އިތުބާރު ކުރެވޭ މަގާމެއްގައި ހުރެ ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ފުލުހުންގެ އޮފިސަރަކު ހައްޔަރުކޮށް، އޭނާ ވަޒީފާއިން ސަސްޕެންޑުކޮށްފިއެވެ.
ކުޑަކުއްޖަކަށް ޖިންސީ ގޯނާކުރިކަމުގެ މި މައްސަލަ ފުލުހުންނަށް ރިޕޯޓުކޮށްފައިވަނީ މި ހިނގާ ޖޫން މަހުގެ 1 ވަނަ ދުވަހުއެވެ. މި މައްސަލަ ފެންމަތިވުމާއެކު، ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން ޑިޕާޓްމަންޓުން ވަނީ މިކަމުގެ ޖިނާއީ ތަހުގީގު ވަގުތުން ފަށާފައެވެ.
މި މައްސަލައިގެ ތަހުގީގަށް ލިބުނު ހެކިތަކުގެ މައްޗަށް ބިނާކޮށް، މިދިޔަ އާދިއްތަ ދުވަހު ކޯޓު އަމުރެއްގެ ދަށުން 49 އަހަރުގެ ދިވެހި ފިރިހެނަކު ވަނީ ހައްޔަރުކޮށްފައެވެ. ފުލުހުންގެ މުއައްސަސާއިން ކަށަވަރުކޮށްދީފައިވާ ގޮތުގައި، ހައްޔަރުކުރެވުނު މީހާއަކީ އެ މުއައްސަސާގައި މަސައްކަތްކުރާ ފުލުހެކެވެ. އޭނާ ހައްޔަރުކުރި ދުވަހުން ފެށިގެން މުސާރަ ނުލިބޭ ގޮތަށް ވަޒީފާއިން ވަނީ ސަސްޕެންޑުކޮށްފައެވެ.
ހައްޔަރުކުރެވުނު ފުލުސް އޮފިސަރުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ތަހުގީގު ނިމެންދެން ނުވަތަ 30 ދުވަހުގެ މުއްދަތަކަށް އޭނާ ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ. މި މައްސަލައިގެ އިދާރީ ތަހުގީގު، ފުލުހުންގެ ޕްރޮފެޝަނަލް ސްޓެންޑަޑްސް ކޮމާންޑުން ވަކިން ކުރިއަށް ގެންދާކަމަށް ފުލުހުން ބުނެފައިވެއެވެ.
