މާލޭ އުތުރު ފަރާތު ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ދަށުން ބަންދުކޮށްފައިވާ ހެންވޭރު ފެރީ ޓާމިނަލް ސަރަހައްދުގެ ބައެއް، އާންމު ދަތުރުފަތުރާއި ލަފާފުރުމަށް ވަގުތީގޮތުން ބޭނުންކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހުޅުވާލައިފިއެވެ.
މިކަމާ ގުޅިގެން އެމްޓީސީސީން ބުނެފައިވަނީ، ޕޯސްޓް އޮފީހާއި ބާސެލޯ ނަސަންދުރައާއި ދެމެދުގައިވާ ޖެޓީ ސަރަހައްދަށް ފެރީ ކައިރި ކުރުމަށާއި، ފަސިންޖަރުން އަރުވާ ބޭލުމަށް ވަގުތީ ގޮތުން ހުއްދަ ދިނުމަށް ނިންމާފައިވާ ކަމަށެވެ.
ލަފާފުރުމަށް ފަސޭހަކޮށްދިނުމަށް ޖެޓީ ސަރަހައްދު ހުޅުވާލި ނަމަވެސް، އެ ސަރަހައްދަކީ އަދިވެސް މަގު ހެދުމުގެ މަސައްކަތް ހިނގަމުންދާ ސަރަހައްދެއް ކަމަށްވާތީ، އާންމު ދަތުރުފަތުރަށް އެ މަގު އަދި ހުޅުވައެއް ނުލައެވެ. ކަން މިހެން އޮތުމުން އެ ސަރަހައްދު ބޭނުންކުރާ ފަރާތްތަކުން ސަލާމަތީ ގޮތުން ރައްކާތެރިވުމަށާއި، މަސައްކަތް ކުރިއަށްދާ ސަރަހައްދުގައި ހަރަކާތްތެރިވާ އެމްޓީސީސީގެ މުވައްޒަފުންގެ އިރުޝާދުތަކަށް ފުރިހަމައަށް ބޯލެނބުމަށް އެ ކުންފުނިން ވަނީ އިލްތިމާސްކޮށްފައެވެ.
ކަސްޓަމަރުންގެ ސަމާލުކަމަށް! pic.twitter.com/0A3xpAS6cX
— MTCC Plc (@MTCCPlc) June 10, 2026
މާލޭ އުތުރު ފަރާތު ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ އަމަލީ މަސައްކަތް ފެށީ މިދިޔަ އޮގަސްޓް މަހުގެ 21 ވަނަ ދުވަހުއެވެ. ޖުމުލަ ތިން ސެގްމަންޓަކަށް ބަހާލައިގެން ކުރިއަށް ގެންދާ މި މަޝްރޫއުގެ ދަށުން ބޮޑުތަކުރުފާނުމަގު ހަތަރު ލޭނަށް ފުޅާކުރުމާއި، 830 މީޓަރުގެ ސަރަހައްދެއްގައި ތާރު އެޅުމާއި ދުވާރުތައް ހެދުމުގެ އިތުރުން ފެން ހިންދާ ނިޒާމް ގާއިމުކުރުމަށް ވަނީ ހަމަޖެހިފައެވެ.
މީގެ އިތުރުން ހުޅުމާލެ ފެރީ ޓާމިނަލުން ފެށިގެން ލޯކަލް މާރުކޭޓާ ހަމައަށް ދުވާރުތައް ހެދުމާއި، ފެން ހިންދާ ނިޒާމް ގާއިމުކުރުމާއި، ރޯޑް މާކިން އަދި ސައިން ބޯޑް ހަރުކުރުމުގެ މަސައްކަތް ވެސް މި މަޝްރޫއުގެ ތެރޭގައި ހިމެނޭ ކަމަށް އެމްޓީސީސީން މައުލޫމާތު ދެއެވެ.
