންގެ އަމަލުތައް ހިންގާފައިވާ ކަމަށް ކުރެވޭ ތުހުމަތުތަކުގެ ތަހުގީގު ކުރިއަށް ގެންގޮސްފައިވަނީ ރާއްޖޭގެ ގާނޫނުތަކާ އެއްގޮތަށް ކަމަށެވެ.
ތަޙުޤީޤަށް ހޯދުނު މުހިންމު ހޯދުންތައް:
ފުލުހުންގެ ތަޙުޤީޤަށް ކަށަވަރުވެފައިވާ ގޮތުގައި، 2025 މާރިޗު 11 ވަނަ ދުވަހުގެ ރޭ ހިންގި އޮޕަރޭޝަނަކީ އޭގެ ހަފުތާއެއް ކުރިން ޝަމްޢާންގެ އޮފީހުގައި ރޭވި އޮޕަރޭޝަނެކެވެ. އެ ރޭ އިމިގްރޭޝަންގެ ބެލުމުގެ ދަށަށް ގެނައި ބިދޭސީންގެ ތެރެއިން އެކަކު ދޫކޮށްލުމަށް، ސްޕޮންސަރުގެ ނަމުގައި ފޮނުވި އީމެއިލަކާ ގުޅިގެން ޝަމްޢާން ސީދާ އިރުޝާދު ދެއްވިކަން ވަނީ ހާމަވެފައެވެ.
މީގެ އިތުރުން، އެ ބިދޭސީ މީހާ ދޫކޮށްލުމުގެ ބަދަލެއްގެ ގޮތުން 500,000 (ފަސްލައްކަ) ރުފިޔާ ހޯދުމަށް ޝަމްޢާނާ ގުޅައިގެން މަޝްވަރާކޮށްފައިވާ ކަމާއި، ދަންވަރު 3:00 އެހައިކަންހާއިރު އިމިގްރޭޝަންގެ ދެ މުވައްޒަފަކު ފައިސާ ހުރި ކޮތަޅެއް ހިފައިގެން ޝަމްޢާން ދިރިއުޅޭ އެޕާޓްމަންޓަށް ވަދެފައިވާކަން ސީސީޓީވީ ފުޓޭޖްތަކުންނާއި ތަހުގީގުން ވަނީ ކަށަވަރުވެފައެވެ. އަދި އޭގެ ޖެހިގެން އައި ދުވަހު ޝަމްޢާންގެ ބޭންކް އެކައުންޓްތަކަށް 259,837.35 ރުފިޔާ ޖަމާކޮށްފައިވާކަން ވެސް ފުލުހުން ފާހަގަކުރެއްވިއެވެ.
ފޯނުގެ ލޮކް ކޯޑު ދީފައެއް ނުވޭ:
ޝަމްޢާންގެ ފޯނުގައި ކޮރަޕްޝަންގެ ހެކި ހުރި ކަމަށް އޭނާ މިހާރު ބުނަމުންދިޔަ ނަމަވެސް، މުޅި ތަޙުޤީޤު މަރުހަލާގައާއި އޭނާ ބަންދުން ދޫކޮށްލި ފަހުންވެސް އެފަދަ މައުލޫމާތެއް އެއްވެސް މުއައްސަސާއަކާ ހިއްސާކޮށްފައި ނުވާކަން ފުލުހުން ފާހަގަކުރެއްވިއެވެ. އަދި ތަޙުޤީޤަށް ހިފެހެއްޓި ފޯނު ހުޅުވުމަށް ބޭނުންވާ ލޮކް ކޯޑު ދިނުމަށް ވެސް އޭނާ ވަނީ އިންކާރުކޮށްފައެވެ.
ފުލުހުން ވިދާޅުވީ މި ތަޙުޤީޤަކީ ވަކި ފަރާތެއްގެ ނުފޫޒެއް ނެތި، ހެކިތަކުގެ މައްޗަށް ބިނާކޮށް ހިންގާފައިވާ މިނިވަން ތަޙުޤީޤެއް ކަމަށެވެ. ކްރިމިނަލް ކޯޓުން މިހާރު މި މައްސަލައިގައި ހުކުމް އިއްވާފައިވާއިރު، ކޯޓުގެ ނިންމުމާމެދު ހިތްހަމަނުޖެހޭނަމަ އޮތް ޤާނޫނީ ހައްލަކީ އިސްތިއުނާފު ކުރުން ކަމަށްވެސް ފުލުހުންގެ ބަޔާނުގައި ވެއެވެ.
